Branch Letter

Ahari Ababuurizi b’Obukama:

Nitwesiima okureeba oku omurimo gugyenzire omu maisho omuri East Africa omu mwaka gw’obuheereza ogwa 2007. Twine baapayoniya baingi ab’omutaano n’ab’obutwire omu kicweka kyaitu ekya East Africa, kandi nibahwera kihango omu murimo gw’okubuurira. Okwombekwa kwa ofiisi y’eitaagi omuri Tanzania nikugyenda gye omu maisho. Kikatushemeza munonga okureeba ofiisi y’eitaagi omuri Burundi, Rwanda na Uganda niziheebwayo Novemba 25, 2006, Desemba 2, 2006 na Jenwari 20, 2007, nk’oku zirikukuratana. Sudan ekahitsya omubaro musya ogw’ababuurizi 1,508 omuri Apuri. Nitwetenga kuguma nitushabira ab’eishe-emwe ab’omuri Eritrea. Ab’eishe-emwe 23 nibo bari omu kihome omuri Eritrea kandi abamwe bamaziremu emyaka erikurenga omuri 12.

Obupapura obwa Kingdom News Na. 37, “Omuheru gw’Ediini z’Ebishuba Guri Haihi!” oburikuhika omu bukaikuru, bukagabwa omu kicweka kyaitu kyona. Munyaanyaitwe omwe ow’omu United States owaabaire agarukire enyima omu by’omwoyo, ku yaashomire akapapura aka, akaburwa oturo. Sande eyaakuratsireho, akaija omu ruteerane kandi yaashaba kushomesibwa Baibuli. Abarikwenda kumanya ebirikukiraho bakaijuza akacweka akiri enyima ya Kingdom News kushaba akatabo Mugume Nimureeba! n’okwegyesibwa Baibuli.

Ekigyendererwa kya kampeyini nk’ezo n’okuhwera abarikwenda kumanya amazima kwega eki Baibuli buzima erikwegyesa. (Mat. 28:19, 20) Waaba noobuurira, ijuka kuhandiika owaayoreka okusiima weena, kandi ogarukeyo n’ekigyendererwa ky’okutandika kubegyesa Baibuli. Nikitushemeza okureeba ngu nitukorera hamwe naimwe omurimo ogu omukuru, kandi nitubahitsyaho rukundo yaitu.

Niitwe ab’eishe-emwe bataahi banyu,

Ofiisi ya Burundi, Kenya, Tanzania na Uganda