Okuhika aha Mutima Abataine Diini

1. Ni mpinduka ki ebaireho omu bicweka ebimwe omu myaka ehingwire?

OKUMARA ebyasha bingi, abantu abarikukira obwingi omu nsi bakaba baine ediini ezi barikwikiriirizamu. Kwonka habaireho empinduka y’amaani omu myaka ehingwire. Abantu abataine diini nibeeyongyera kukanya. Nangwa, omu mahanga agamwe abantu abarikukira obwingi nibagira ngu tibaine diini.b—Mat. 24:12.

2. Ahabw’enki abantu baingi bataine diini?

² Ahabw’enki abantu abarikugira ngu tibaine diini barikweyongyera?c Bamwe nibabaasa kuba nibata omutima aha by’okweshemeza nari ebirikubeerarikiriza. (Luk. 8:14) Abamwe tibarikwikiriza ngu Ruhanga ariho. Abandi nibamwikiririzamu kwonka nibateekateeka ngu ediini obunaku obu ehangwiire, terikwetengyesa, terikwikirizana na saayansi, kandi teine buryo. Nibabaasa kuba nibahurira banywani baabo, abashomesa, nari abarikuhandiika aha mikura barikugira ngu ebintu bikabaho birikuruga omu bindi, kwonka batarikukira kuhurira enshonga ezirikubahamiza ngu Ruhanga ariho. Abandi batamirwe abeebembezi b’ediini abarikwebembeza okusherura esente n’obushoboorozi. Omu bicweka ebimwe, gavumenti zitaireho ebiragiro ebirikworeka oku ediini zishemereire kutwaza.

3. Ekigyendererwa ky’ekicweka eki ni kiiha?

³ Yesu akaturagiira ngu tugyende ‘omu mahanga goona, tuhindure abantu abeegi.’ (Mat. 28:19) Nitubaasa kuhwera tuta abataine diini kukunda Ruhanga n’okuba abeegi ba Kristo? Twine kumanya ngu omuringo ogu omuntu arikutwazamu twamubuurira nikurugiirira ahu yaakuriire. Nk’eky’okureeberaho, abantu abarikukoomoka Europe, omuringo ogu barikwakiiramu amazima nigubaasa kutaana n’abantu ba Asia. Ahabw’enki? Omuri Europe, baingi baine eki barikumanya omu Baibuli, kandi barahuriireho ngu Ruhanga akahanga ebintu byona. Kwonka omuri Asia, baingi nooshanga bataine ki barikumanya ahari Baibuli, kandi tibarikwikiriza ngu hariho Omuhangi. Ekigyendererwa ky’ekicweka eki n’okutuhwera kuhika aha mitima y’abu turikubuurira boona, n’obu baakuba nibaruga omu bicweka bitarikushushana.

GUMA OINE EMITEEKATEEKYERE MIRUNGI

4. Ahabw’enki turikubaasa kuguma twine emiteekateekyere mirungi?

⁴ Gira Emiteekateekyere Mirungi. Buri mwaka, abantu abataine diini nibahinduka Abajurizi ba Yehova. Baingi aharibo baine emitindo erikukwata aha micwe, kandi batamirwe oburyarya bw’ediini. Abandi nibaba baine emicwe mibi kandi nibaba baine kukora empinduka. Turikuhwerwa Yehova, nitubaasa kuhamya ngu nitwija kusherura abaine ekihika ky’okutunga amagara agatahwaho tubabone.—Byak. 13:48; 1 Tim. 2:3, 4.

5. Niki ekirikureetera abantu kukunda obutumwa bwaitu?

⁵ Ba Omunyambabazi Kandi Omwegyendesereza. Kaingi, abantu nibakunda obutumwa bwaitu, tihabw’ebi turikugamba, beitu ahabw’omuringo ogu turikugambamu. Nikibashemeza twabatwariza omu muringo gw’embabazi, ogw’obwegyendesereza, kandi ogurikworeka ngu nitubafaho. Titurikubagyemesereza kuhurikiza ebi turikubagambira. Kureka nituteeraho kwetegyereza ekirikubareetera kugira emiteekateekyere ei baine aha diini. Nk’eky’okureeberaho, nitwetegyereza ngu abamwe tibarikukunda kugaaniira n’abu batarikumanya aha bikwatiraine n’ediini. Abamwe nibateekateeka ngu okubuuza omuntu aha bikwatiraine na Ruhanga ti kihikire. Kwonka abandi okukira munonga nibatiina kuhemuka kubareeba nibeega Baibuli barikuhwerwa Abajurizi ba Yehova. Omu mbeera ezi zoona, nituteeraho kworeka ngu nitufayo aha nyehurira zaabo.—2 Tim. 2:24.

6. Entumwa Paulo akooreka ata ngu akaba naahindahindura omu nyanjura ze, kandi nitubaasa kumutooreza tuta?

⁶ Ebigambo nka “Baibuli,” “Ruhanga,” “okuhangwa,” nari “ediini” byaba bitarikushemeza ou turikugaaniira nawe, nitubaasa kukora ki? Nitubaasa kuhindura omuringo ogu turikubabuurira nk’oku entumwa Paulo yaakozire. Arikugamba n’Abayudaaya, akahikaanisa nabo ebiteekateeko aha Byahandiikirwe. Kwonka ku yaabaire naagaaniira n’Abagriika ahari Areopaago, tarajuriize Baibuli. (Byak. 17:2, 3, 22-31) Nitubaasa kutooreza tuta Paulo? Waabugana omuntu otarikwikiriiriza omu Baibuli, ni kirungi okutagijuriza waaba noogaaniira nawe. Waareeba ngu ou orikubuurira tikirikumushemeza abantu kumureeba orikumwegyesa Baibuli, teeraho kumworeka ebyahandiikirwe omu muringo ogutarikureebwa abandi butunu, nk’okukoresa esimu nari tabuleti.

7. Kurugiirira aha 1 Abakorinso 9:20-23, nituba twine kukora ki, kubaasa kutwaza nk’oku entumwa Paulo yaatwarize?

⁷ Yetegyereze Omuntu Kandi Omuhurikize. Twine kuteeraho kwetegyereza ekirikureetera abu turikubuurira kugira emiteekateekyere ei baine. (Enf. 20:5) Ka tugarukye tureebe eky’okureeberaho ky’entumwa Paulo. Akakurira omu Bayudaaya. Kwonka akaba aine kuhindura omuringo ogu arikubuuriramu Abanyamahanga, abaabaire nibamanya kakye nari bataine ki barikumanya ahari Yehova n’Ebyahandiikirwe. Nitubaasa kucondooza nari kubuuza abamazire obwire omu kibiina, kubaasa kwetegyereza gye enyehurira n’emiteekateekyere y’abantu b’omu kicweka kyaitu.—Shoma 1 Abakorinso 9:20-23.

8. Gumwe aha miringo y’okutandika kugaaniira n’abantu aha biri omu Baibuli ni guuha?

⁸ Ekigyendererwa kyaitu n’okusherura ‘abashemeire.’ (Mat. 10:11) Kubaasa kukora ekyo, twine kubuuza abantu eki barikuteekateeka reero tuhurikize gye. Ow’eishe-emwe omuri England naakira kubuuza abantu eki barikuteekateeka aha kugira eka erimu okushemererwa, okworora abaana n’oku turikubaasa kwemera obutari buringaaniza. Bwanyima y’okuhurikiza gye eki baagarukamu, naagira ati: “Niki eki orikuteekateeka aha buhabuzi obu obwahandiikirwe ira emyaka nka 2,000?” Reero abooreka ebyahandiikirwe ebi atebeekaniise aha simu ye, atagambire ekigambo “Baibuli.”

HIKA ABANTU AHA MUTIMA

9. Nitubaasa kuhwera tuta abantu abatarikwenda kugaaniira naitwe aha bikwatiraine na Ruhanga?

⁹ Nitubaasa kuhika abantu aha mutima abatarikwenda kugamba ahari Ruhanga turikugaaniira nabo aha bi barikukunda. Nk’eky’okureeberaho, baingi nibatangaara ku barikureeba ebintu ebitarakozirwe muntu. N’ahabw’ekyo nitubaasa kugira tuti: “Noobaasa kuba nookimanya ngu bingi ebi abanyasaayansi barikukora nibaba nibatooreza ebintu ebitwireho. Nk’eky’okureeberaho, abarikukora emizindaaro nibeegyera aha ku okutu kukozirwe, kandi abarikukora kamera nibeegyera aha ku eriisho rikozirwe. Waareeba ebintu ebitwireho nooteekateeka ki? Noogira ngu bikabaho bubaho, haine omuntu owaabikozire nari ekindi kintu?” Bwanyima y’okuhurikiza gye eki yaagarukamu, noobaasa kubuuza oti: “Abahangu ku barikukora ebintu barikwegyera aha riisho n’okutu noogira ngu nibaba nibeegyera ahari oha? Omuhandiiki omwe akahandiika ati: ‘Owaataireho okutu tarikuhurira? Owaahangire eriisho tarikureeba? Niwe ayegyesa abantu obwengye!’ Abanyasaayansi abamwe nibaikirizana n’ebigambo ebyo n’omu kuhangwa.” (Zab. 94:9, 10) Reero nitubaasa kumworeka vidiyo eri aha jw.org^® aha “Interviews and Experiences” omu ebicweka ebikurataine “Viewpoints on the Origin of Life.” (Za aha PUBLICATIONS > VIDEOS.) Nari nitubaasa kumuha akatabo Was Life Created? nari The Origin of Life—Five Questions Worth Asking.

10. Nitubaasa kutandika kugaaniira tuta n’omuntu otarikwenda kugamba ahari Ruhanga?

¹⁰ Abantu baingi nibenda ebiro birungi by’omumaisho. Kwonka, baingi nibatiina ngu ensi neija kucwekyerezibwa nari ngu neija kuba etarikubaasa kutuurwamu. Omureeberezi omwe orikutaayaayira ebibiina omuri Norway naagira ngu, abantu abatarikukunda kugaaniira ebirikukwata ahari Ruhanga, nibaba nibakunda kugaaniira aha mbeera ei ensi erimu. Bwanyima y’okubaramutsya, naagira ati: “Nooteekateeka ngu nitwija kugira ebiro birungi by’omumaisho? Amatsiko gaitu gari omu b’eby’obutegyeki, abanyasaayansi, nari omuntu ondiijo?” Bwanyima y’okuhurikiza gye, naashoma nari ajuriza ekyahandiikirwe ekirikugamba ahari nyentsya nungi. Bamwe nibabaasa kushemezibwa eki Baibuli erikugamba aha nsi egi okugumaho ebiro byona, kandi ngu abantu barungi nibaija kugituuramu obutwire bwona.—Zab. 37:29; Mub. 1:4.

11. Ahabw’enki twine kuteeraho kukoresa obukoryo butari bumwe kugaaniira n’abantu, kandi nitubaasa kutooreza tuta Paulo nk’oku kirikworekwa omu Abarooma 1:14-16?

¹¹ Ni kirungi kukoresa obukoryo butari bumwe kubuurira abantu. Ahabw’enki? Ahakuba abantu nibataana. Ekirikureetera omwe kukunda amazima tikyo kirikukora aha ndiijo. Abamwe nibakunda kugaaniira ahari Ruhanga n’ahari Baibuli, kwonka abandi nibenda ngu tubanze tugaaniire aha nshonga ezindi. Omu mbeera zoona, twine kukoresa buri mugisha kubuurira abantu b’emiringo yoona. (Shoma Abarooma 1:14-16.) Kwonka, twine kuguma nitwijuka ngu Yehova niwe arikureetera embibo y’amazima kukura omu mitima y’abarikukunda ebihikire.—1 Kor. 3:6, 7.

OKU TURIKUBAASA KUBUURIRA ABANTU BA ASIA

12. Nitubaasa kukora ki kubuurira abantu b’omuri Asia abataine eki barikumanya aha Muhangi?

¹² Omu nsi yoona, ababuurizi baingi nibabuurira abantu abarikuruga omu mahanga ga Asia, otwariiremu n’abo ab’omu mahanga ahu gavumenti zitaireho emihingo aha mirimo y’ediini. Omu mahanga maingi aga Asia, baingi tibakafayoga kumanya yaaba Omuhangi ariho. Bamwe nibabaasa kwikiriza kwega Baibuli barikwenda kumanya, kwonka abandi omu kubanza nibaba bataine kihika ky’okumanya ebintu bisya. Mbwenu shi nitubaasa kukora ki kubahwera? Ababuurizi abamwe bashangire ngu ni kirungi kubanza kubanywana, bakooreka ngu nibabafaho, reero omu bwire buhikire bakabashoboororera oku bagasiirwe ahabw’okugyendera aha misingye ya Baibuli.

13. Niki ekirikubaasa kureetera abantu kukunda amazima? (Reeba ekishushani ekiri aha mutwe.)

¹³ Abantu baingi nibakunda obuhabuzi bwa Baibuli oburikukora. (Mub. 7:12) Omuri New York, munyaanyazi-itwe orikukira kubuurira abarikugamba Mandarin naagira ati: “Niinteeraho kunywana abantu n’okubahurikiza. Ku ndikumanya ngu hariho abasya abaizire omu kicweka, nimbaasa kubabuuza nti: ‘Ekicweka kisya eki okishangire ota? Otungire omurimo gw’okukora? Ab’omu kicweka eki nibakutwariza gye?’” Obumwe okugaaniira oku nikubaasa kukureetera kugamba nabo aha nyegyesa za Baibuli. Omu bwire obuhikire, munyaanyazi-itwe naabaasa kubuuza ati: “Ni kintu ki ekikuru eki twine kukora kubaasa kugira omukago murungi n’abantu? Nimbaasa kukworeka enfumu emwe omu Baibuli? Neegira eti: ‘Okutandika entongane ni nk’okwigurira amaizi. N’ahabw’ekyo reka empaka zitakarugiremu okutongana.’ Nooteekateeka ngu obuhabuzi obu nibubaasa kutuhwera kukwatanisa n’abandi?” (Enf. 17:14) Okugaaniira nk’okwo nikubaasa kutuhwera kutunga abarikwenda kumanya ebirikukiraho.

14. Ow’eishe-emwe omwe omuri Asia naahwera ata abantu abarikugira ngu tibarikwikiririza omuri Ruhanga?

¹⁴ Kandi shi abo abarikutugira ngu tibarikwikiririza omuri Ruhanga? Ow’eishe-emwe omazire emyaka mingi naabuurira abantu abataine diini omuri Asia naashoboorora ati: “Kaingi, omuntu ku arikungira ngu, ‘tindikwikiririza omuri Ruhanga,’ naaba naamanyisa ngu tarikwikiririza omuri baaruhanga abu abantu abandi barikuramya. N’ahabw’ekyo ninkira kwikirizana nabo ngu abantu baingi nibakora baaruhanga baabo kandi n’ab’ebishuba. Ninkira kushoma Yeremia 16:20: ‘Nimugira ngu omuntu akaayekorera baaruhanga? Baaruhanga nk’abo ti baaruhanga!’ Reero mbuuza nti: ‘Nitutaanisa tuta Ruhanga ow’amazima na baaruhanga b’ebishuba?’ Nimpurikiza gye, reero nshoma Isaaya 41:23: ‘Mutuhanuurire ebiribaho bwanyima, tumanye ku muri baaruhanga buzima.’ Bwanyima ningamba ahari bimwe ebi Yehova yaagambire aha biro by’omumaisho bikahikiirira.”

15. Ow’eishe-emwe omu burugwa-izooba bwa Asia nitumwegyeraho ki?

¹⁵ Ow’eishe-emwe omu burugwa-izooba bwa Asia naakoresa akakoryo akari ahaifo ku arikugarukira omuntu. Naagira ati: “Nimbooreka obwengye oburi omu Baibuli, obunabi bw’omu Baibuli obwahikiriire n’ebiragiro by’obuhangwa. Reero mbooreka oku ebyo byona birikuhamya ngu hariho Omuhangi w’obwengye. Omuntu ku arikutandika kwetegyereza ngu Ruhanga ariho, niimworeka eki Baibuli erikugamba ahari Yehova.”

16. Kurugiirira aha Abaheburaayo 11:6, ahabw’enki abeegi ba Baibuli baine kwikiririza omuri Ruhanga na Baibuli, kandi nitubaasa kubahwera tuta?

¹⁶ Twaba nitwegyesa Baibuli omuntu otaine diini nari otarikwikiriza ngu Ruhanga ariho, twine kugumizamu nitumuhwera kwikiririza omuri Ruhanga. (Shoma Abaheburaayo 11:6.) Kandi twine kumuhwera kwikiririza omuri Baibuli. Eki nikibaasa kwetengyesa kuguma nitugarukamu amazima agamwe emirundi mingi. Buri kwegyesa omuntu Baibuli, nikibaasa kwetengyesa kugamba aha buhame oburikworeka ngu Baibuli n’Ekigambo kya Ruhanga. Eki nikibaasa kutwariramu okugamba kakye aha bunabi obwahikiriire, oku Baibuli erikuhikaana na saayansi n’ebyafaayo, n’oku erimu obuhabuzi bw’obwengye.

17. Abantu nibakwatwaho bata twayoreka ngu nitubakunda?

¹⁷ Nituhwera abantu kuba abeegi ba Kristo turikubagirira rukundo, yaaba baine ediini nari batagiine. (1 Kor. 13:1) Twaba nitubeegyesa, ekigyendererwa kyaitu n’okubooreka ngu Ruhanga naatukunda, kandi ngu naayenda tumukunde. Buri mwaka abantu baingi abaabaire nibamanya kakye nari bataine diini nibabatizibwa ahabw’okweyongyera kukunda Yehova. N’ahabw’ekyo, gira emiteekateekyere mirungi kandi yoreka ngu noofayo aha bantu b’emiringo yoona. Bahurikize gye. Teeraho kubeetegyereza. Beegyese kuba abeegi ba Kristo orikubateeraho eky’okureeberaho kirungi.