Yegyesa Abaana Baawe Kuhimbisa Yehova
1. Abaana bato nibabaasa kuhimbisa Yehova?
1 Zaaburi 148:12, 13 nizihiga aboojo n’abaishiki ‘kuhimbisa eiziina rya Yehova.’ Ebyahandiikirwe birimu eby’okureeberaho bingi eby’abaana bato abaakozire ekyo. Nk’eky’okureeberaho, “Samueli akatandika kuheereza MUKAMA akiri omwana muto.” (1 Sam. 2:18) “Omwishiki muto” niwe yaagambiire muka Naamani ngu nabi wa Yehova omuri Israeli akaba naabaasa kutambira iba ebibembe. (2 Bag. 5:1-3) Obu Yesu yaataaha omuri hekalu kandi akakora eby’okutangaaza, ‘aboojo’ nibo baateire akaari barikugira, ‘Juna, nitushaba, Omwana wa Daudi!’ (Mat. 21:15) Abazaire nibabaasa bata kwegyesa abaana baabo okuhimbisa Yehova?
2. Ahabw’enki ni kikuru abazaire okuteeraho abaana baabo eky’okureeberaho kirungi?
2 Eky’Okureeberaho: B’ishe b’abaana omuri Israeli batakatandikire kwegyesa abaana baabo amazima, bakaragiirwa kubanza kukunda Yehova n’okuta ebiragiro bye aha mitima yaabo bo. (Bir. 6:5-9) Waaguma noogamba gye aha kubuurira kandi okakwejumbamu buri saabiiti, abaana baawe nibaija kutwara okubuurira nk’ekintu kikuru kandi ekirikureeta okumarwa.
3. Munyaanyaziitwe omwe akahwerwa ata eky’okureeberaho ky’abazaire be?
3 Munyaanyaziitwe omwe naagira ati: “Obu naabaire nkiri muto, kimwe aha bi twabaire tukora nk’eka n’okubuurira buri Rwamukaaga na Sande. Nkaba nindeeba ngu abazaire bangye nibakunda okubuurira. Tukakura nitukunda kubuurira.” Munyaanyaziitwe ogu akahinduka omubuurizi otakabatiziibwe, aine emyaka mushanju kandi hati yaahitsya emyaka 33 omu buheereza obw’obutwire.
4. Nikimanyisa ki okutendeka abaana mporampora?
4 Okutendeka Mporampora: Mwejumbe omu kubuurira n’abaana baanyu. Nibabaasa kuteera kodi, kuheereza ou mwashanga omuka egyo turakiti, nari kushoma ekyahandiikirwe. Eki nikiija kubareetera kwongyera kukunda okubuurira n’okugira obwesigye ngu nibabaasa kuhitsya aha bantu amakuru g’Obukama. Ku baragyende nibakura, okwejumba kwabo omu kubuurira nikwija kweyongyera. N’ahabw’ekyo, bahwere kweyongyera omu maisho n’okuteekateeka aha bigyendererwa eby’omwoyo ebi baakubaasa kugira.
5. N’enki ekirikwetengyesa omwana yaaza kwikirizibwa kuba omubuurizi otakabatiziibwe?
5 Oteziringa kugamba n’abareeberezi waaheza kureeba ngu abaana baawe bahikire kuba ababuurizi abatakabatiziibwe kandi n’abaana benyine baayoreka ngu nibakyenda. Okuhinduka ababuurizi nikwija kubahwera kwetegyereza gye ku baine obujunaanizibwa bw’okuhimbisa Yehova. Guma noijuka ngu tikirikwetengyesa omwana kubanza yaamanya nk’ebi ababuurizi abakuru abaabatiziibwe barikumanya okubaasa kuba omubuurizi. Omwana waawe naayetegyereza enyegyesa za Baibuli ezirikutandikirwaho? Naahikaanisa amagara ge n’emitindo ya Baibuli ey’emitwarize? Aine ekyetengo ky’okubuurira n’eky’okwemanyisa nk’Omujurizi wa Yehova? Ku kiraabe kiri kityo, abareeberezi nibabaasa kucwamu ngu ahikire kuba omubuurizi otakabatiziibwe.—Reeba akatabo Organized to Do Jehovah’s Will, rup. 79-82.
6. Abazaire ku barikutendeka abaana baabo, ni birungi ki ebirikurugamu?
6 Okwegyesa abaana kuhimbisa Yehova baihire aha mutima nikyetengyesa kutamu amaani. Kwonka, ti bintu bingi ebirikureetera abazaire okushemererwa nk’oku barikutunga baareeba abaana baabo nibakura omu by’omwoyo. Ekirikukiraho obukuru, Yehova naashemererwa, ku arikureeba abaana nibabuurira aha bikorwa bye ebirikutangaaza.