Okweyegyesa Baibuli Hamwe n’Okwega Baibuli okw’Eka Ni Kukuru!
1. Akakiiko Akareeberezi omu bwire obu nikatufaho mu muringo ki, kandi ahabw’enki?
1 Nk’oku kyabaire kiri omu kyasha ky’okubanza, Akakiiko Akareeberezi nikafayo munonga aha burungi bw’abantu ba Yehova obw’eby’omwoyo. (Byak. 15:6, 28) Nk’oku okubonabona kwingi kuriyo nikwirira haihi, ni kikuru munonga ngu buri mubuurizi w’Obukama agire na Yehova omukago guhamire. Nooza kukoresa ota obwire obu obaire noomara omu Kushoma Ekitabo okw’Ekibiina? Twena nituhigwa kukoresa obwire obwo omu kuramya kw’eka. Okukoresa gye obwire obu nikiija kutubaasisa kwongyera kwega n’okushwijuma Ekigambo kya Ruhanga n’okugasirwa omu bi kirikwegyesa.—Zab. 1:1-3; Rom. 11:33, 34.
2. Okuramya kwaitu okw’eka okw’omu mwabazyo nikubaasa kutebeekanisibwa kuta?
2 Obwire bw’Okuramya okw’Eka: Emitwe y’amaka nibahigwa kuhikiiriza obujunaanizibwa obu Yehova abahaire kuhamya ngu butoosha entebeekanisa y’okwega Baibuli okw’eka erikugasira boona yaakuratirwa. (Bir. 6:6, 7) Ab’eishe-emwe na banyaanyazi-itwe abatakataahire mu bushwere nibaija kukoresa obwire obu okweyegyesa Baibuli n’okucondooza. Ni kikuru twena ‘okwegurira obwire’ bw’okweshomesa n’okucumitiriza kugira ngu tugume tuhamire omu by’omwoyo omu ‘biro ebi ebibi.’—Efe. 5:15, 16, NW.
3, 4. Ni buhabuzi ki obwaheebwa aha bikwatiraine n’ebi turikubaasa kukoresa omu kwega, kandi nitubikoresa na kigyendererwa ki?
3 Eby’Okwegaho: Ekitabo Watch Tower Publications Index na Watchtower Library ey’ahari kompyuta nibibaasa kukuhwera kubona ebirikubaasa kushemeza boona omu kwega kwanyu okw’eka. Abaine amaka nibabaasa kukoresa ebiri ahansi y’emitwe nka “Ebirikubaasa Kureeta Okushemererwa omu Ka,” “Yegyesa Abaana Baawe,” na “Eby’Abaana Baitu Abato” ebirikukira kwizira omuri The Watchtower. Kandi, magaziini ya Awake! erimu ekicweka “Eminyeeto Neebuuza” hamwe n’ebindi bicweka birungi ebirikukwata aha byahangirwe ebirikutangaaza.
4 Mwashoma Baibuli kandi mukateekateeka munonga aha bi murikushoma, ekyo nikiija kuhwera buri omwe omu ka okugyendera aha misingye ya Ruhanga kandi akaguma naagiijuka. (Heb. 4:12) Obumwe, nimubaasa kureeba vidiyo y’ekibiina bwanyima mugigaaniireho. Hariho bingi ebi orikubaasa kutoorana kwegaho n’oku muraabyegeho. Ahabw’enki otarikubuuza ab’omu ka yaawe ebi barikwenda kwegaho n’oku barikwenda kubyegaho?
5. Ahabw’enki okweshomesa Baibuli hamwe n’okushoma Baibuli nk’eka kiri kikuru munonga ahariitwe omu bwire obu?
5 Enshonga Ahabw’enki Ni Kukuru Hati: Okuhamya omukago gwaitu hati nikwija kutubaasisa kwetebeekanisa ‘kwemerera tuhamire reero tukareeba okujuna kwa Yehova.’ (Kur. 14:13) Abazaire nibeetenga obuhwezi bwa Ruhanga kubaasa kukuriza abaana “ahagati y’ab’obusingye obukiikami oburikwehabagiza.” (Fil. 2:15) Abaana nibeetenga obuhwezi okubaasa kwetantara emicwe mibi erikweyongyera kakanya omu mashomero ebiro ebi. (Enf. 22:3, 6) Abashweraine bashemereire kuhamya ‘omurunga gwabo gw’enyabushatu’ na Yehova. (Mub. 4:12) N’ahabw’ekyo, ka tukorese gye obwire obutsigaireyo okweyombeka aha musingi ‘gw’okwikiriza kwaitu okurikwera munonga’!—Yuda 20.