Ni Kiconco Ki Ekirikukira Byona?

“Engabirano yoona enungi n’ekiconco kyona ekihikire biruga omu iguru, nibishuuma okuruga ahari Isheboona, Omuhangi w’ebirikwaka.” (Yakobo 1:17) Ekyahandiikirwe eki nikigamba aha bufura bwa Tataitwe ow’omu iguru, Yehova Ruhanga. Kwonka, aha biconco byona ebi Ruhanga arahaire abantu, hariho kimwe ekirikukirayo. Ni kiiha? Ebigambo bya Yesu ebiri omu Yohaana 3:16 ebirikumanywa munonga nibigira biti: “Ahakuba oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.”

Ekiconco ky’omwana wa Ruhanga omwe nyamunegyere, nikyo kiconco ekirikukirayo eki omuntu weena arikubaasa kutunga, ahakuba nikyo kirikutubaasisa kucungurwa kuruga omu kibi, okukaikura n’okufa. (Zaaburi 51:5; Yohaana 8:34) Ahabwaitu twenka tihariho eki turikubaasa kukora kwecungura. Kwonka, ahabwa rukundo ei Ruhanga atwiniire, akahayo ekyo kyenyine ekirikwetengwa kubaasa kutucungura. Yehova Ruhanga okuhayo omwana we omwe nyamunegyere, Yesu Kristo nk’ekitambo, akaha abantu boona abacureezi amatsiko g’okutunga amagara agatahwaho. Kwonka ekitambo niki? Ahabw’enki turikukyetenga? Kandi nikitugasira kita?

Ekitambo n’omuhendo ogurikushashurwa okugura ekintu okakyegaruriza nari okucungura ekiteirwe omu kihome. Baibuli neeshoboorora oku abazaire baitu ab’okubanza baahangirwe bataine kibi baine omugisha gw’okugumaho ebiro byona n’abaana baabo omuri paradiso. (Okutandika 1:26-28) Eky’obusaasi bakafeerwa ebi byona obu bacwamu kugomera Ruhanga kandi bakahinduka abasiisi. Ekyarugirmu? Baibuli neegira eti: “Nk’oku ekibi kyaizire omu nsi ahabw’okushiisha kw’omuntu omwe, kandi kikarugamu okufa, nikwo n’okufa kwabugire omu bantu boona, ahakuba boona bakashiisha.” (Abarooma 5:12) Omu mwanya gwa Adamu kuhunguza abaana be amagara agahikiriire, akabahunguza ekibi n’okufa.

Ekitambo ekirikuheebwayo kiine kuba nikiingana n’eki waafeerwa. Adamu ku yaagomiire Ruhanga akafeerwa amagara ge. Baibuli neetworeka ngu eki kikareetera baijukuru ba Adamu boona kuba abahuuku b’ekibi n’okufa. N’ahabw’ekyo hakaba nihetengwa amagara agahikiirire agu Yesu yaahaireyo nk’ekitambo kubaasa kutucungura. (Abarooma 5:19; Abaefeso 1:7) Hati twine amatsiko g’okutunga amagara agatahwaho omuri paradiso omu nsi agu Adamu na Haawa baafeerirwe. Eki nikibaasika ahabw’ekitambo eki Ruhanga yaahaireyo​—Okushuuruurwa 21:3-5.

Ekitambo eki buzima n’ekiconco ekirikukirayo eki Ruhanga yaatuhaire ahabw’okugira ngu nikitubaasisa kwija kutunga amagara agatahwaho. Okwongyera kusiima ekiconco eki “eky’omutaano,” ka tureebe oku kirikuhikiiriza enshonga ezaaba zaashoboorirwe, ezirikureetera ekiconco kusiimwa.

Nikihikiiriza ekyetengo kyaitu. Abantu bakahangwa n’ekyetengo ky’okugumaho batarikufa. (Omubuurizi 3:11) N’obu ahabwaitu tutarikubaasa kuhikiiriza ekyetengo eki, kwonka ahabw’ekitambo hati nikibaasika. Baibuli neegira eti: “Ahakuba ebihembo by’ekibi n’okufa, kwonka ekiconco kya Ruhanga n’amagara agatahwaho omuri Kristo Yesu Mukama waitu.”​—Abarooma 6:23.

Nikihikiiriza ekyo ekiturikwenda. Abantu bakaba batarikubaasa kuhayo ekitambo. Baibuli neeshoboorora eti: “Ahakuba okucungura amagara gaabo n’okw’obuguzi bwingi tikushemereire kwehangwa.” (Zaaburi 49:8) N’ahabw’ekyo, tukaba nitwetenga obuhwezi kuruga ahari Ruhanga kubaasa kutucungura kuruga omu kibi n’okufa. Kwonka kurabira omu ‘kucungurwa’ ahabw’ekitambo kya Yesu Kristo, Ruhanga akahayo eki twabaire nitwetenga.​—Abarooma 3:23, 24.

Nikiheebwa omu bwire obuhikire. Baibuli neegira eti: ‘Ahakuba ku twabaire tukiri abanyabibi, Kristo yaatufeera.’ (Abarooma 5:8) Ahabw’okugira ngu ekitambo kikaheebwayo obu “twabaire tukiri abanyabibi,” nikihamya rukundo ei Ruhanga atwiniire. Eki nikituha amatsiko maingi, n’obu hati twine kugumisiriza oburemeezi obwaretsirweho ekibi.

Nikyoreka okwefeerereza kw’amaani. Baibuli neeyoreka ahabw’enki Ruhanga yaahaireyo omwana we nk’ekitambo: “Omuri eki nimwo okukunda kwa Ruhanga kwayorekyeirwe omuriitwe, obu yaatuma omwana we omwe nyamunegyere, ngu tube abahuriire ahabwe. Omuri eki nimwo okukunda kuri; tiitwe twakunzire Ruhanga, kureka niwe yaatukunzire.”​—1 Yohaana 4:9, 10.

Noobaasa kworeka ota ngu noosiima ekiconco eki ekirikukirayo? Ijuka ebi Yesu yaagambire omuri Yohaana 3:16 ahari kworeka ngu “orikumwikiriza” wenka niwe arijunwa. Omu Baibuli, okwikiriza “nikwo kuhamiza kimwe ebi twineho amatsiko.” (Abaheburaayo 11:1) Okugira obuhame nk’obu, twine kutunga okumanya okuhikire. N’ahabw’ekyo noohigwa kutunga obwire bw’okwega ahari Yehova Ruhanga, owaahaireyo ekiconco “ekihikire,” n’okamanya eki oine kukora kubaasa kutunga amagara agatahwaho agu ekitambo kya Yesu kirikukubaasisa kutunga.

Ebi noobaasa kubyega orikushwijuma ebiri aha mukura www.jw.org ebirikukwata aha Baibuli. Abajurizi ba Yehova nibashemererwa kukuhwera. Nituhamya ngu waagumizamu nooyega ebirikukwata aha kitambo kandi okagasirwa omu kitambo eki, noija kugira oti: “Ruhanga asiimwe, ahabwa Yesu Kristo Mukama waitu!”​—Abarooma 7:25.