Obukama bwa Ruhanga Nibwija Kutegyeka Ensi Ryari?

YESU AKAGIRA NGU HAKABA NIHAIJA KUBAHO BINTU KI?

Yesu akagira ati: ‘Eihanga niriija kuteera erindi ihanga n’obugabe nibwija kuteera obundi. Nihaija kubaho emitsitsa y’amaani, n’enjara [n’endwara z’amaani] omu myanya mingi.’ (Luka 21:10, 11) Nk’obusharashare bw’omu kiganja ky’engaro, ebintu ebi byona bikaba nibiija kukora akamanyiso akarikureebwa butunu. Kandi nk’oku ekinkumu kirikutaanisaho omuntu, ebintu ebi ebirikubaho hamwe nibyoreka ngu “Obukama bwa Ruhanga buri haihi.” Mbwenu shi ebintu ebi nibibaho hamwe kandi nibireebwa omu nsi yoona? Yetegyereze obuhame.

1. ENTARO

Omuri 1914, hakabaho orutaro orwajanjaire omu mahanga maingi omu byafaayo by’abantu byona! Ab’ebyafaayo nibakira kugamba ahari 1914 nk’omwaka ogwahindwire ebyafaayo by’abantu, ahakuba nirwo rutaro rw’ensi yoona orw’okubanza. Omu rutaro orwo nibwo baatandika kukoresa tanka endwani, bomu zaakajugujugu, embundu ezirikurekura amasasi gakurataine, omwika gw’obutwa, n’ebindi by’okurwanisa by’akabi kukira ira. Rukakuratirwa orutaro rw’ensi yoona orwa kabiri, obu baatandika kukoresa bomu zaarwatamigongo. Abantu batwire nibarwana entaro omu mwanya mingi kuruga 1914, kandi omu ntaro ezo hafeereiremu obukaikuru bw’abantu.

2. EMITSITSA

Buri mwaka nihabaho emitsitsa y’amaani nka 100 erikubaasa kureetaho “okusiisikara kw’amaani,” ekitabo Britannica Academic nikwo kirikugira. Ekitongore kya United States eky’okucondooza aha by’omu itaka nikigira ngu “kurugiirira aha byafaayo ebyabiikirwe (kuruga nka 1900), tutwire twine amatsiko ngu nihaija kubaho emitsitsa y’amaani nka 16 omu mwaka.” N’obu abamwe barikuteekateeka ngu tiharikubaho emitsitsa y’amaani, kandi ngu baine n’ebyoma ebirikubabaasisa kumanya obu omutsitsa gurikuza kubaho, amazima gari ngu, emitsitsa y’amaani omu nsi yoona neereeta okubonabona, kandi abantu nibafeerwa amagara gaabo omu mwanya mingi.

3. EIBURA RY’EBY’OKURYA

Nihabaho eibura ry’eby’okurya ahabw’entaro, obushomankuzi, entaatsya mbi, n’okukoresa kubi eby’obuhingi, nari okuremwa kwetebeekanisiza embeera mbi y’obwire. “Okushwijuma okwa 2018” kw’Ekitongore ky’Eby’okurya eky’Ensi Yoona nikugira kuti: “Omu nsi yoona, abantu 821 tibarikutunga eby’okurya, obukaikuru 124 tibaine by’okurya birikumara.” Okukuuhura kureeteire abaana nk’obukaikuru bushatu n’emitwaro ikumi kufa buri mwaka. Omu mwaka 2011, okukuuhura nikwo kwareeteire abaana nk’ebicweka 45 ahari igana kufa omu nsi yoona.

4. ENDWARA

Ekitabo ky’Ekitongore ky’Eby’amagara eky’Ensi Yoona nikigira kiti: “Ekyasha kya 21 kyaherize kubamu endwara z’amaani nyingi. Endwara eza ira nk’esheshe, omushwija gwa rukaka zigarukire, kandi haizireho ensya nk’okufundaana, tsinyiga z’amaani, Ebola na Zika.” Ekigwererezi kya COVID-19 nikyo kihererukire. N’obu abanyasaayansi n’abashaho baraabe beegire bingi ebirikukwata aha ndwara, tibabaasize kutunga emibazi y’endwara ezi zoona.

5. OMURIMO GW’OKUBUURIRA OMU NSI YOONA

Yesu akagamba aha kindi ekirikutwarirwa omu kamanyiso k’emperu obu yaagira ati: ‘Engiri egi ey’Obukama neija kugambwa omu nsi zoona okuba eky’okuhamya aha mahanga goona; obwo nibwo emperu eraahikye.’ (Matayo 24:14) N’obu abantu omu nsi baraabe baine oburemeezi bw’amaani, abantu abarikurenga obukaikuru munaana kuruga omu mahanga goona nibabuurira amakuru marungi g’Obukama bwa Ruhanga omu mahanga 240 omu ndimi ezirikurenga 1,000. Eki tikikabahoga omu byafaayo by’abantu.

AKAMANYISO AKA KATWINIIRE MAKURU KI?

Ebiri omu kamanyiso ebi Yesu yaagambireho biriyo nibibaho hati. Ahabw’enki twine kufayo kumanya ebirikukwata aha kamanyiso aka? N’ahabw’okuba Yesu akagira ati: “Ku murireeba ebyo nibibaho, mumanye ngu obukama bwa Ruhanga buri haihi.”​—Luka 21:31.

Akamanyiso aku Yesu yaagambire n’ebirikugambwaho omu Baibuli nibituhwera kwetegyereza ngu Ruhanga akataho Obukama bwe omu iguru omuri 1914.a Omu bwire obwo, akeemeka Omwana we, Yesu Kristo, kuba Omugabe. (Zaaburi 2:2, 4, 6-9) Juba Obukama bwa Ruhanga nibwija kutegyeka ensi, bumareho obutegyeki obw’abantu, reero buhindure ensi paradiso eraatuurwemu ebiro byona.

Omu bwire butari bwa hare, ebigambo by’okushaba kw’eky’okureeberaho oku Yesu yaayegyeise nibiija kuhikiirira: “Obukama bwawe bwije; ebi okunda bikorwe omu nsi nk’oku bikorwa omu iguru.” (Matayo 6:10) Kwonka shi Obukama butwire nibukora ki kuruga obu bwateebwaho 1914? Kandi niki eki turikubaasa kugirira ekihika ku buraatandikye kutegyeka abantu omu bwijwire?