Ruhanga Aine Esaasi?

EKI TURIKWEGYERA AHA BYAHANGIRWE

Esaasi nikimanyisa “okweta omu bigyere by’ondiijo kubaasa kumanya oku arikwehurira n’embeera ezi arikurabamu.” Omuhangu w’endwara z’emitwe, Dr.  Rick Hanson, naashoboorora ngu “esaasi nituzaarwa nazo.”

TEEKATEEKA AHARI EKI: Ahabw’enki turikubaasa kugirira abandi esaasi, omutwarize ogutainwe ebyahangirwe ebindi? Baibuli neeshoboorora ngu Ruhanga akahanga abantu omu kishushani kye. (Okutandika 1:26) Ahabw’okugira ngu tuhangirwe omu kishushani kya Ruhanga, nitubaasa kuteeraho kworeka emitwarize nk’eye. N’ahabw’ekyo, twagirira abandi esaasi, nituba nitutooreza Omuhangi waitu Yehova Ruhanga oine esaasi.​—Enfumu 14:31.

EKI BAIBULI ERIKUTWEGYESA AHA SAASI ZA RUHANGA

Ruhanga naatugirira esaasi kandi tarikwenda kureeba nitubonabona. Baibuli neegamba aha buhuuku bw’Abaisraeli omuri Misri n’ezindi mbeera zigumire omu ihamba kumara emyaka 40, eti: “Omu kubonabonesibwa kwabo kwona nawe akabonabonesibwa.” (Isaaya 63:9) Yetegyereze ngu Ruhanga akaba naamanya obusaasi bwabo, kandi akaba abasaasibwa. Akagira ati: “Nimmanya obusaasi bwabo.” (Okuruga 3:7) Ruhanga naagira ngu ‘orikubakoraho naaba akozire aha mboni y’eriisho rye.’ (Zekaria 2:8) Abandi baatukora kubi, Ruhanga naashasha naitwe.

Baibuli neetuhamiza ngu n’obu twakuba nitwecwera orubanja, kandi turikureeba ngu Ruhanga tashemereire kutugirira esaasi, “ni mukuru okukira emitima yaitu, kandi naamanya byona.” (1 Yohaana 3:19, 20) Ruhanga naatumanya gye kukira oku turikwemanya. Naamanya gye embeera zaitu, ebiteekateeko byaitu, n’enyehurira zaitu. Kandi atwiniire esaasi.

Ebyahandiikirwe nibituhamiza biti:

• ‘Noija kweta Mukama, akwetabe, omutakire, akuhuumurize ati: Ndi aha!’​—ISAAYA 58:9.

• “Ahakuba nimmanya ebi ndikubateekateekyera, eby’oburungi bitari eby’obubi, ngu mbone kubatamu amatsiko g’ebiribabaho bwanyima; nikwo Mukama arikugira. Obwo nibwo murintakira, mukaija mukanshaba, naanye nkabahurira.”​—YEREMIA 29:11, 12.

• “Ote amarira gangye omu cupa yaawe. Tigarahandiikirwe omu kitabo kyawe?”​—ZAABURI 56:8.

RUHANGA NAATUREEBA, NAATWETEGYEREZA, KANDI NAATUSAASIBWA

Mbwenu shi okumanya ngu Ruhanga naatusaasibwa nikituhwera kwemera embeera zigumire? Teekateeka aha kyahikire ahari Maria:

“Nkareeba ngu embeera zigumire, kandi tizirimu buringaaniza bwanyima y’okutunga obusaasi bw’okufeerwa mutabani wangye ow’emyaka 18 owaabaire amazire emyaka ebiri arwaire ekookoro. Nkagirira Yehova ekiniga ahabw’okutataaha omu nshonga akamukiza!

“Bwanyima y’emyaka mukaaga, munywani wangye omu kibiina oine embabazi akampurikiza ndikugamba enyehurira zangye ngu Yehova tarikunkunda. Bwanyima y’okumara eshaaha nyingi arikumpurikiza atarikunshara ekirimi, akajuriza ekyahandiikirwe ekyangumize. Akajuriza 1 Yohaana 3:19, 20, aharikugira hati: ‘Ruhanga ni mukuru okukira emitima yaitu, kandi naamanya byona.’ Akashoboorora ngu Yehova naayetegyereza amaganya gaitu.

“N’obu eki kiraabe kyabaireho, kikaba kingumiire kusingura ekiniga kyangye! Bwanyima nkashoma Zaaburi 94:19, aharikugira hati: ‘Ku nteekateeka bingi, naayemereza omutima, okuhuumuriza kwawe kugwisa gye amagara gangye.’ Okaba nooshusha ngu ebyahandiikirwe ebi bakabihandiikira nyowe! Nkarugaho naayetegyereza ngu nikireeta obugwagye kugambira Yehova obusaasi bwangye, ndikumanya ngu naampurira kandi naanyetegyereza.”

Ka nikigaruramu amaani kumanya ngu Ruhanga naatwetegyereza kandi naatugirira esaasi! Kwonka shi ahabw’enki hariho okubonabona kwingi? Mbwenu shi n’ahabw’okugira ngu Ruhanga naatufubira twakora ebibi? Ruhanga naija kumaraho okubonabona? Enshonga ezi niziija kugambwaho omu kicweka ekirikukurataho.