“Nikyo Kiconco Ekirikukira Byona Eki Ndatungire”

Oku nikwo omwishiki ow’emyaka 13 yaagizire bwanyima y’okuheebwa akabwa k’okuzaanisa. Omukazi omwe orikukora eby’obushuubuzi naagira ngu kompyuta ei ishe yaamuhaire akiri aha ishomero n’ekiconco ekyahindwire amagara ge. Omushaija omugore naagira ngu ekiconco ekirikukirayo kumushemeza n’eki omukazi we yaamukoreire n’emikono ye bwanyima y’omwaka gumwe omu bushwere.

Buri mwaka, baingi nibakoresa amaani n’obwire bwingi barikusherura ekiconco “ekirikukirayo” eky’okuha omunywani nari omunyabuzaare aha izooba ry’omutaano. Kandi buzima twena nitushemererwa kuhurira ebigambo ebiri aha kutandika twaha omuntu ekiconco. Kandi shi iwe? Okaayenzire kutunga nari kuhayo ekiconco ekirikusiimwa?

Ekyo ni kirungi buzima ahakuba, orikukitunga naashemererwa kandi orikuhayo nawe nikimureetera kwehurira gye. Ahakuba Baibuli neegira eti: “Okugaba kuhaisa omugisha okukira okuheebwa.” (Ebyakozirwe 20:35) Kandi okushemererwa oku turikutunga ahabw’okuhayo nikweyongyera ou twaha ekiconco yaakisiima.

Noobaasa kukora ki kugira ngu iwe orikuhayo n’ogwo orikutunga ekiconco mwatunga okushemererwa okwabuzima? Kandi okuhayo ekiconco “ekirikukirayo” kyaba kitarikubaasika, noobaasa kukora ki kugira ngu ekiconco kyawe kisiimwe?