Himbisa Yehova Buri Izooba
1. Abaheereza ba Ruhanga nibahigwa kukora ki, kandi n’ahabw’enki?
1 Omugabe Daudi akooreka ku amaririire kuhimbisa Yehova “buri izooba,” n’ebiro n’ebiro. (Zab. 145:2, 7, 21) Naitwe twine enshonga nungi erikutureetera kuhimbisa Yehova buri izooba.—Zab 37:10; 145:14, 18; 2 Pet. 3:13.
2. Amaka nigabaasa kuhimbisa Yehova gata buri izooba?
2 Omu Maka Gaitu: Twine ebitabo ebiteirwe kutuhwera omu kugaaniira aha by’omwoyo twaba nitushoma ekyahandiikirwe ekya buri izooba, omu Kuramya kw’Eka, kandi na twaba nitwetebeekanisiza enteerane z’ekibiina. Amaka maingi nigateeraho kuba hamwe aha byokurya haakiri omurundi gumwe buri izooba. Eki nikibabaasisa kuhikaanisa ebiteekateeko kandi kibaha n’omugisha gw’okuhimbisa Yehova. Okugaaniira nk’okwo okurikwebemberwa abazaire, nikubaasa kuba okw’omugasho omu kworora abaana baabo “barikubahana gye, kandi n’okubeegyeseza omuri Yehova.”—Efe. 6:4; Bir. 6:5-7.
3. Ni mugisha ki ogu turikuba twine twaba turi n’ab’eishe-emwe bagyenzi baitu?
3 Ori Hamwe n’Ab’eishe-emwe: Twaba turi omu kubuurira nari omu nteerane z’ekibiina, nituba twine omugisha muhango gw’okuhimbisa Yehova turi n’ab’eishe-emwe. (Enf. 15:30; Fil. 4:8; Heb. 13:15) Obu twena turikukunda Yehova, kishemereire kutworobera okworeka ngu nitusiima oburungi bwa Yehova twaba nitugaaniira n’ab’eishe-emwe bagyenzi baitu.—Zab. 106:1.
4. Ni mu myanya ki endiijo ei orikubaasa kuhimbisizamu Yehova?
4 Twaba Nitugamba n’Otari Mwikiriza: N’obu embeera zaakuba zitarikutubaasisa kwejumba omu kubuurira buri izooba, okubuurira abu turikukora nabo, abu turikushoma nabo, nari abandi ahari Yehova n’ebigyendererwa bye, nitubaasa kuhwera abacureezi kugira amatsiko. (Zab. 27:14; 1 Pet. 3:15) Munyaanyazi-itwe omwe akabaasa kubuurira omwe ou yaabaire ashutami nawe omu nyonyi kandi ogwo ou yaabuuriire akahuumurizibwa yaagarukwamu amaani ahabw’ebi yaahuriire kandi yaaha munyaanyazi-itwe endagiriro n’esimu kwenda ngu bagume nibagaaniira aha bintu ebyo. Nk’oku ensi erikweyongyera kusiisikara, abajurizi ba Yehova nibagumizamu barikureetera abacureezi ‘amakuru marungi g’ebintu ebirungi.’ Eki nikihwera abandi kugira amatsiko kandi kibahwera kuhimbisa Yehova.—Isa. 52:7; Rom. 15:11.
5. Ahabw’enki n’ekyetengo kyaitu kuhimbisa Yehova, kandi eki nikibaasa kuhikiiriza ki?
5 Ka nikishemeza Yehova okureeba abaheereza be nibamuhimbisa buri izooba! Nk’ebihangirwe bya Yehova ebirikureebwa ebitwehinguririize, naitwe buri izooba nitubaasa kumuhimbisa omu maka gaitu, omu kibiina, na twaba nitugamba n’abandi abatakahindukire baramya ba Yehova.—Zab. 19:1-4.