Nooteeraho Kwegyesibwa Yehova nk’Oku Kirikubaasika?

1. Yehova naatwara ata okwegyesa abaheereza be?

¹ Yehova, ‘Omwegyesa waitu Omukuru,’ naayenda ngu twegyesibwe. (Isa. 30:20) Akatandika kwegyesa ku yaaherize kuhanga omwana we ow’omujigaijo. (Yoh. 8:28) Bwanyima ya Adamu kugoma, Yehova tararekyeire aho kwegyesa, beitu na rukundo akaguma naayegyesa abantu abatahikiriire.—Isa. 48:17, 18; 2 Tim. 3:14, 15.

2. Omu bunaku obu, ni kwegyesibwa ki okuriyo nikubaho?

² Omu bunaku obu, Yehova niwe arikwebembera okwegyesibwa okurikukirayo omu byafaayo. Nk’oku kyarangirwe Isaaya, obukaikuru bw’abantu omu nsi yoona nibahimintikira aha ‘rushozi rw’enju ya MUKAMA’ orw’akamanyiso. (Isa. 2:2) Ahabw’enki tushemereire kuhimintikira aha rushozi rw’enju ya Yehova? Kwegyesibwa emihanda ya Ruhanga, ekirikumanyisa okwegyesibwa Yehova! (Isa. 2:3) Omu mwaka gw’obuheereza 2010, Abajurizi ba Yehova bakamara eshaaha ezirikurenga akahumbi 1.6 barikubuurira n’okwegyesa abantu amazima ga Baibuli. Kandi, buri saabiiti nihabaho okwegyesibwa okw’eby’omwoyo omu bibiina ebirikurenga 105,000 omu nsi yoona, kandi ebitabo by’Ekikristaayo nibiteerwa omwambari omwesigwa kandi ow’obwengye omu ndimi ezirikurenga 500.

3. Iwe nk’omuntu ogasiirwe ota omu kwegyesibwa oku Yehova arikutuha?

³ Kugasirwemu: Okwegyesibwa oku Ruhanga atuhaire ka kutugasiire munonga! Twegire ngu Ruhanga aine eiziina kandi ngu naatufaho. (Zab. 83:18; 1 Pet. 5:6, 7) Tutungire eby’okugarukamu by’ebibuuzo ebimwe ebikuru omu magara: Ahabw’enki abantu nibabonabona kandi nibafa? Nitubaasa kutunga tuta okushemererwa okwabuzima? Ekigyendererwa ky’amagara niki? Yehova kandi atuhaire obuhabuzi oburikukwata aha micwe oburikutubaasisa kuba abasinguzi.—Yos. 1:8.

4. Ni kwegyesibwa kwa miringo ki okuriho oku abaheereza ba Ruhanga barikubaasa kwejumbamu kandi ahabw’enki tushemereire kuteeraho kwegyesibwa Yehova?

⁴ Ekindi, Yehova naataho okutendekwa kw’emiringo etari emwe n’emwe kuhwera bamwe aha baheereza be kwongyera aha buheereza bwabo. Aha rupapura 4-6 hariho emiringo y’okwegyesibwa ei bamwe barikubaasa kwejumbamu. N’obu embeera zaitu ziraabe zitarikutubaasisa kwejumba omu miringo yoona ey’okwegyesibwa eri aha mpapura ezo, nituteeraho kwejumbira kimwe omu kwegyesibwa oku Ruhanga arikutuha oku embeera zaitu zirikutubaasisa? Eminyeeto abarikukira kugyemeserezibwa abashomesa baabo n’abandi kutunga obwegyese bw’ensi obw’ahaiguru, nitubahiga kutaho ebigyendererwa by’omwoyo kandi bakejumba omu bwegyese oburikukirayo oburungi obu Yehova arikutuha? Okwegyesibwa Yehova nikiija kutuhwera kutunga okushemererwa hati n’amagara agatahwaho omu biro by’omumaisho.— Zab. 119:105; Yoh. 17:3.

Okwegyesibwa kw’Emiringo Etari Emwe n’Emwe Okuriho omu Kibiina kya Yehova

Okwegyesa Okushoma n’Okuhandiika

• Ekigyendererwa: Okwegyesa abantu okushoma n’okuhandiika kugira ngu kibabaasise kwejumba omu kweshomesa Baibuli n’omu kwegyesa abandi amazima.

• Obwire obu Kurikumara: Nikirugiirira aha kyetengo ky’ekibiina.

• Omwanya: Aha Kyombeko ky’Obukama.

• Abarikubaasa Kwegyesibwa: Ababuurizi boona n’abeegi ba Baibuli.

• Oku Orikubaasa Kubamu: Abareeberezi b’ekibiina nibo barikutebeekanisa okwegyesibwa okwo kurugiirira aha kyetengo ky’ekibiina kyanyu, kandi nibahiga boona abarikubaasa kugasirwa kukwejumbamu.

Eishomero ry’Obuheereza

• Ekigyendererwa: Kutendeka ababuurizi kwegyesa gye n’okubuurira gye amakuru marungi.

• Obwire obu Ririkumara: Tiriine bugarukiro.

• Omwanya: Aha Kyombeko ky’Obukama.

• Abarikubaasa Kurizamu: Ababuurizi boona hamwe n’abandi abarikwija omu nteerane butoosha abarikwikirizana n’ebi Baibuli erikwegyesa kandi emitwarize yaabo erikuhikaana n’emisingye y’Ekikristaayo.

• Oku Orikubaasa Kurizamu: Gamba n’omureeberezi orikwebembera Eishomero ry’Obuheereza.

Okwegyesibwa Orurimi Orundi

• Ekigyendererwa: Okwegyesa ababuurizi oku barikubaasa kubuurira amakuru marungi omu rurimi orundi.

• Obwire obu Kurikumara: Ameezi ana nari ataano. Okwegyesibwa okwo nikukira kubaho aha Rwamukaaga omu kasheeshe kumara eshaaha emwe nari ibiri.

• Omwanya: Nikukira kuba aha Kyombeko ky’Obukama ekiri haihi.

• Abarikubaasa Kubamu: Ababuurizi abarikukora gye omu by’omwoyo abarikwenda kubuurira ab’orurimi orundi.

• Oku Orikubaasa Kubamu: Okwegyesibwa okwo nikutebeekanisibwa ofiisi y’eitaagi kurugiirira aha kyetengo ekiriho omu kicweka.

Okwombeka Ebyombeko by’Obukama

• Ekigyendererwa: Okwombeka n’okuhunduuza Ebyombeko by’Obukama. Eri ti eishomero, kwonka omu ntebeekanisa egi abarikuba nibahwera nibeegyesibwa emyoga kugira ngu babaase kuhwera omu kwombeka okwo.

• Obwire obu Entebeekanisa Egi Erikumara: Nikirugiirira ahari ogwo orikuba naahwera.

• Omwanya: Omu buri kicweka ekirikureebererwa Akakiiko Akarikukora aha by’Okwombeka nari omu kicweka eki Guruupu Erikwombeka Ebyombeko by’Obukama erikuba erimu. Abahwezi abamwe nibabaasa kwetwa kuhwera omu kicweka kya hare ekibairemu ekihikiirizi.

• Ebirikwetengyesa: Abarikwenda kuhwera bashemereire kuba babatiziibwe kandi baine kwikirizibwa akakiiko k’abareeberezi. Nibabaasa kuba nibamanya kwombeka nari batarikukumanya.

• Oku Orikubaasa Kushaba: Ijuza foomu Kingdom Hall Volunteer Worker Questionnaire (S-82) nari Application for Kingdom Hall Construction Volunteer Program (A-25) ei orikuheebwa abareeberezi b’ekibiina kyawe.

Okwegyesibwa kw’Emiringo Etari Emwe n’Emwe Okuriho omu Kibiina kya Yehova

Eishomero ry’Obuheereza Erya Baapayoniya

• Ekigyendererwa: Kuhwera baapayoniya ‘kukora gye omurimo gw’obubuurizi.’—2 Tim. 4:5.

• Obwire obu Ririkumara: Saabiiti ibiri.

• Omwanya: Nigutooranwa ofiisi y’eitaagi; nirikira kuba aha Kyombeko ky’Obukama ekiri haihi.

• Ebirikwetengyesa: Oshemereire kuba oherize omwaka gumwe orikuheereza nka payoniya.

• Oku Orikubaasa Kurizamu: Baapayoniya abahikire kurizamu nibamanyisibwa omureeberezi w’ekyanga.

Eishomero ry’Ababeseeli Abasya

• Ekigyendererwa: Eishomero eri ritebeekanisiibwe kuhwera ababeseeli abasya kuba abasinguzi omu buheereza bwabo aha Beseeli.

• Obwire obu Ririkumara: Eshaaha emwe buri saabiiti kumara esaabiiti ikumi na mukaaga.

• Omwanya: Aha Beseeli.

• Ebirikwetengyesa: Oine kuba ori omubeseeli ow’obutwire nari omazire obwire buraingwa orikuhwera aha Beseeli (omwaka gumwe nari n’okukiraho).

• Oku Orikubaasa Kurizamu: Ababeseeli abahikire kurizamu nibaikirizibwa kurizamu.

Eishomero ry’Obuheereza bw’Obukama

• Ekigyendererwa: Okutendeka abareeberezi n’abaheereza kuhikiiriza gye obujunaanizibwa obu baine omu kibiina. (Byak. 20:28) Eishomero eri niribaho haahinguraho emyaka mikye okurugiirira aha kucwamu kw’Akakiiko Akareeberezi.

• Obwire obu Ririkumara: Omu myaka egi abareeberezi nibarizamu kumara eizooba rimwe n’ekicweka reero abaheereza barizamu eizooba rimwe.

• Omwanya: Nirikira kuba aha Kyombeko ky’Obukama ekiri haihi nari aha Kyombeko Ekirikubamu Enteerane Empango.

• Ebirikwetengyesa: Oine kuba ori omureeberezi nari omuheereza.

• Oku Orikubaasa Kubamu: Abareeberezi n’abaheereza abahikire kurizamu nibeetwa omureeberezi w’ekyanga.

Eishomero ry’Abareeberezi b’Ekibiinaa

• Ekigyendererwa: Kuhwera abareeberezi kuhikiiriza gye obujunaanizibwa bwabo omu kibiina.

• Obwire obu Ririkumara: Amazooba ataano.

• Omwanya: Ofiisi y’eitaagi niyo erikucwamu ei riraabe; nirikira kuba aha Kyombeko ky’Obukama ekiri haihi nari aha Kyombeko Ekirikubamu Enteerane Empango.

• Ebirikwetengyesa: Oine kuba ori omureeberezi.

• Oku Orikubaasa Kurizamu: Abareeberezi abahikire kuribamu nibeetwa ofiisi y’eitaagi.

Eishomero ry’Abareeberezi Abarikutaayaayira Ebibiina n’Abakazi Baabob

• Ekigyendererwa: Kuhwera abareeberezi b’ebyanga n’aba disiturikiti kwongyera kuheereza gye ebibiina n’okukora gye “omurimo gw’okubuurira n’okwegyesa” n’okureeberera gye obusyo obu baakwatsiibwe.—1 Tim. 5:17; 1 Pet. 5:2, 3.

• Obwire obu Ririkumara: Ameezi abiri.

• Omwanya: Ofiisi y’eitaagi niyo erikucwamu.

• Ebirikwetengyesa: Oine kuba ori omureeberezi w’ekyanga nari omureeberezi wa disiturikiti.

• Oku Orikubaasa Kurizamu: Abareeberezi abarikutaayaayira ebibiina n’abakazi baabo abahikire kurizamu nibeetwa ofiisi y’eitaagi.

Eishomero ry’Ab’eishe-emwe Abatakataahire omu Bushwerec

• Ekigyendererwa: Kutendeka abareeberezi n’abaheereza abatakataahire mu bushwere kwongyera kuheebwa obujunaanizibwa. Baingi aha barikutendekwa niboherezibwa kuheereza omu bicweka by’omu ihanga ryabo ebirikwetenga obuhwezi. Bakye nibabaasa kwoherezibwa omu ihanga erindi, baagambira ofiisi y’eitaagi ngu nibabaasa kuzayo.

• Obwire obu Ririkumara: Ameezi abiri.

• Omwanya: Ofiisi y’eitaagi niyo erikucwamu; nirikira kuba aha Kyombeko Ekirikubamu Enteerane Empango nari aha Kyombeko ky’Obukama.

• Ebirikwetengyesa: Ab’eishe-emwe abatakataahire omu bushwere abari ahagati y’emyaka 23 na 62 abaine amagara marungi abarikwenda kuheereza ab’eishe-emwe bagyenzi baabo n’okuheereza ei ababuurizi barikwetengwa munonga. (Mak. 10:29, 30) Baine kuba baherize emyaka ebiri barikuheereza nk’abareeberezi nari abaheereza.

• Oku Orikubaasa Kushaba: Eishomero eri omu ihanga ryanyu ryaba ririmu, oruteerane rw’abo abarikwenda kurizamu nirubaho aha ruteerane rw’ekyanga. Ebirikukiraho nibabimanyisibwa omu ruteerane orwo.

Eishomero ry’Abakristaayo Abashwerained

• Ekigyendererwa: Okutendeka abashweraine kugira ngu babaase kweyongyera kukorera Yehova hamwe n’ekibiina kye. Baingi ahari abo abarikutendekwa niboherezibwa ahu ababuurizi barikwetengwa munonga omu ihanga ryabo. Bakye nibabaasa kwoherezibwa omu ihanga erindi, baagambira ofiisi y’eitaagi ngu nibabaasa kuzayo.

• Obwire obu Ririkumara: Ameezi abiri.

• Omwanya: Bakye ababandize kutendekwa nibatendekyerwa aha Watchtower Educational Center omuri Patterson, New York, U.S.A. Bwanyima, eishomero eri niriija kuba niriba omu myanya etoorainwe ofiisi y’eitaagi, okukira munonga aha Kyombeko Ekirikubamu Enteerane Empango nari aha Kyombeko ky’Obukama.

• Ebirikwetengyesa: Abashweraine abari ahagati y’emyaka 25 na 50 abaine amagara marungi n’embeera erikubabaasisa kuheereza ahu ababuurizi barikwetengwa munonga kandi abaine emiteekateekyere nk’egi: “Ndi aha; ba niinye waatuma.” (Isa. 6:8) Ekindi, baine kuba bashweraine kumara emyaka ebiri n’okugarura ahaiguru kandi baine kuba baherize emyaka ebiri n’okukiraho omu buheereza bw’obutwire.

• Oku Orikubaasa Kushaba: Eishomero eri ryaba ririho omu ihanga ryanyu, oruteerane rw’abo abarikwenda kurizamu niruba aha ruteerane oruhango orw’ekiro kimwe. Ebirikukiraho nibabimanyisibwa omu ruteerane orwo.

Eishomero ry’Okutendeka Abamiisani

• Ekigyendererwa: Okutendeka baapayoniya n’abandi abari omu buheereza bw’obutwire kuheereza nk’abamiisani.

• Obwire obu Ririkumara: Ameezi ataano.

• Omwanya: Ahari Watchtower Educational Center, Patterson, New York, U.S.A.

• Ebirikwetengyesa: Abashweraine abaherize emyaka eshatu babatiziibwe kandi bari ahagati y’emyaka 21 na 38, baaba nibahayo okushaba kwabo omurundi gw’okubanza. Baine kuba nibagamba Orungyereza, baine kuba bashweraine kumara emyaka ebiri n’okugarura ahaiguru kandi baine kuba baherize emyaka ebiri n’okukiraho omu buheereza bw’obutwire. Abarikushaba baine kuba baine amagara marungi. Baapayoniya abarikuheereza omu ihanga erindi (otwariiremu n’abo abarikutwarwa nk’abamiisani); abareeberezi abarikutaayaayira ebibiina; Ababeseeli; n’abo abaagiire omu Eishomero ry’Okutendeka Abareeberezi n’Abaheereza Abatakataahire mu Bushwere, omu Eishomero ry’Ab’eishe-emwe Abatakataahire omu Bushwere, n’omu Eishomero ry’Abakristaayo Abashweraine nabo nibabaasa kushaba baaba baine ebirikwetengyesa.

• Oku Orikubaasa Kushaba: Omu mahanga agatoorainwe, oruteerane rw’abo abarikwenda kuza omu ishomero eri niruba aha ruteerane oruhango orw’ebiro bishatu. Ebirikukiraho nibabimanyisibwa omu ruteerane orwo. Haaba hatabaireho oruteerane oru omu ihanga ryanyu kandi orikwenda kushaba, noobaasa kuhandiikira ofiisi yaanyu y’eitaagi kumanya ebirikukiraho.

Eishomero ry’Okutendeka ab’Akakiiko k’Eitaagi n’Abakazi Baabo

• Ekigyendererwa: Kuhwera abo abarikuheereza aha Kakiiko ka Ofiisi y’Eitaagi kwongyera kukora omurimo gwabo ogw’okureeberera Beseeli, n’okufayo aha nshonga ezirikukwata aha bibiina, n’okureeberera omurimo ogurikukorwa abareeberezi b’ebyanga n’aba disiturikiti omu bicweka byabo, hamwe n’omurimo gw’okuvunuura, okuteera ebitabo n’okubyohereza n’okureeberera emirimo y’obuheereza endiijo.—Luk. 12:48b.

• Obwire obu Ririkumara: Ameezi abari.

• Omwanya: Aha Watchtower Educational Center, Patterson, New York, U.S.A.

• Ebirikwetengyesa: Abari aha Kakiiko k’Eitaagi nari k’Eihanga nari abatoorainwe kutendekwa kuheereza nkabo.

• Oku Orikubaasa Kurizamu: Ab’eishe-emwe abahikire Kurizamu n’abakazi baabo nibeetwa Akakiiko Akareeberezi.

[Ebigambo aha kanyonyoozi]