‘Omushana Gwanyu Gwakire Abantu’
1. Twine omugisha kukora ki?
1 Okuruga omu kasheeshe okuhitsya omu mwabazyo, ekyererezi kirungi ky’omushana nikihimbisisa Yehova Ruhanga. Kwonka omushana ogu Yesu yaagambiire abeegi be kugira, n’ogw’omutaano—“omushana gw’amagara.” (Yoh. 8:12) Okugira ekyererezi ky’eby’omwoyo n’omugisha gw’omutaano ogurikutwariramu obujunaanizibwa bw’amaani. Yesu akagira ati: ‘Omushana gwanyu gwake omu maisho g’abantu,’ kugira ngu gubaase kubagasira. (Mat. 5:16) Obu abantu baingi bari omu mwirima omu by’omwoyo omu bunaku obu, omushana ogu gwine kubaakira, kandi ekyo nikyetengyesa munonga hati. Nka Kristo, itwe nitubaasa kwakisa tuta omushana gwaitu?
2. Yesu akooreka ata obukuru bw’okureetera abandi ekyererezi ky’amazima?
2 Turikubuurira: Yesu akakoresa obwire bwe, amaani ge, n’ebi yaabaire aine okubaasa kureetera omushana gw’amazima kwakira abantu omu maka gaabo, omu nguuto, aha nshozi na hoona ahu baabaire nibabaasa kushangwa. Akaba naamanya obukuru bw’okuhwera abandi kutunga ekyererezi ky’eby’omwoyo ekihikire. (Yoh. 12:46) Okubaasa kuhika ahari baingi, Yesu akatebeekanisa abeegi be kuba “omushana gw’ensi.” (Mat. 5:14) Bakareetera omushana gwabo kwaka barikukorera bataahi baabo ebirungi kandi barikubabuurira amazima g’eby’omwoyo.
3. Nitubaasa kworeka tuta ngu buzima nitusiima omushana gw’amazima?
3 Abantu ba Ruhanga nibatwara obujunaanizibwa ‘bw’okugyenda nk’abaana b’omushana’ nka bukuru kandi nibabuurira ahu abantu barikubaasa kushangwa hoona. (Efe. 5:8) Okushomera Baibuli nari ebitabo ebindi eby’Ekikristaayo ahu abantu barikukureeba mwaba muri omu kahuumuro ah’eishomero nari aha murimo, nikibaasa kukuha omugisha gw’okugaaniira nabo aha Byahandiikirwe. Omu muringo nk’ogwo, munyaanyazi-itwe omwe muto akatandika kwegyesa omuntu Baibuli kandi akaha abeegi bagyenzi be 12 ebitabo.
4. Ahabw’enki ‘okwakisa omushana gwaitu’ kirikutwariramu emitwarize mirungi?
4 Turikugira Emitwarize Mirungi: Okwakisa omushana gwaitu nikitwariramu n’oku turikutwaza buri izooba. (Efe. 5:9) Aha murimo, ah’eishomero, n’omu myanya endiijo, emitwarize mirungi y’Abakristaayo neereebwa abandi kandi neebabaasisa kubuurira amazima ga Baibuli. (1 Pet. 2:12) Nk’eky’okureeberaho, emitwarize mirungi y’omwojo omwe w’emyaka etaano ekareetera omushomesa we kugambira abazaire b’omwana ogwo ati: “Tinkareebaga omwana w’emicwe mirungi nk’ogu!” Buzima okubuurira kwaitu n’emitwarize yaitu mirungi nibireetera abandi kukunda “omushana gw’amagara” kandi bireetera Ruhanga waitu kuhimbisibwa.