OMUTWE OGURI AHA MUNAARA
Niki Ekiraakukundise Kushoma Baibuli?
Okushoma Baibuli nikukutama, nari nikukuruhuura? Eky’okugarukamu nikyegamira aha muringo ogu orikushomamu. Ka tureebe oku orikubaasa kwongyera kukunda kushoma Baibuli kandi ekakushemeza.
Toorana envunuura ya Baibuli eyorobi, kandi erikwesigwa. Waashoma envunuura ya Baibuli erimu ebigambo bigumire, nari ebihwaire aha murembe ebi otarikumanya, torikwija kukunda kugishoma. Sherura Baibuli ey’orurimi rworobi eraakuhikye aha mutima. Kwonka, yegyendesereze kusherura Baibuli evunwirwe gye.a
Koresa ebyoma. Hati hariho Baibuli eziteirwe n’ez’aha byoma. Baibuli ezimwe noobaasa kuzishomera aha mukura nari kuziihaho reero ozishomere aha kompyuta, tabuleti, nari esimu. Envunuura za Baibuli ezimwe nizikubaasisa kugyeragyeranisa n’ezindi n’okutunga emishororongo erikugamba aha nshonga ezindi. Waaba nookunda kuhurikiza omu mwanya gw’okushoma, nabwo Baibuli eriho omu maraka. Abantu baingi nibakunda kugihurikiza baaba bari omu baasi, barikwozya, nari barikukora ekindi kintu ekirikubabaasisa kuhurikiza. Ahabw’enki otarikukoresa omuringo ogurikukubaasikira?
Koresa eby’okwegyeraho Baibuli. Eby’okukoresa omu kwega nibibaasa kukuhwera kugasirwa omu kushoma Baibuli. Hariho maapu z’emyanya erikugambwaho omu Baibuli, ezirikukuhwera kumanya ahu emyanya ei orikushomaho yaabaire eri n’okukuhwera kuteera akashushani. Ebicweka nk’ebirikwizira omu magaziini nari ahansi y’omutwe “Enyegyesa za Baibuli” aha jw.org nibibaasa kukuhwera kujumbura amakuru g’ebintu bingi ebiri omu Baibuli.
Hindura omu bukoryo bw’okushoma. Ku kiraabe nikikurusya kushoma Baibuli yoona kuruga aha kutandika kuhika aha muheru, ahabw’enki otarikutandika n’ebitabo ebi orikukunda kukuhwera kugira ekihika ky’okushoma? Ku oraabe nooyenda kumanya abantu rugambwa abarikugambwaho omu Baibuli, noobaasa kuteeraho kushoma ebirikukwata aha bantu abo. Eky’okureeberaho ky’eki kiri omu kabokusi “Tiikuura Baibuli Kubaasa Kumanya Abu Erikugambaho.” Nari obundi nooyenda kushoma Baibuli orikukuratira enshonga aha ndiijo, nari nk’oku ebintu byabaire nibikuratana. Ahabw’enki otarikuteeraho kukoresa kamwe aha bukoryo obu?
a Baingi bashangire ngu New World Translation of the Holy Scriptures niyo ehikire, erikwesigwa, kandi eyorobi kushoma. Baibuli egi eyaashohoziibwe Abajurizi ba Yehova eriho omu ndimi ezirikurenga 130. Noobaasa kugiiha aha mukura jw.org nari aha nkora ya JW Library. Nari waaba nooyenda, Abajurizi ba Yehova nibabaasa kukureetera eteirwe owaawe omuka.