Noobaasa Kwongyera aha Buheereza Bwawe?
1. Ni murimo ki omukuru ogushemereire kukorwa hati kandi n’ahabw’enki guri mukuru?
1 Yesu ku yaareebire abantu baingi barikwenda kumanya amakuru marungi g’Obukama, yaagambira abeegi be ‘kushaba Mukama w’eigyesha kwohereza abagyesi omu by’okugyesha bye.’ (Mat. 9:37, 38) Obu turi omu bunaku oburikuhererukayo obw’ishaaruura, omurimo gwaitu ni mukuru kukira oku kiraabaire. Eki nikimanyisa ngu tushemereire kushaba Ruhanga tureebe oku turikubaasa kwejumbira kimwe omu kubuurira.—Yoh. 14:13, 14.
2. Abamwe bagyendeire bata aha kwetwa kw’okwejumba omu kushaarura?
2 Oku Turikubaasa Kwongyera aha Buheereza Baitu: Ahabw’obuhabuzi n’obuhwezi bwa Yehova, baingi babaasize kutandika kuheereza nka baapayoniya. (Zab. 26:2, 3; Fil. 4:6) Abandi baheereize nka baapayoniya abahwezi okwezi kumwe nari abiri omu mwaka. Eki kibabaasiise kwongyera aha buheereza bwabo. Okushemererwa oku batungire kuruga omu kukora nka baapayoniya abahwezi kureetaire bamwe omuri bo kutandika kuheereza nka baapayoniya.—Byak. 20:35.
3. Ku oraabe oraaheereizeho nka payoniya niki eki orikubaasa kuteekateekaho hati?
3 Noobaasa Kugaruka Kuheereza nka Payoniya?: Ku oraabe oraaheereizeho nka payoniya, hatariho kubangaanisa noijuka ebirungi ebi waatungire omu bunaku obwo. Waashabire Ruhanga aha bikwatiraine n’okugaruka kuheereza nka payoniya? Embeera ezaakureeteire kurekyeraho kuheereza nka payoniya noobaasa kushanga zitakikuremesa. Obu nibubaasa kuba obwire burungi obw’okugarukamu kuheereza nka payoniya.—1 Yoh. 5:14, 15.
4. Ni mugisha ki ogw’omutaano oguriho ahabwaitu twena?
4 Omurimo gw’okushaaruura guriyo nigugyenda gye omumaisho kandi guri haihi kuhwa. (Yoh. 4:35, 36) Twena ka tuteereho kweshwijuma kureeba yaaba nitubaasa kukora empindahinduka omu bi turikukora kubaasa kuheereza nka baapayoniya. Nari twareeba ngu buzima embeera zaitu tizirikutubaasisa, nitubaasa kureeba oku twakwongyera kubuurira gye? (Mak. 12:41-44) Ka n’omugisha ahari abo boona abu embeera zaabo zirikubaasisa kukoresibwa Yehova omu buheereza obu obw’omutaano!—Zab. 110:3.