Abantu Baaba Batari Muka
1. Ni buremeezi ki oburikukira kushangwa omu kubuurira enju aha ndiijo?
1 Omu bicweka bingi okushanga abantu omuka nikweyongyera kuguma. Omu ‘biro ebi eby’akabi’ baingi baine kukora eshaaha nyingi okubaasa kweyemerezaho. (2 Tim. 3:1) Abamwe nibabaasa kuba batari muka bagiire kurya empiiha ninga bagiire omu by’okweshemeza. Abantu nk’abo tukaabahitsyaho tuta amakuru marungi?
2. Nitubaasa kuhamya tuta ngu amaju agu tutarikushangamu muntu gaabuurirwamu?
2 Guma Ohandiike: Eky’okubanza n’okuhandiika amaju agu otaashangamu muntu. Eki ni kikuru na munonga ku oraabe noobuurira emirundi mingi omu kicweka eki ohairwe. Noohandika amaziina g’oruguuto enamba y’ekicweka eki ohairwe eiziina ryawe hamwe n’ebiro? Noobaasa kurekaho akaanya k’okuhandiikaho ebindi iwe nari ondiijo mubuurizi ku araagaruke kubuurira abu otarashangire muka. Ahanyima y’okubuurira ijuka kuheereza oine kaada y’ekicweka ekyo ebi ohandiikire okwihaho yaakwikiriza kugaruka ei otarashangire bantu. Handiika aha rupapura orundi abarikwenda kumanya ebirikukiraho abu oraije kugarukira.
3. N’enki eki turikubaasa kukora okuhika ahari abo abu tutarikushanga muka?
3 Garukayo omu Bwire Obundi: Obundi bamwe aha bu otarashangire muka aha mazooba agandi noobaasa kubashangamu omu mwabazyo nari Orwamukaaga na Sande. Noobaasa kutebeekanisa kugarukayo omu bwire oburungi? (1 Kor. 10:24) Waaba otabaasize shaba omubuurizi ondiijo kukugiira ei otarashangire bantu muka omu bwire obundi. Kyaba kitari ekyo noobaasa kuhandiikira abo abu otarashangiremu nari obateerere esimu. Ababuurizi abu amagara gaabo mabi gatarikubaikiriza kumara obwire buraingwa omu kubuurira enju aha ndiijo nibabaasa kukuhwera omuri eki.
4. N’enki ekirikworeka obukuru bw’okugaruka omu maka agu tutarikushangamu muntu?
4 Eky’okureeberaho kimwe nikyoreka obukuru bw’okuteeraho kugaruka omu maka agu tutarikushangamu muntu. Bwanyima y’ababuurizi kuguma nibaza omuka emwe kumara emyaka eshatu eizooba rimwe bakarugaho baashangamu omuntu. Kikeetegyerezibwa ngu okumara obwire obwo bwona akaba atuura ategyereize Omujurizi kumuhikaho kugira ngu agumizemu kwega Baibuli nk’oku yaabaire naakora atakafurukiire omu mwanya ogwo.
5. Ni ryari obu turikugira ngu tuherize ekicweka eki tuhairwe kubuuriramu?
5 Heza Ekicweka Eki Ohairwe: Ni ryari obu turikugira ngu tuherize ekicweka eki tuhairwe kubuuriramu? Okutwarira hamwe ni bwanyima y’okuteeraho kugira ou twahikaho omuri buri nju. Nikibaasa kuba kiri eky’oburyo omu muringo gw’obwengye okutsiga turakiti nari magaziini enkuru omu maka agu otaashangamu bantu na munonga omu myanya etarikukira kubuurirwamu. Omuntu ashemereire kuheza ekicweka eki ahairwe kubuuriramu omu myezi ena. Na bwanyima ashemereire kugaruriza ow’eishe-emwe orikukora aha by’omwanya ogu ekibiina kirikubuuriramu kaada y’ekicweka ekyo kugira ngu akyorekye omu bihandiiko by’ekibiina.
6. Ahabw’enki tushemereire kuteeraho kuhitsya amakuru marungi ahari buri omwe ori omu mwanya ogu turikubuuriramu?
6 Nitwenda ngu abantu baingi nk’oku kirikubaasika batunge omugisha gw’okwega kutakira eiziina rya Yehova kandi ngu bajunwe. (Rom. 10:13, 14) Aba barimu abarikuba batari muka obu turikuba nitubuurira enju aha ndiijo. Nk’entumwa Paulo ka kibe ekyetengo kyawe ‘okubuurira gye engiri y’embabazi za Ruhanga.’—Byak. 20:24.