Baibuli Neebaasa Kuboneza Eta Embeera Zangye?

Baibuli ti kitabo kityo-kityo. Kirimu obuhabuzi kuruga aha Muhangi. (2 Timoseo 3:16) Obutumwa bwayo nibubaasa kutuhindurira kimwe. Nangwa, Baibuli neegira eti: “Ekigambo kya Ruhanga kiine amagara n’amaani.” (Abaheburaayo 4:12) Kiine amaani g’okutugasira omu miringo ebiri mikuru, kirikutuha obuhabuzi omu ku turikutwaza buri izooba n’okutuhwera kumanya Ruhanga n’ebi arikuraganisa.—1 Timoseo 4:8; Yakobo 4:8.

Nikikugasira hati. Baibuli neebaasa kutuhwera omu nshonga ezaitu nk’abantu. Neeha obuhabuzi aha bintu ebi.

• Enkoragana n’abandi. —Abaefeso 4:31, 32; 5:22, 25, 28, 33.

• Enyehurira n’amagara marungi. —Zaaburi 37:8; Enfumu 17:22.

• Emicwe mirungi.—1 Abakorinso 6:9, 10.

• Okwebaisaho.—Enfumu 10:4; 28:19; Abaefeso 4:28.a

Ow’eishe-emwe n’omukazi we omuri Asia bakasiima munonga omugasho gw’obuhabuzi bwa Baibuli. Nk’abashweraine baingi, bakaba nibagumirwa kumanyiirana omu mitwarize n’okugaaniira. Kwonka bakatandika kushoma Baibuli. Hakarugamu ki? Iba, Vicent, naagira ati: “Ebi naashomire omu Baibuli bikampwera kusingura oburemeezi omu bushwere bwangye omu muringo gwa rukundo. Okugyendera ahari Baibuli kitureeteire kushemererwa hamwe.” Omukazi we Annalou, naagira ati: “Okushoma aha barikugambwaho omu Baibuli kikatuhwera. Hati nshemereirwe kandi mmazirwe omu bushwere bwaitu n’ebigyendererwa ebi twine.”

Okumanya Ruhanga. Oyihireho ebi Vicent yaagambire aha bushwere, naagira ati: “Ahabw’okushoma Baibuli, hati nimpurira ndi haihi na Yehova kugira ira.” Ebigambo bya Vicent nibyoreka ngu Baibuli neebaasa kukuhwera kumanya Ruhanga. Waakora otyo, noija kugasirwa omu buhabuzi bwe kandi noija kumumanya nka munywani waawe. Kandi noija kureeba ngu naagamba aha biro birungi by’omumaisho, obu oraije kwesiimira “amagara agaabuzima” agaraagumeho ebiro byona. (1 Timoseo 6:19) Tihaine kindi kitabo ekirikugamba aha nshonga egi.

Waatandika kushoma Baibuli, otahanika gumizamu, naiwe noobaasa kugasirwa omu miringo egyo, kandi omanye Ruhanga. Kwonka waaba nooshoma Baibuli, noija kutungamu ebibuuzo. Waabituinga, ijuka omukungu Omwesiopia owaabaireho emyaka nka 2,000 enyima. Akaba aine ebibuuzo bingi ebirikukwata ahari Baibuli. Ku baamubuurize yaaba yaabaire naayetegyereza ebi yaabaire naashoma, akagarukamu ati: “Nimbaasa nta, ntaine w’okunshobororera?”b Kandi akaikiriza kuhwerwa Filipo omwegi wa Yesu, kandi omwegyesa wa Baibuli. (Ebyakozirwe 8:30, 31, 34) Naiwe ku oraabe nooyenda kumanya bingi ebirikukwata ahari Baibuli, nitukuhiga kwohereza okushaba kwawe aha www.jw.org/nyn nari handiika aha ndagiriro eri haihi naiwe, omu magaziini. Noobaasa n’okuhurizana n’Abajurizi ba Yehova abari haihi naiwe nari za aha Kyombeko ky’Obukama omu kicweka kyanyu. Ahabw’enki otarikukwata Baibuli hati okareka ekakwebembera?