Branch Letter

Ababuurizi b’Obukama Abakundwa:

Kikaba nikigaruramu amaani okureeba ngu omu bwire bw’obutabanguko omu by’obutegyeki omuri Kenya, ab’eishe-emwe ab’enganda zitari zimwe bakagumizamu kworekana rukundo y’ab’eishe-emwe kandi abamwe bakatungira ab’eishe-emwe bagyenzi baabo ab’enganda ezindi oburaaro. Ripoota nizooreka ngu n’obu ab’eishe-emwe abamwe baahutaziibwe omu muhondano ogwo, tihariho w’eishe-emwe n’omwe owaafiire. Hakabaho okukwatanisa kw’amaani omu kwirukirira abaabaire nibeetenga obuhwezi. Ahi turikugambira, ab’eishe-emwe abaingi abaabaire bahungire baagarukire omu maka gaabo. Nitusiima Yehova ahabw’okutuhwera kwangira kimwe kugira orubaju omu rwanju rw’ensi, n’okuguma nitubuurira kandi nitwejumba omu nteerane enkye n’empango.​—Yoh. 15:19; Isa. 48:17, 18.

Ripoota ey’omurimo gw’okubuurira eya Burundi ey’omwaka gw’obuheereza oguhweire ni nungi munonga. Omu meezi mwenda ag’okubanza ag’omwaka gw’obuheereza oguhweire, ababuurizi bakeyongyeraho ebicweka mwenda ahari igana. Omu kwezi Kwakana, ebicweka 22 ahari igana eby’ababuurizi boona omu ihanga eri bakakora nka baapayoniya omu miringo etari emwe. Ebyombeko by’Obukama ebirikubamu n’enteerane empango, ekya kashatu n’ekya kana bikombekwa omuri Rushubi na Kinyinya. Kwonka hakiriho bingi eby’okukora omu murimo gwa Yehova.

Omuri Sudan, okwombeka eka y’Abamiisani omuri Juba kuriyo nikugyenda gye omu maisho. Ab’eishe-emwe baingi abaabaire bahungire Sudan bakagarukayo kandi bayakiirwa gye omu bibiina. Nitusiima Yehova ahabw’obugabe bw’okuramya obu tukyaine omuri Sudan.

Ab’eishe-emwe omuri Tanzania bakashemererwa munonga okutaaha omu ofiisi y’eitaagi ensya omu mwaka gw’obuheereza oguhweire. Hatariho kubanganisa eki nikiija kureetaho okweyongyera kw’ababuurizi omu ihanga eri.

Omuri Uganda, abantu bakakunda magaziini ey’abantu boona eya Omunaala gw’Omukuumi ey’Oluganda erikushohora omurundi gumwe omu meezi ana kandi neehwera munonga omu kubuurira. Okugira ofiisi z’abavunuuzi, ey’Oruchori n’Orunyankore aheeru ya ofiisi y’eitaagi kigasiire abavunuuzi hamwe n’ebibiina ebirikukoresa endimi ezo.

Nitushemererwa okubamanyisa ebyo. Twabaramutsya.

Niitwe ab’eisheemwe,

Ofiisi y’eitaagi eya Burundi, Kenya, Tanzania na Uganda