Kampeyini y’Omutaano ey’Okweta Abantu aha Kiijutsyo!
1. Ababuurizi b’Obukama omu nsi yoona kutandika na Maaci 21, 2009, nibaija kwejumba omuri ki, kandi n’ahabw’enki?
1 Aha Rwakana ebiro 9, Apuri 2009, abaramya ba Yehova Ruhanga omu nsi yoona nibaija kuteeranira hamwe kwijuka ekikorwa kye kya rukundo aha bantu ekirikukirayo. (Rom. 5:6-8) Nituteekateeka ngu abantu nyamwingi nibaija kuba naitwe aha kwijuka okufa kwa Yesu. Obupapura obw’okweta abantu kwija aha Kiijutsyo nibwija kugabwa omu nsi yoona kutandika na Maaci 21.
2. Ni nshonga ki ezi oshemereire kuguma noijuka waaba noogaba obupapura bw’okweta abantu aha Kiijutsyo?
2 Ebi Tushemereire Kuguma Nitwijuka: Koresa gye eby’okureeberaho, ebibuuzo, n’ebyahandiikirwe ebyorekirwe aha kapapura ak’okweta abantu aha Kiijutsyo. Nk’eky’okureeberaho, noobaasakugamba aha kishushani ekiri aha mutwe gwako reero ogire oti: “Ninkweta kwija kuba naitwe aha kwijuka okufa kwa Yesu, aha Rwakana ebiro 9, Apuri 2009.” Reero omworekye omutwe gw’akapapura ako hamwe n’ebibuuzo ebiriho. Hamya ngu waagambira ou orikubuurira ngu naabaasa kweta n’ab’omu ka yaabo hamwe n’abandi abu araayende kweta.
3. Noobaasa kuguma nookora ki bwanyima y’okugabira abantu obupapura obw’okubeeta aha Kiijutsyo?
3 Ekibiina kyanyu kyaba kiine ekicweka kihango ky’okubuuriramu, abareeberezi nibabaasa kubashaba kutsiga obupapura obwo omu maka agu mutarashagyemu bantu. Ahari wiikenda, gaba obupapura obw’okweta abantu aha Kiijutsyo hamwe na zaamagaziini. Teeraho kweta abaayorekire ngu nibenda kumanya ebirikukiraho, abeegi ba Baibuli, abanyabuzaare, abu orikushoma nabo, abu orikukora nabo, abataahi n’abandi abu orikumanya. Omwaka oguhweire, munyaanyazi-itwe akeeta abanyabuzaare be 30 kandi yaaguma naabaijutsya obukuru bw’omukoro ogu. Ka yaashemereirwe okureeba ngu 25 aharibo bakaija kandi 4 baikiriza kwega Baibuli!
4. Ni ntebeekanisa ki ezi tushemereire kukora hati, kandi n’ahabw’enki?
4 Tebeekanisa Hati Kugyejumbamu: Ababuurizi baingi nibabaasa kwongyera aha shaaha ezi barikumara omu kubuurira omu kwezi kwa Kashatu n’Okwakana. Ku oraabe oine abaana nari abeegi ba Baibuli abarikweyongyera omu maisho omu by’omwoyo, obu nibubaasa kuba obwire burungi, bo kuhinduka ababuurizi abatabatiziibwe. Hati nibwo bwire bw’okutandika kukora entebeekanisa kwejumbira kimwe omu kampeyini egi ey’okumanyisa abantu ebikorwa bibiri ebya rukundo ebirikukirayo.—Yoh. 3:16; 15:13.