Mugumizemu ‘Nimwana Ebyana Bingi’
1 Arikugambira omu nfumu, Yesu akeegambaho nk’omuzaabibu ogw’amazima, Ishe nk’Omuhingi, kandi abakuratsi be abaashukirweho amajuta nk’amataagi g’emizaabibu agarikwana ebyana. Omu kugamba aha murimo gw’Omuhingi, Yesu akahamiiriza obukuru bw’okuguma tuhamiire aha muzaabibu. (Yoh. 15:1-4) Eki turikwega kiri ngu buri omwe oine omukago na Yehova ashemereire kuba nk’eitaagi erikwana ebyana bingi, ‘ery’omuzaabibu ogw’amazima,’ Yesu Kristo. Tushemereire kuguma nitwana omu bwingi “ebyana by’[o]mwoyo” hamwe n’eby’Obukama.—Gal. 5:22, 23; Mat. 24:14; 28:19, 20.
2 Ebyana by’Omwoyo: Okweyongyera kwaitu omu by’omwoyo nikubaasa kureebekyera aha ku turikworeka ebyana by’omwoyo. Nooteeraho kugira ebyana by’omwoyo wa Ruhanga orikushoma kandi orikucumitiriza aha Kigambo kye? (Fil. 1:9-11) Oteziringa kushaba kuheebwa omwoyo orikwera, orikubaasa kukuhwera kugira emitwarize erikuhaisa Yehova ekitiinisa kandi erikukuhwera kweyongyera kukura omu by’omwoyo.—Luka 11:13; Yoh. 13:35.
3 Okugira ebyana by’omwoyo nikwija kutuhwera kweyongyera kukora nk’abaheereza abeeziriki. Nk’eky’okureeberaho, okukunda n’okwikiriza nibituhiga kutunga obwire bw’okwejumba omu buheereza butoosha. Emitwarize nka obusingye, okugumisiriza, embabazi, obucureezi, n’okwerinda nibituhwera kugarukamu gye abarikutuhakanisa. Okushemererwa nikutubaasisa kutunga okumarwa omu buheereza nangwa n’obu abantu baakuba bataikiiriize amakuru marungi.
4 Ebyana by’Obukama: Nitwenda n’okwana ebyana by’Obukama. Ekyo nikitwariramu ‘okuhayo ekitambo ky’okumuhimbisa, nikwo kwatura eiziina rya Yehova n’eminwa yaitu.’ (Heb. 13:15) Nitukora eki twayezirikira kubuurira amakuru marungi. Nootaho agaawe goona okwana ebyana bingi by’Obukama orikwongyera kukora gye omu buheereza bwawe?
5 Yesu akooreka ngu abakuratsi be abeesigwa bakaba nibaija kwana ebyana bitarikwingana. (Mat. 13:23) N’ahabw’ekyo, titushemereire kwegyeragyeranisa n’abandi, kureka tushemereire kuheereza Yehova n’agaitu goona. (Gal. 6:4) Okweshwijuma turikukoresa Ekigambo kya Ruhanga, nikwija kutuhwera kugumizamu nituhimbisa Yehova ‘turikwana ebyana bingi.’—Yoh. 15:8.