Rinda Omuntu Waawe w’Omunda
1. Omutwe gw’oruteerane orw’ekiro kimwe orw’omwaka gw’obuheereza 2013 ni guuha, kandi rutebeekanisiibwe ahabwa kigyendererwa ki?
1 Buri izooba nitubugana ebintu ebirikubaasa kureetera omuntu waitu w’omunda kusiisikara. Niyo nshonga ahabw’enki omu omwaka gw’obuheereza 2013 nihaija kubaho oruteerane orw’ekiro kimwe orwine omutwe, “Rinda Omuntu Waawe w’Omunda.” (1 Tim. 1:19) Enteerane ezi niziija kutandika Sebutemba 1, 2012. Oruteerane orwo rutebeekanisiibwe kuhwera buri omwe ahariitwe kweshwijuma akareeba oku arikukoresa ekiconco eki eky’omuhendo kuruga ahari Ruhanga.
2. Ni bibuuzo ki ebikuru ebirikuza kugarukwamu omu ruteerane orw’ekiro kimwe?
2 Yetegyereze Oku Ebibuuzo Ebiri Ahaifo Biraagarukwemu: Omu ruteerane oru ebibuuzo mushanju ebikuru ebirikukwata aha muntu w’omunda nibiija kugarukwamu:
• Ni bintu ki ebirikubaasa kushiisha omuntu waitu w’omunda?
• Nitubaasa kutendeka tuta omuntu waitu w’omunda?
• Nitubaasa kuba mwere tuta tutagiirweho rubanja rw’eshagama y’abantu boona?
• Emiteekateekyere yaitu n’oku turikugyendera aha misingye ya Baibuli nibyoreka ngu turi bantu ba muringo ki?
• Omu bintu ebi twine kucwamu turikwihirira aha muntu waitu w’omunda, nitubaasa kwetantara tuta kuteeza abandi entsibo?
• Eminyeeto nimubaasa kwangira muta okugyemeserezibwa kuhenda emisingye ya Baibuli?
• Abo abarikugyendera aha muntu waabo w’omunda otendekirwe gye nibatunga birungi ki?
3. Nitubaasa kugasirwa tuta omu ruteerane orw’ekiro kimwe?
3 Turikuhwerwa Yehova nitubaasa kwangira okuteeraho kwa Sitaane kushiisha omuntu waitu w’omunda. Kurabira omu Kigambo kye n’ekibiina kye, tataitwe ow’omu iguru naatugambira ati: “Ogu nigwo muhanda, mube nigwo mwahamya.” (Isa. 30:21) Oruteerane oru n’omuringo gumwe ogu Yehova arikukoresa kutuha obuhabuzi. N’ahabw’ekyo, kora entebeekanisa kugira ngu otafeerwa orubazo na rumwe aha ziraaheebwe. Hurikiza gye, kandi fayo kureeba oku oraagyendere aha buhabuzi oburaheebwe. Nk’eka mugaaniire aha biraagambweho omu ruteerane orwo. Twagyendera aha buhabuzi oburikutuheebwa, nikiija kutuhwera kugumizamu twine ‘omutima ogutarikweshinja’ nari omuntu w’omunda omurungi kandi kituhwere kutatwarwatwarwa ebintu by’ensi ya Sitaane, ekyo kikashiisha omukago gwaitu na Yehova.—1 Pet. 3:16.