Tooreza Yesu omu Murimo gw’Okubuurira
1 Yesu akatuteeraho eky’okureeberaho eky’okukuratira omu murimo gwaitu ogw’okubuurira. Emirundi mingi n’omu miringo mingi, Yesu akooreka rukundo ye mpango ei ainiire Ruhanga n’abantu. Akeegyesa abacureezi amazima kandi yaahwera abaabaire baine enaku kandi bataine kihwera.—Mat. 9:35.
2 Eky’Okureeberaho kya Yesu Hamwe n’Enyegyesa Ze: Yesu taraikiriize ekintu kyona kumuhuzya, ka tugire nk’okwejumba omu by’obutegyeki nari omu mirimo y’okuhwera abantu kuba gye. Kandi taraikiriize okusherura ekindi kintu kyona ekitari kibi kumuhuzya ngu aruge aha murimo gwe omukuru. (Luka 8:1) Akahamira aha kubuurira amakuru marungi g’Obukama bwa Ruhanga arikworeka ngu nibwo bwonka oburimariraho kimwe oburemeezi bw’abantu. Yesu akaba aine omurimo mukuru ogw’okukora kwonka aine obwire bukye obw’okugukoreramu. Abantu omuri Kaperenaumu ku baayenzire ngu agume omu kibuga kyabo, Yesu akagambira abeegi be ati: “Tugyende ahandi . . . nayo mbuurireyo; ahakuba nikyo naiziriire.”—Mako 1:38.
3 Ku yaaherize kutendeka abeegi be, Yesu akabatuma, yaabaragiira ati: “Mugyende nimugamba muti: Obukama bw’omu iguru bwiriire haihi.” (Mat. 10:7) Akeegyesa abakuratsi be ngu bashemereire kwebembeza Obukama omu magara gaabo. (Mat. 6:33) Ebigambo bya Yesu ebi yaagambire aha muheru ari haihi kutemba omu iguru bikooreka gye eki baabaire baine kukora. Akagira ati: “N’ahabw’ekyo mugyende omu mahanga goona, muhindure abantu abeegi.”—Mat. 28:19.
4 Obukuru bw’Obukama: Ekintu ekikuru eki Yesu yaabaire naayegyesaho bukaba buri Obukama bwa Ruhanga, kandi akeehanangiriza abeegi be okukuratira eky’okureeberaho kye. Ebi abantu barikukora okushoboorora oburemeezi bwabo tibirikubaasa kubushoborora. (Yer. 10:23) Obukama bwa Ruhanga bwonka nibwo buraije kweza eiziina rya Ruhanga kandi bukamariraho kimwe oburemeezi bw’abantu. (Mat. 6:9, 10) Okwegyesa amazima g’Obukama abantu ‘abarikutsinda nibaborooga ahabw’ebihagaro byona ebirikukorwa,’ nikibahwera hati okugira amagara agarimu okushemererwa, n’okugira amatsiko gahamire aha biro by’omu maisho.—Ezk. 9:4.
5 Yesu nagumizamu kwejumba omu murimo gw’okubuurira amakuru marungi g’Obukama bwa Ruhanga, kandi naatuhamiza ngu naaza kuguma naatuhwera. (Mat. 28:20) Omu kubuurira kwaitu, nitutooreza Yesu kwingana ki? (1 Pet. 2:21) Omu biro bikuru ebi eby’emperu, ka tukore kyona eki turikubaasa okukuratira eky’okureeberaho eki Yesu yaatuteeraireho omu murimo gw’okubuurira!