Nooreeba ngu Oine Kutendeka Abandi?

1, 2. Ahabw’enki twine kutendeka abandi kwejumba omu buheereza bw’eby’omwoyo?

OKUBUURIRA amakuru marungi g’Obukama nigwo murimo ogu Yesu yaabaire naayebembeza. Kwonka, akaba agira n’obwire bw’okutendeka abandi kuba abeegyesa barungi bakareeberera n’entaama za Ruhanga. (Mat. 10:5-7) N’obu Filipo araabe yaabaire ari omubuurizi, hatariho kubanganisa akahwera bahara be bana kwega kubuurira gye abandi amazima kuruga omu Byahandiikirwe. (Byak. 21:8, 9) Okutendeka abandi ni kukuru kuta obunaku obu?

² Omu nsi yoona, abantu abarikwikiriza amakuru marungi, nibeeyongyera obwingi. Abasya abatakabatiziibwe baine kwetegyereza obukuru bw’okweyegyesa Baibuli. Baine kutendekwa kubuurira abandi amakuru marungi kandi bakabeegyesa amazima. Omu bibiina byaitu, ab’eishe-emwe baine kuhigwa kukora n’amaani kubaasa kuhikiiriza ebirikwetengyesa kuba abaheereza nari abareeberezi. Abakristaayo abakuzire omu by’omwoyo ‘baahabura kurungi’ abasya nibabahwera kutunguuka omu by’omwoyo.—Enf. 4:2.

HWERA ABASYA KUMANYA OKU BAINE KWEGA BAIBULI

3, 4. (a) Paulo akooreka ata akakwate akari ahagati y’okweyegyesa Baibuli n’okutunga ebirungi omu kubuurira? (b) Niki eki twine kukora tutakahigire abeegi ba Baibuli kweyegyesa Baibuli?

³ Okweyegyesa Ebyahandiikirwe ni kikuru kita? Nitutunga eky’okugarukamu kuruga omu bigambo by’entumwa Paulo ebi yaahandiikiire Abakristaayo bagyenzi be omuri Kolosai. Akahandiika ati: “Titukarekaga kubashabira, nitweshengyereza ngu mwijuzibwe okumanya ebi akunda omu bwengye bwona obw’omwoyo n’okwetegyereza, mugyende nk’oku aba Mukama [Yehova] bashemereire, nimumushemeza omuri byona, nimwana ebyana omu mirimo yoona emirungi, kandi nimweyongyera omu kumanya Ruhanga.” (Kol. 1:9, 10) Abakristaayo ba Kolosai bwanyima y’okutunga okumanya okwo, bakaba nibabaasa kugyenda nk’abashemeire omu maisho ga Yehova, ‘nibamushemeza omuri byona.’ Eki kikaba nikiija kubabaasisa kugumizamu ‘nibaana ebyana omu mirimo yoona emirungi,’ na munonga ogw’okubuurira amakuru marungi. Omuheereza wa Yehova kubaasa kuheereza gye, aine kuba naayeyegyesa Baibuli. Nikiba kiri kirungi kuhwera abeegi ba Baibuli kumanya enshonga egi.

⁴ Tutakahwereire abandi kugasirwa omu kweyegyesa Baibuli, naitwe twine kuba nitumanya gye omugasho gw’okweyegyesa. Nangwa, naitwe tushemereire kuba nitweyegyesa Baibuli. N’ahabw’ekyo noobaasa kwebuuza oti: ‘Abu ndikubuurira ku barikugamba ekirikutaana n’enyegyesa z’Ebyahandiikirwe nari bakabuuza ebibuuzo bigumire, nimbagarukamu ndikukoresa Baibuli? Ku ndikushoma oku Yesu, Paulo, n’abandi baagumisiriize omu buheereza bwabo, ninteekateeka aha ku okugumisiriza kwabo kurikubaasa kumpwera naanye kugumisiriza naaba nimpeereza Yehova?’ Twena twine kutunga okumanya n’obuhabuzi kuruga omu Kigambo kya Ruhanga. Kandi ku turikugambira abandi oku tugasiirwe omu kweyegyesa Baibuli, nikibaasa kubahiga nabo kweyegyesa Baibuli reero bagasirwe.

5. Nitubaasa kuhwera tuta abasya kuguma nibeeyegyesa Baibuli?

⁵ Noobaasa kwebuuza oti: ‘Nimbaasa kutendeka nta abeegi bangye ba Baibuli kweyegyesa Baibuli butoosha?’ Entandikiro nungi n’okumworeka oku arikubaasa kutebeekanisa ebi murikuza kwegaho. Noobaasa kumushaba kushoma ebirikukiraho ebiri omu katabo Eki Turikwega omu Baibuli kandi ashome ebyahandiikirwe ebijuriziibwe. Muhwere kutebeekanisiza enteerane aine ekigyendererwa ky’okugarukamu. Muhige kushoma buri Munaara gw’Omurinzi na Awake! Haaba hariho Watchtower Library nari Raiburare y’aha mukura omu rurimi rwe, mworekye oku arikubaasa kugikoresa kugarukamu ebibuuzo ebirikukwata aha Baibuli. Omwegi waawe wa Baibuli waamuhwera omu muringo nk’ogwo, obwire butari bwa hare naabaasa kwija kukunda okweyegyesa Ekigambo kya Ruhanga.

6. (a) Noobaasa kuhwera ota omwegi wa Baibuli kukunda Baibuli? (b) Omwegi wa Baibuli yaakunda Ebyahandiikirwe nikibaasa kumuhiga kukora ki?

⁶ Amazima gari ngu, titushemereire kugyemesereza omuntu weena kweshomesa Baibuli nari kugyeyegyesa. Omu mwanya gw’ekyo, twine kuteeraho kukoresa ebi ekibiina kya Yehova kirikutuha kuhwera abeegi baitu ba Baibuli kwongyera kukunda Baibuli. Haahinguraho obwire, omwegi wa Baibuli omucureezi naabaasa kwehurira nk’oku omuhandiiki wa zaaburi yaahuriire owaayeshongoire ati: “Ekirungi ahariinye n’okwirira haihi Ruhanga. Mukama Ruhanga mmuhindwire obweshereko bwangye.” (Zab. 73:28) Omwoyo gwa Yehova ogurikwera nigwija kuhwera omwegi wa Baibuli omucureezi.

TENDEKA ABASYA KUBUURIRA ABANDI N’OKUBEEGYESA

7. Yesu akatendeka ata ababuurizi b’amakuru marungi? (Reeba ekishushani aha kutandika.)

⁷ Omuri Matayo eshuura 10, nitushangamu obuhabuzi obu Yesu yaahaire entumwa ze 12. Omu mwanya gw’okugaitirana enshonga, akaba ashoborora enshonga emwe-emwe.^[1] Entumwa bakahurikiza gye obu Yesu yaabaire naabeegyesa oku baine kubuurira gye. Reero bwanyima bakaza omu kubuurira. Ahabw’okugira ngu bakareeba emiringo ei Yesu yaabaire naakoresa, ahonaaho bakaba abeegyesa barungi b’amazima g’Ebyahandiikirwe. (Mat. 11:1) Nitubaasa kutendeka abeegi baitu ba Baibuli kumanya kubuurira gye amakuru marungi. Ka tushwijume emiringo ebiri ei turikubaasa kubahweramu.

8, 9. (a) Yesu akaba agaaniira ata n’abantu omu kubuurira? (b) Nitubaasa kuhwera tuta ababuurizi abasya kugaaniira n’abantu nk’oku Yesu yaakozire?

⁸ Okugaaniira n’abantu. Yesu obutoosha akaba agambira abantu aha Bukama. Nk’eky’okureeberaho, akagaaniira omu muringo murungi n’omukazi owaabaire ari aha iziba rya Yakobo omu rurembo Sukaara. (Yoh. 4:5-30) Kandi akagaaniira na Matayo Leevi, omuhooza. Ebitabo by’Engiri tibirikugamba bingi aha kugaaniira okwo, kwonka Yesu ku yaayetsire Matayo akaikiriza yaaba omukuratsi we. Bwanyima Matayo akeeta Yesu n’abandi aha kiihuro omu ka ye, aha bugyenyi obwo, Yesu akagaaniira n’abantu baingi.—Mat. 9:9; Luk. 5:27-39.

⁹ Eizooba erindi, Yesu akagamba na Nasanaeli omu muringo murungi, n’obu Nasanaeli araabe yaabaire aine emiteekateekyere egwire aha bantu ba Nazareesi. Kwonka, ekyo kikahiga Nasanaeli kuhindura aha miteekateekyere ye. Akacwamu kwega bingi ebirikukwata ahari Yesu owa Nazareesi. (Yoh. 1:46-51) N’ahabw’ekyo twine enshonga zihikire ezishemereire kutureetera kutendeka ababuurizi abasya kugaaniira n’abantu omu muringo murungi, kandi ogw’obuteeka.^[2] Abu turikuhwera omu muringo ogu, nabo nibaija kushemererwa kureeba abu barikubuurira nibaikiriza amazima ahabw’okubafaho n’okukoresa ebigambo by’embabazi.

10-12. (a) Yesu akongyera kuhwera ata abaayorekire ngu nibakunda amakuru marungi? (b) Nitubaasa kuhwera tuta ababuurizi abasya kwongyera kuba abeegyesa barungi b’amazima g’omu Baibuli?

¹⁰ Yongyera kukundisa abandi. Yesu akaba aine obwire bukye bw’okubuurira. Kwonka, akaba agira obwire bw’okuhwera abaayoreka ngu nibakunda amakuru marungi. Nk’eky’okureeberaho, Yesu akeegyeseza abantu baingi omu bwato. Aha izooba eryo, akahwera Petero kukwata eby’enyanja bingi, reero yaamugira ati: “Okuruga hati oryajuba abantu.” Ebigambo bya Yesu n’ebikorwa bye bikarugamu ki? Petero n’abu yaabaire aine “ku baahikize amaato gaabo aha nkungu, batsigaho byona,” baakuratira Yesu.—Luk. 5:1-11.

¹¹ Nikodemu, omwe aha b’omu Ishengyero akakunda enyegyesa za Yesu. Akaba naayenda kwega bingi, kwonka akaba naatiina eki abandi baraagambe yaacwamu kugaaniira na Yesu butunu. Ahabw’okugira ngu Yesu akaba naahindahindura omu ntebeekanisa ze kandi atarikukekeereza obwire bwe, akabugana Nikodemu nyekiro atari mu bantu baingi. (Yoh. 3:1, 2) Ni mashomo ki agu turikubaasa kwega omu byahandiikirwe ebi? Omwana wa Ruhanga akaba akoresa obwire bwe kuhwera abandi kugira okwikiriza kuhami. Mbwenu shi titwine kuba abeeziriki twaba nitugarukayo aha barikusiima amazima kubeegyesa Baibuli?

¹² Ababuurizi abasya nibabaasa kwongyera kuba abeegyesa barungi b’amazima g’omu Baibuli twabuurira nabo. Nitubaasa kubahwera kufayo n’ahari abo abarikworeka okusiima kukye. Nitubaasa kushaba ababuurizi abasya kugyenda naitwe twaba nitugarukayo aha bu twabuuriire nari twaba nitwegyesa abeegi baitu ba Baibuli. Ababuurizi abasya twabatendeka kandi tukabahiga, nibaija kugira ekihika ky’okukundisa abandi amazima n’okugira abeegi ba Baibuli abaabo. Nibaija n’okwega kutarahuka kuhwa amaani beitu kugumisiriza omu buheereza.—Gal. 5:22; reeba akabokisi “Okugumisiriza ni Kikuru.”

TENDEKA ABASYA KUHEEREZA AB’EISHE-EMWE BAGYENZI BAABO

13, 14. (a) Nooteekateeka ota aha barikugambwaho omu Baibuli abaaheereize abandi? (b) Noobaasa kutendeka ota abasya n’abato kukunda ab’eishe-emwe bagyenzi baabo?

¹³ Baibuli neeyoreka omugisha ogu twine ‘ogw’okukunda ab’eishe-emwe’ n’okuheerezana. (Shoma 1 Petero 1:22; Luka 22:24-27.) Omwana wa Ruhanga akahayo buri kimwe otwariiremu n’amagara ge kuheereza abandi. (Mat. 20:28) Doruka “akaba akora emirimo mingi mirungi n’eby’embabazi.” (Byak. 9:36, 39) Mariamu, owaabaire naatuura omuri Rooma, akaba “naakora munonga” kuhwera abaabaire bari omu kibiina ekyo. (Rom. 16:6) Nitubaasa kuhwera tuta abasya kwetegyereza obukuru bw’okuhwera ab’eishe-emwe bagyenzi baabo omu kibiina?

¹⁴ Abajurizi ba Yehova abakuzire omu by’omwoyo nibabaasa kweta abasya kugyenda nabo kutaayaayira abarwaire n’abaine emyaka ya bukuru. Kyaba nikibaasika, abazaire nibabaasa kugyenda n’abaana baabo kutaayaayira abantu nk’abo. Abareeberezi nibabaasa kukora hamwe n’abandi kuhamya ngu abakaikuru n’abagurusi omu kibiina baine eby’okurya birungi kandi ngu n’amaka gaabo nigareebererwa gye. Omu miringo egi, abato n’abasya nibaija kwega kukorera abandi eby’embabazi. Omureeberezi omwe ku yaabaire aba ari omu kubuurira, akaba akoresa obwire bukye kutaayaayira Abajurizi ba Yehova abari omu kicweka ekyo kureeba oku bari. Ow’eishe-emwe muto owaabaire akira kugyenda n’omureeberezi ogwo, akeega ngu boona abari omu kibiina baine kuhurira ngu nibakundwa.—Rom. 12:10.

15. Ahabw’enki ni kikuru abareeberezi kufayo aha kutunguuka kw’abashaija omu kibiina?

¹⁵ Obu Yehova arikukoresa abashaija kuba nibo baayegyesa omu kibiina, ni kikuru ab’eishe-emwe kwega kuba abagambi barungi. Waaba ori omureeberezi noobaasa kuhurikiza omuheereza yaaba naayegyeza omu rubazo rwe? Waamuhwera, naabaasa kwongyera kuba omwegyesa murungi w’Ekigambo kya Ruhanga.—Neh. 8:8.^[3]

16, 17. (a) Paulo akafayo ata aha kutunguuka kwa Timoseo? (b) Abareeberezi nibabaasa kutendeka gye bata abarikwija kureeberera ekibiina omu biro by’omumaisho?

¹⁶ Omu kibiina abariisa b’entaama za Ruhanga nibeetengwa munonga, kandi abarikwija kukora omurimo ogwo baine kugumizamu nibatendekwa. Paulo akooreka oku okutendekwa kwine kukorwa obu yaagambira Timoseo ati: “Mwana wangye, guma ori ow’amaani omu mbabazi eziri omuri Kristo Yesu; kandi ebi waahuriire ningamba omu maisho ga baakareebi baingi, obikwatse abantu abarikwesigwa, abaribaasa kubyegyesa abandi.” (2 Tim. 2:1, 2) Timoseo akeegyera aha mushaija mukuru entumwa Paulo ou yaabaire naaheereza nawe. Bwanyima Timoseo akakoresa emiringo nk’eya Paulo omu kubuurira kwe n’omu buheereza obundi oburikwera.—2 Tim. 3:10-12.

¹⁷ Paulo tararekire Timoseo kwetendeka. Akaba agyenda n’omutsigazi muto ogwo. (Byak. 16:1-5) Abareeberezi nibabaasa kutooreza Paulo barikugyenda n’abaheereza abahikize ebirikwetengyesa kuza kugaruramu ab’eishe-emwe abandi amaani kyaba nikyetengyesa. N’ahabw’ekyo, abareeberezi nibaha ab’eishe-emwe abo omugisha gw’okwereebera oku barikwegyesa, oku barikukunda abandi kandi bakabagumisiriza, emitwarize ei abareeberezi baine kugira. Omu muringo ogu, nibaba nibatendeka abarikwija kuriisa “obusyo bwa Ruhanga” omu biro by’omumaisho.—1 Pet. 5:2.

OBUKURU BW’OKUTENDEKA ABANDI

18. Ahabw’enki twine kutwara okutendeka abandi omu buheereza bwa Yehova nka kikuru?

¹⁸ Okutendeka abandi ni kikuru munonga ahabw’okugira ngu hariho ekyetengo ky’amaani n’emiringo mingi y’okuheerezamu Yehova. Omuringo ogu Yesu na Paulo baatendekiremu abandi nigukikora na hati. Yehova naayenda ngu abaheereza be obunaku obu babe batendekirwe gye kwija kwejumba omu buheereza oburikwera. Yehova naatuha omugisha gw’okuhwera abasya kuba abahikire kuheereza omu kibiina. Ahabw’embeera kweyongyera kuba mbi omu nsi, okubuurira nikwetengyesa munonga, ekirikureetera n’okutendeka abandi kuba kikuru kandi okiine kukorwa ahonaaho.

19. Ahabw’enki orikuhamya ngu waataho omutima kutendeka abandi kuheereza Yehova noija kusingura?

¹⁹ N’amazima, okutendeka abandi nikyetengyesa obwire n’amaani. Kwonka Yehova n’Omwana we omukundwa nibaija kutuhwera batuhe n’obwengye oburikwetengyesa omu kutendeka oku. Nitwija kushemererwa twareeba abo abu turikuhwera nibagumizamu ‘kufeera kubi abandi, kandi nibeezirika.’ (1 Tim. 4:10) N’ahabw’ekyo, ka tuteereho kugumizamu nitutunguuka omu by’omwoyo turikuheereza Yehova omu buheereza oburikwera.