N’oha Orikureetaho Okubonabona?

Ku araabe atari Ruhanga, n’oha orikureetaho eibura ry’eby’okurya, obworo, entaro, endwara, n’ebihikiirizi? Ekigambo kya Ruhanga Baibuli, nikyoreka ebintu bishatu ebirikukira kureetera abantu kubonabona:

1. Okweyendeza, Omururu, na Rwango. “Omuntu naayekuriza ahari mugyenzi we kumukora kubi.” (Omubuurizi 8:9) Abantu obumwe nibabonabonesibwa bagyenzi baabo abatahikiriire, abarikweyendeza, nari enshaarizi.

2. Obunaku n’Ebihikiirizi. Abantu nibakira kubonabona ahabw’okugira ngu ‘boona nibahikwaho obunaku n’ebihikiirizi.’ (Omubuurizi 9:11) Ekirikumanyisa ngu abantu nibabaasa kubonabona baaba bari omu mwanya gugwire omu bwire bugwire, baatunga butandu, nari baakora ebintu batarikufayo, nari baakora enshobe.

3. Omutegyeki Mubi w’Ensi Egi. Baibuli neeyoreka ekintu kikuru ekirikureeta okubonabona. Neegira eti: “Ensi yoona ku eri omu butegyeki bw’Omubi ogwo.” (1 Yohaana 5:19) ‘Omubi ogwo’ ni Sitaane Omuregi, omu kubanza owaabaire ari maraika wa Ruhanga kwonka ‘otaragumire mu mazima.’ (Yohaana 8:44) Baamaraika abandi bakeegaita ahari Sitaane baagomera Ruhanga kubaasa kuhikiiriza ebyetengo byabo eby’okweyendeza, reero baahinduka baadaimoni. (Okutandika 6:1-5) Kuruga obu Sitaane na baadaimoni baagoma, batwire nibeetaatsya omu nshonga z’ensi egi. Kandi eki boongyeire kukikora omu bwire obu. Hati Omuregi aine ekiniga kingi, kandi naahabisa “ensi yoona,” ekireetsire “enaku” omu nsi. (Okushuuruurwa 12:9, 12) Buzima, Sitaane ni ngamba nyenka otaine saasi. Naatunga okushemererwa yaaba naabonabonesa abantu. Sitaane niwe arikureetera abantu kubonabona beitu atari Ruhanga.

TEEKATEEKA AHARI EKI: Ogwo oine omutima mubi, kandi orikukora ebibi niwe arikureetera abantu abataine rubanja kubonabona. Okutaana n’ekyo, Baibuli neegira ngu ‘Ruhanga ni rukundo.’ (1 Yohaana 4:8) Kuhikaana na rukundo ye, tarikubaasa kukora ebitahikire, kandi ow’obushoboorozi bwona tarikubaasa kukora kubi!​—Yobu 34:10.

Kwonka noobaasa kwebuuza oti: ‘Mbwenu shi ow’Obushoboorozi Bwona naija kwikiriza Sitaane kugumizamu n’obutegyeki bwe bubi kuhitsya ryari?’ Nk’oku twareeba, Ruhanga naayangira kimwe obubi, kandi okubonabona kwaitu nikumureetera obusaasi. Ekigambo kye nikituhiga kiti: “Mumwegyekyerere okushoberwa kwanyu kwona, ahabw’okuba naabataho omutima.” (1 Petero 5:7) Ruhanga naatukunda kandi aine amaani g’okwihaho okubonabona n’obutari buringaaniza, nk’oku ekicweka ekirikukurataho kiraashoboorore.a