“Mwekorere Omugamba Gwangye”
1 Omu nsi egi eijwiremu oburemeezi hamwe n’okwerarikirira, tutungire obugwagye obwa buzima turikwikiriza okweta kwa Yesu kubaasa kutunga okuhuumura oku arikuha abantu. (Mat. 11:29, 30) Okwikiriza omugamba gw’okuba omwegi nikitwariramu okwejumba omu murimo ogutari gw’amaani kwonka, beitu ogurikugaruramu amaani. Nigutwariramu okubuurira amakuru marungi g’Obukama n’okuhwera abandi kugarukamu amaani nkaitwe, ahabw’okwekorera omugamba gwa Yesu ogwanguhi.—Mat. 24:14; 28:19, 20.
2 Okugarurwamu Amaani Ahabw’Okubuurira: Yesu tarashabire bakuratsi be kwekorera omugamba gwabo hamwe n’ogu yaakubahaire. Akabashaba ngu ogu baabaire baine oguremeire baguhaanisemu n’ogwe ogwanguhi. Titwakiine mugamba gw’okwerarikirira n’okutagira matsiko ebiri omu busingye obu; nari shi okukoreerera obutungi obutarikwesigwa. (Luka 21:34; 1 Tim. 6:17) N’obu turaabe twine bingi eby’okukora kandi twine kukora kubaasa kutunga ebi turikwetenga buri izooba, nitutwara okuramya Ruhanga nk’ekintu kikuru omu magara gaitu. (Mat. 6:33) Nitwija kushanga butoosha okubuurira kurikugaruramu amaani kandi kutarikuturusya, twaguma nitukutwara nk’ekintu kikuru.—Fil. 1:10.
3 Omu buhangwa, nitukunda kugamba aha bintu ebirungi ebi turikukunda. (Luka 6:45) Abakristaayo boona nibafayo munonga ahari Yehova n’aha migisha y’Obukama ei aragaaniise. Ka nikigaruramu amaani kugamba aha ‘ngiri y’ebintu birungi’ kandi tukareka kwerarikirira twaba turi omu kubuurira! (Rom. 10:15) Buzima, oku turikweyongyera kukora ekintu nikwo turikweyongyera kuba abahangu kandi tukeyongyera kutunga okushemererwa. N’ahabw’ekyo, twaba nitubaasa kwongyera aha bwire obu turikumara omu kubuurira, nikiija kwongyera aha mashemererwa agu twine. Okubuurira ka nikutugaruramu amaani abu turikubuurira ku barikwikiriza! (Byak. 15:3) Abu turikubuurira n’obu baakwanga nari bakatuhakanisa, okubuurira nikwija kutugaruramu amaani obwo twaijuka ngu okuteeraho kwaitu nikushemeza Yehova kandi ngu ebirungi byona ebirarugyemu n’ahabw’obuhwezi bwe.—Byak. 5:41; 1 Kor. 3:9.
4 Ku turikwikiriza okweta kwa Yesu, nitutunga omugisha gw’okuheereza nawe nk’Abajurizi ba Yehova. (Isa. 43:10; Kush. 1:5) Tihariho ekirikubaasa kutugaruramu amaani okukira ekyo!