Huumuriza Abaine Obusaasi omu Mitima
1 Omu bwire obu, abantu nibeetenga munonga okuhuumurizibwa okukira oku kyabaire kiri ira. Turikukuratira eky’okureeberaho ky’Omugabe waitu, Kristo Yesu, naitwe nituteeraho “kushemba abacwekire emitima.”—Isa. 61:1.
2 Oku Twakubaasa Kukikora: Okubaasa kuhuumuriza abantu omu kubuurira kwaitu, tushemereire kukoresa enyanjura nungi kandi ezirikugaruramu amaani. Twagamba munonga aha mazima ga Baibuli n’aha matsiko gahamire agarikukwata aha bi Ruhanga aragaaniise, nituhuumuriza abantu okukira okugamba munonga aha bibi ebirikubaho omu nsi n’aha nyegyesa z’ebishuba. Eki tikirikumanyisa ngu titushemereire kugamba ahari Haramagedoni. Omurimo gwaitu n’okurangira abantu “omwaka gwa [Yehova] ogw’embabazi n’eizooba eri Ruhanga waitu arihooreraho enzigu,” hamwe ‘n’okwehanangiriza omubi kuruga omu muhanda gwe omubi.’ Kwonka okurabura abantu aha bikwatiraine na Haramagedoni n’aha ku ericwekyereza abantu tikushemereire kushweka omutwe gw’amakuru marungi ag’Obukama bwa Ruhanga.—Isa. 61:2; Ezk. 3:18; Mat. 24:14.
3 Enju aha Nju: N’ekya butoosha okushanga abantu abaine obusaasi ahabw’endwara, ahabw’okufeerwa abakundwa baabo, ahabw’entaatsya mbi n’ahabw’obutari buringaaniza. Itwe nk’abarikutooreza Kristo, ‘nitugirira esaasi’ abantu abu turikushanga twaba nitubuurira. (Luka 7:13; Rom. 12:15) N’obu turaabe nitubaasa kushomera omuntu ekyahandiikirwe kimwe nari bibiri ebirikukwata aha buremeezi bwe, tushemereire ‘kurahuka kuhurira,’ tutyo tukamwikiriza akagamba eki arikuteekateeka. (Yak. 1:19) Bwanyima y’okuhurira eki yaagamba, noobaasa kumanya oku oramuhuumurize gye.
4 Omu kugaaniira nawe, nitubaasa kumugira tuti, “Niinyenda kukworeka ebigambo ebirikugaruramu amaani kuruga omu Baibuli.” Koresa obwengye kugira ngu otahakanisa buri ki araagambe ekitahikire. Tushemereire kuta omutima aha kumugaruramu amaani n’okumuhuumuriza turikukoresa Ebyahandiikirwe okumugumya omutima. Aha bikwatiraine n’enshonga egi, reeba akatabo Reasoning From the Scriptures orupapura 117-121 ahansi y’omutwe “Okugumya.” Nari noobaasa kuha ou waashanga omu ka ka turakiti Comfort for the Depressed, reero mugambe aha birikugaruramu amaani ebikarimu.
5 Sherura Oku Waakuhuumuriza Abandi: Haine orikwetenga kuhuumurizibwa omu bu orikushoma nabo nari abu orikukora nabo, omu bataahi nari ab’omu ka yaanyu? Ahabw’enki otarikuteeraho kutaayaayira abantu nk’aba oine ekigyendererwa ky’okubahuumuriza kuruga omu Byahandiikirwe? Waaba noomanya ahabw’enki nibeetenga kuhuumurizibwa, nikikuhwera kwetebeekanisa kubahwera. Aha bikwatiraine n’enshonga egi, abamwe bakoreise amabaruha n’esimu. Okugirira bataahi baitu rukundo eya buzima nikutuhiga kubafaho n’okubahuumuriza turikwihirira omu Byahandiikirwe.—Luka 10:25-37.
6 Buzima, omurimo gwaitu n’okuhuumuriza abarikucura, abaine emitima eyijwire amaganya hamwe n’okubahwera kugira amatsiko aha biro by’omu maisho. Oku nikwo kuhuumurizibwa oku abantu omu nsi yoona barikwetenga. Okugamba n’amashemererwa aha bintu bingi ebi Ruhanga arikuraganisa nikwija kuhuumuriza ab’emitima egororokire kandi kubahe amatsiko. Ka tugume nitwijuka omugasho gw’okuhuumuriza abaine obusaasi omu mitima.