Akabokisi k’Ebibuuzo

◼ Tushemereire kushaba n’omwegi wa Baibuli omu buri mwanya ogu turikwegyeramu nawe?

Nikigasha munonga kutandika n’okushaba turikuza kwega n’omuntu Baibuli kandi tukahendera n’okushaba. Nitushaba Yehova kutuha omwoyo gwe gurikwera omu kwega okwo. (Luk. 11:13) Kandi ku turikushaba, omwegi waitu naamanya ngu okwega Baibuli ni kikuru kandi kimwegyesa n’oku aine kushaba. (Luk. 6:40) N’ahabw’ekyo, ni kirungi kutandika kushaba n’orikwega Baibuli ahonaaho otandikire kwega nawe. Kwonka obu embeera zitarikushushana, oine kukoresa okwetegyereza kucwamu yaaba oraashabe n’omwegi nk’ogwo.

Ekintu kimwe ekikuru eki oine kuteekateekaho n’omwanya ogu murikwegyeramu. Mwaba nimwegyera aheehereire, noobaasa kucwamu kushaba omu bugufu mutakatandikire na mwaheza kwega. Kwonka, okushaba kwaba nikubaasa kureetera abandi kwebuuza, nari kwaba nikubaasa kureetera omwegi kutehurira gye, nikibaasa kuba kirungi kutegyereza kuhitsya obu muraatandikye kwegyera omu mwanya ogwehereire. N’obu twakuba nitwega Baibuli n’omuntu mu mwanya ki, tushemereire kukoresa okwetegyereza kureeba yaaba twine kutandika nari kuhendera n’okushaba.—Reeba Our Kingdom Ministry aka Maaci 2005, orupapura 4.