Oku Entebeekanisa y’Okushoma Ekitabo okw’Ekibiina Erikutuhwera
1. Enteerane itaano ezi turikugira buri saabiiti nizituhwera zita?
1 Buri rumwe aha nteerane itaano ezi turikugira buri saabiiti rwine ekigyendererwa kyarwo kandi n’orw’omutaano omu muringo gwarwo. Kwonka, zoona ni nkuru omu kutuhwera ‘kwezirikisana kukundana n’okukora ebirungi.’ (Heb. 10:24, 25) Ni birungi ki eby’omutaano ebiri omu ntebeekanisa y’Okushoma Ekitabo okw’Ekibiina?
2. Ni birungi ki ebirikuruga omu ruteerane orukye orw’okushoma ekitabo?
2 Neetuhwera Kuhama omu by’Omwoyo: Omubaro gw’abantu abarikwija omu ruteerane rw’okushoma ekitabo ni mukye munonga waagugyeragyeranisa n’ogw’abarikwija omu nteerane z’ekibiina ezindi. N’ahabw’ekyo nikitworobera kutunga abanywani abarikubaasa kutuhwera omu by’omwoyo. (Enf. 18:24) Waateireho kumanya gye buri omwe orikwija omu ruteerane oru orikuzamu kushomeramu ekitabo, obundi okashaba buri omwe kubuurira naiwe? Entebeekanisa y’okushoma ekitabo kandi neebaasisa omureeberezi orikwebembera okushoma ekitabo kumanya embeera za buri omwe omu kabiina ke n’okubaha obuhwezi.—Enf. 27:23.
3. Ahabw’enki nikyorobera omuntu kugarukamu ebibuuzo omu ruteerane orw’okushoma ekitabo okw’ekibiina, n’abarikwega Baibuli okurwijamu?
3 Waayetsire abu orikwegyesa Baibuli okuba naiwe omu kushoma ekitabo okw’ekibiina? Abarikukunda amazima abatarikwija omu nteerane zaitu ezindi ez’ekibiina, nibabaasa kutatiina kwija omu ruteerane orukye orw’okushoma ekitabo, okukira munonga rwaba ruri omu ka y’omuntu. Okufayo oku abarikurwijamu barikworeka nikuhwera abato n’abasya kwejumba omu kugarukamu ebibuuzo. Obu abantu barikuba bari bakye, nitugira omugisha gw’okugarukamu emirundi mingiho, tutyo omu muringo ogwo tuhimbisa Yehova.—Zab. 111:1.
4. Entebeekanisa y’okushoma ekitabo okw’ekibiina erimu birungi ki?
4 Okushoma ekitabo okw’ekibiina nikukira kuba kuri haingi omu mwanya ogu ekibiina kirikubuuriramu. N’obu kiraabe kitarikubaasika buri omwe kuza omu kushoma ekitabo okw’ekibiina omu mwanya ogumuri haihi, orugyendo rw’okuza ahu batutaire kushomera ekitabo nirubaasa kutaba ruraingwa nk’orw’okuza omu nteerane z’ekibiina ezindi. Omwanya gw’oruteerane orw’okushoma ekitabo okw’ekibiina nigubaasa n’okukoresibwa kugiriramu oruteerane rw’okwetebeekanisa kuza kubuurira.
5. Nitubaasa kutunga tuta obuhwezi omu kubuurira kuruga aha mureeberezi orikwebembera okushoma ekitabo?
5 Neetuhwera omu Kubuurira: Omureeberezi orikwebembera okushoma ekitabo okw’ekibiina naafayo kuhwera buri omwe okwejumba omu kubuurira butoosha n’okukutungamu okushemererwa. N’ahabw’ekyo, naateeraho kukora na buri omwe ori omu kabiina ako, atyo abahwera omu miringo y’okubuurira etari emwe. Ku oraabe nooshanga oburemeezi omu muringo gwona ogw’okubuurira, nk’okugarukayo kushomesa abarikwenda kumanya ebirikukiraho, manyisa orikwebembera okushoma ekitabo omu kabiina aku orimu. Obundi naabaasa kutebeekanisa kugira ngu obuurire n’omubuurizi omu kabiina ako, omazire obwire bwingi naabuurira. Noija kweyongyera kukora gye omu kwegyesa abantu Baibuli waata omutima aha miringo mirungi ei orikwebembera okushoma ekitabo arikwegyesamu.—1 Kor. 4:17.
6. Ahabw’enki tushemereire kuteeraho kureeba ngu twagasirwa entebeekanisa y’okushoma ekitabo okw’ekibiina?
6 Okushoma Ekitabo okw’Ekibiina ka n’entebeekanisa nungi! Entebeekanisa egi erikworeka rukundo ya Yehova neetuhwera kuguma nitugyenda omu maisho omu by’omwoyo omu bwire obu obw’oburemeezi obu turimu.—Zab. 26:12.