Noobaasa Kutaaha omu ‘Muryango Muhango Ogw’Obuheereza’?
1. Ni ‘rwigi ki ruhango orw’obuheereza’ orutwiguriirweho?
1 Entumwa Paulo ku yaiguriirweho ‘orwigi ruhango kuza omu buheereza,’ n’ekihika akakoresa omugisha ogwo okushagika omurimo gw’okubuurira n’obu haraabe haabaire hariho baingi abaabaire nibamuhakanisa. (1 Kor. 16:9) Hati ababuurizi b’Obukama abarikurenga 642,000 omu nsi yoona bataahire omu buheereza obwo baahinduka baapayoniya.
2. Ahabw’enki ni kikuru okuguma nitweshwijuma?
2 Embeera Nizihinduka: N’obu twakuba tutarikubaasa kukora kihango hati, embeera nizihinduka. N’ahabw’ekyo, ni kirungi itwe okuguma nitweshwijuma, tukareka kutegyereza obu turaatungye obwire burungi. (Mub. 11:4) Ori omunyeeto ori haihi kuheza kushoma? Ori omuzaire oine abaana abari haihi kutandika ishomero? Ori haihi kuhuumura aha murimo? Empindahinduka nk’ezo nizibaasa kukuha obwire, bw’okukora nka payoniya. Munyaanyaziitwe owaabaire akira kurwararwara, akacwamu kukora nka payoniya aha myaka 89. Ahabw’enki? Ahabw’okugira ngu akaba arengize omwaka atarikuza omu irwariro, akakireeba ngu amagara ge gakaba nigabaasa kumwikiriza kukora nka payoniya.
3. Abamwe bakozire mpindahinduka ki okubaasa kuba baapayoniya?
3 Paulo, omu kubanza akaba naayenda kutaayaayira ab’eishe-emwe bataahi be omuri Korinso. Kwonka akahindura ahari puraani ye ahabw’amakuru marungi. Baingi abari baapayoniya hati bakakora empindahinduka nyingi okubaasa kuheereza nka baapayoniya. Abamwe babaasize kukora emirimo ya reija-reija okubaasa kutunga empiha nkye ez’okubareeberera. Batungire okushemererwa omu kuheereza. (1 Tim. 6:6-8) Bamwe aha bari omu bushwere bakozire empindahinduka kugira ngu omushaija abaase kuba niwe yaaguma naakora, reero omukazi we abaase kukora nka payoniya.
4. N’enki eki turikubaasa kukora ku turaabe tutarikuhamya ngu nitubaasa kuhitsya eshaaha za baapayoniya?
4 Otakaarahuka kugira ngu torikubaasa obwapayoniya ahabw’okuteekateeka ngu torikubaasa kuhitsya eshaaha. Nooyetenga nk’eshaaha ibiri n’ekicweka buri izooba. Ku oraabe otarikukihamya ngu noobubaasa, teeraho kukora nka payoniya omuhwezi okwezi kumwe nari ebiri, kwonka oine ekigyendererwa ky’okuhitsya eshaaha 70. Eki nikiija kukubaasisa kutunga ebirungi ebirikuruga omu kuba payoniya. (Zab. 34:8) Gambaho n’abo abarikukora nka baapayoniya hati. Nibabaasa kuba baarabire omu buremeezi nk’obwawe. (Enf. 15:22) Shaba Yehova akuhwere omu kuteeraho kwawe kwongyera aha buheereza bwawe.—1 Yoh. 5:14.
5. Ahabw’enki ni kirungi okuheereza nka payoniya?
5 Obuheereza Oburikurugamu Ebirungi: Okukora nka payoniya kurimu ebirungi bingi. Nikukubaasisa okutunga okushemererwa okurikuruga omu kwongyera aha buheereza bwawe. (Byak. 20:35) Okukora nka payoniya nikwija kukubaasisa kushoboorora gye Ekigambo kya Ruhanga eky’amazima. (2 Tim. 2:15) Nikiija kukubaasisa kureeba obuhwezi bwa Yehova omu bi orikukora. (Byak. 11:21; Fil. 4:11-13) Okukora nka payoniya kandi nikwija kukubaasisa kwana ebyana by’omwoyo, nka okugumisiriza, kandi nikwija n’okukubaasisa kwirira haihi Yehova. (Yak. 4:8) Noobaasa Kutaaha omu muryango muhango ogu ogw’obuheereza, okaba payoniya?