Noobaasa Kutuura omu Nsi Ebiro Byona

AGA KA N’AMATSIKO GARIKUTANGAAZA! Omuhangi waitu naaturaganisa kutuha amagara agatahwaho aha omu nsi. Kwonka abaingi eki nikibagumira kukiikiriza. Nibagira ngu ‘buri omwe aine kuhitsya obwire akafa.’ Nibagira ngu ‘okubaho kandi okafa n’ekya butoosha.’ Abandi nibagira ngu okutuuraho ebiro byona nikibaasika, kwonka hatari aha omu nsi. Nibagira ngu omuntu naatunga amagara agatahwaho yaaheza kufa kandi akaza omu iguru. Iwe nooteekateeka ki?

Otakagarukiremu ekibuuzo ekyo, noobaasa kureeba oku Baibuli erikugarukamu ebibuuzo bishatu ebi: Oku omuntu ahangirwe nikworeka kuta obwire obu yaabaire aine kutuuraho? Ekigyendererwa kya Ruhanga eky’okubanza eki yaabaire ainiire ensi n’abantu ni kiiha? Okufa kukajanjaara kuta omu bantu?

OBUHANGWA BW’OMUNTU OBW’OMUTAANO

Omu bintu byona ebiine amagara ebi Ruhanga yaahangire omu nsi, abantu n’ab’omutaano. Mu muringo ki? Baibuli neeyoreka ngu abantu bonka nibo baahangirwe omu ‘kishushani’ kya Ruhanga n’omu muringo gwe. (Okutandika 1:26, 27) Eki nikimanyisa ki? Eki nikimanyisa ngu abantu bakaheebwa emitwarize erikushushana n’eya Ruhanga, nka rukundo n’oburingaaniza.

Kandi abantu baine okubaasa kw’okuteekateeka n’okumanya ekirungi n’ekibi n’ekyetengo ky’okumanya Ruhanga kandi bakagira omukago murungi nawe. Niyo nshonga ahabw’enki turikubaasa kushemezibwa ebyahangirwe, emizaano, ebyeshongoro, n’ebikwato. Okukira munonga abantu nibabaasa kugira omukago murungi n’Omuhangi. Emitwarize egi neereetera abantu kuba ab’omutaano aha byahangirwe ebindi byona ebiine amagara ebiri omu nsi.

N’ahabw’ekyo teekateeka ahari eki: Mbwenu shi Ruhanga akaba naija kuha abantu emitwarize y’omutaano egi, n’obwengye bw’okwongyera kugiboneza, ku araabe yaabaire naayenda ngu batuureho emyaka mikye? Amazima gari ngu Ruhanga akaha abantu emitwarize egi kugira ngu babaase kutuura omu nsi ebiro byona.

EKIGYENDERERWA KYA RUHANGA EKY’OKUBANZA

Kwonka abamwe nibagira ngu ti kigyendererwa kya Ruhanga abantu kutuura omu nsi ebiro byona. Nibagira ngu ensi ekahangwa etari y’okutuurwamu ebiro byona, beitu eri ey’okugyerezamu abantu kutooranamu abahikire kuza omu iguru kutuura na Ruhanga ebiro byona. Kwonka shi ekyo ku kiraabe kihikire, tikikaabaire nikimanyisa ngu Ruhanga niwe arikureetaho obubi n’okubonabona ebiri omu nsi? Eki kikaabaire nikitaanira kimwe n’emitwarize ei Ruhanga aine. Baibuli neemugambaho eti: “Emitwarize ye yoona n’ey’oburyo; ni Ruhanga ow’okwesigwa, otagira kutahikiirira; n’ow’amazima, kandi ohikiriire.”​—Eky’Ebiragiro 32:4.

Baibuli neeyoreka gye ekigyendererwa ky’okubanza eki Ruhanga yaabaire ainiire ensi erikugira eti: “Eiguru n’erya Mukama, kwonka ensi akagiha abantu.” (Zaaburi 115:16) Buzima Ruhanga akahanga ensi kuba eka nungi y’abantu ey’ebiro byona, akandi akatamu buri kimwe ekirikwetengyesa kubaasisa abantu kutuuraho ebiro byona.​—Okutandika 2:8, 9.

“Eiguru n’erya Mukama, kwonka ensi akagiha abantu.”​—Zaaburi 115:16

Kandi Baibuli neeyoreka gye ekigyendererwa eki Ruhanga ainiire abantu. Ruhanga akagambira omushaija n’omukazi ab’okubanza ati: “Mwijure ensi, ebe eyaanyu; mutegyekye . . . byona ebiine amagara ebirikwegyendesa ahansi.” (Okutandika 1:28) Ka baabaire baine omugisha gw’amaani ogw’okureeberera Paradiso kandi bakagihangusya ekabuga ensi yoona! Buzima, amatsiko agu Adamu na Haawa baabaire baine na baijukuru baabo, n’okutunga amagara agatahwaho omu nsi, beitu hatari mu iguru.

AHABW’ENKI NITUFA?

Mbwenu shi ahabw’enki nitufa? Baibuli neeyoreka ngu kimwe aha bihangirwe bya Ruhanga eby’omwoyo bwanyima ekyahindukire Sitaane kandi Omuregi, kikateeraho kutaahataaha omu ntebeekanisa ya Ruhanga omuri Edeni. Mu muringo ki?

Sitaane akabeihabeiha abazaire baitu ab’okubanza, Adamu na Haawa kumwegaitaho omu kugomera Ruhanga. Obu Sitaane yaagira ngu Ruhanga akaba abaimire obugabe bw’okwecweramu ekirungi n’ekibi, bakashagika Sitaane kandi baagomera Ruhanga. Hakarugamu ki? Bwanyima bakafa, nk’oku Ruhanga yaabaire abarabwire. Bakafeerwa amatsiko g’okutuura omu Paradiso omu nsi ebiro byona.​—Okutandika 2:17; 3:1-6; 5:5.

Adamu na Haawa bakagomera Ruhanga kandi eki kikakwata n’aha bantu boona kuhitsya n’obunaku obu. Ekigambo kya Ruhanga nikigira kiti: ‘Ekibi kikaija omu nsi ahabw’okushiisha kw’omuntu omwe [Adamu], kandi kikarugamu okufa, nikwo n’okufa kwabugire omu bantu boona.’ (Abarooma 5:12) Nitufa ahabw’okugira ngu tukahungura ekibi kuruga aha bazaire baitu ab’okubanza, beitu kutari kugira ngu n’entebeekanisa ya Ruhanga etarikwetegyerezibwa.

NOOBAASA KUTUURA OMU NSI EBIRO BYONA

Obugomi omu musiri Edeni tiburaremeise ekigyendererwa eki Ruhanga ainiire abantu n’ensi. Ahabw’okugira ngu Ruhanga aine oburingaaniza na rukundo akataho omuringo gw’okutujuna kuruga omu kibi n’okufa ebi twahungwire. Entumwa Paulo naashoboorora ati: “Ebihembo by’ekibi n’okufa, kwonka ekiconco kya Ruhanga n’amagara agatahwaho omuri Kristo Yesu Mukama waitu.” (Abarooma 6:23) Ekirikushemeza, Ruhanga “akahayo Omwana we omwe nyamunegyere [ou yaayehangiire Yesu Kristo], ngu omuntu weena orikumwikiriza arekye kuhwerekyerera, kureka atungye amagara agatahwaho.” (Yohaana 3:16) Yesu ahabw’okwehayo eyekundiire kuba ekitambo, akagaruraho byona ebi twafeereirwe kurabira omuri Adamu.a

Obwire butari bwa hare, ekigyendererwa kya Ruhanga eky’okuhindura ensi paradiso nikiija kuhikiirira. Naiwe noobaasa kugira ebiro birungi eby’omumaisho waagyendera aha kwehanangiriza kwa Yesu oku: “Mutaahire omu irembo erifunzire; ahakuba eirembo eririkutaasya omu kucwekyerera rigarami, n’omuhanda gwaryo guba muhango, kandi nabagutooramu baba baingi; kwonka eirembo eririkutaasya omu magara rifunzire, n’akahanda kaaryo kagumire, n’abakazoora baba bakye.” (Matayo 7:13, 14) Buzima, ebiro byawe by’omumaisho nibyegamira aha bi orikucwamu. Noija kucwamu ota?