Okwetebeekanisa—Ni Kikuru Twaba Nitugarukayo Aha Barikwenda Kumanya Ebirikukiraho
1. Omurimo gw’Ekikristaayo ogw’okubuurira ogwa ira gukaba niguza kweyongyerayo guta?
1 Yesu akatendeka gye abeegi be okubaasa kuba ababuurizi barungi ‘b’amakuru marungi g’obukama.’ (Mat. 4:23; 9:35) Yesu akabatendeka obu yaabaire naabuurira omuri Palestine. Kwonka, Yesu atakatembire omu iguru, akagira ngu omurimo gw’Ekikristaayo ogw’okubuurira gukaba nigwija kweyongyerayo okubaasa ‘kuhindura abantu b’amahanga goona abeegi.’—Mat. 28:19, 20.
2. Okworobera ekiragiro kya Yesu ‘eky’okuhindura abantu abeegi’ nikutwariramu ki?
2 Omurimo ogwo gukaba niguza kutwariramu okugarukayo aha bantu abaabaire nibaija kworeka ngu nibakunda amakuru marungi g’Obukama bwa Ruhanga bakabeegyesa kworobera byona ebi Kristo yaaragiire. Okubaasa kugarukayo tukahwera gye abantu abo, twine kuba twetebeekaniise gye.
3. Aha murundi gw’okubanza, noobaasa kureetera ota omuntu kwenda kumanya ebirikukiraho?
3 Tebeekanisa Kare: Ababuurizi abamwe nibateeraho kubuuza ekibuuzo baaba nibahendera okugaaniira n’omuntu omurundi gw’okubanza kandi baraganisa kugarukayo kukigarukamu. Bashangire ngu baaba bagarukireyo, nikibahwera kutandika kwegyesa omuntu Baibuli baakoresa ebiri omu katabo Eki Baibuli Erikwegyesa.
4. Ahabw’enki tutashemereire kutegyereza kubanza kutunga zaamagaziini ensya kubona kugarukayo aha bantu aboorekire ngu nibenda kumanya ebirikukiraho?
4 N’obu twakuba twine zaamagaziini ez’okwezi kumwe zonka, tikirikumanyisa ngu tushemereire kutegyereza okuhitsya twatunga ez’okwezi okundi kubona kugarukayo. Noobaasa kureetera omuntu kukunda kwega amazima murikugaaniira aha biri omuri zaamagaziini ezi waamutsigiire.
5. Ahabw’enki ni kikuru okugira ekigyendererwa twaba nitugarukayo aha bantu?
5 Gira Ekigyendererwa: Otakagarukireyo, twara edakiika nkye oyeijutsye ebi waahandiikire kandi oyetegyereze eki orikwenda kuhikiiriza. Nk’eky’okureeberaho, gamba aha nshonga eri omu katabo aku waamutsigiire. Nari mutsigire akatabo akandi akarimu ebirikukwata aha nshonga ei mwagaaniireho. Ku oraabe waabaire omutsigiire ekibuuzo, buzima noija kuba nooyenda kugarukamu ekibuuzo ekyo. Waaba noogamba aha kyahandikirwe ekirikushagika enshonga ei murikugaaniiraho, teeraho kukishoma omu Baibuli.
6. Nituba twine kigyendererwa ki omu kugarukayo aha boorekire ngu nibenda kumanya ebirikukiraho?
6 Ekigyendererwa Kyaitu: Buzima ekigyendererwa kyaitu n’okutandika kwegyesa omuntu Baibuli. Ow’eishe-emwe omwe akaba naayenda kutandika kwegyesa omushaija Baibuli obu yaagarukayo aha murundi gwa kabiri, kwonka omushaija akanga. Ow’eishe-emwe ogwo akagarukayo aine zaamagaziini ensya reero yaagira ati: “Turi omu kicweka eki kugarukamu ekibuuzo kimwe ekirikukwata ahari Baibuli.” Bwanyima y’okuhurira ebi omushaija ogwo yaagarukamu, akamushomera ekyahandiikirwe hamwe n’akacweka akarikukwatana nakyo akari omu katabo akarikukoresibwa omu kwegyesa abantu Baibuli. Ekyo kikamubaasisa kutandika kwega nawe Baibuli.
7. Okwetebeekanisa gye kukuhwereire kuta okutunga omuntu w’okwegyesa Baibuli?
7 Okutwara obwire tukeetebeekanisa kugarukayo aha bantu abarikwenda kumanya ebirikukiraho nikirugamu ebirungi. Okushemererwa kwaitu nikwija kweyongyera, kandi nitubaasa kugira omugisha gw’okuhwera ‘ab’emitima mirungi’ kuza omu muhanda gw’amagara.—Byak. 13:48, NW.