Noobaasa Kwejumba omu Kubuurira omu Mwabazyo?
1. Kurugiirira aha muhandiiki omwe, ni ryari obu Paulo yaabaire abuurira enju aha nju?
1 Okurugiirira aha kitabo Daily Life in Bible Times, entumwa Paulo akaba akira kubuurira enju aha nju “kuruga 10:00 z’omwabazyo okuhitsya nyekiro.” Titurikumanya yaaba Paulo yaabaire akuratira entebeekanisa egi butoosha, kwonka nitumanya ngu akaba aba ayeteekateekire kukora ‘byona ahabw’amakuru marungi.’ (1 Kor. 9:19-23) Eki nikibaasa kuba kyabaire nikitwariramu okwetebeekanisa kubuurira enju aha nju obu abantu baabaire nibabaasa kushangwayo.
2. Ahabw’enki omu mwabazyo buri obwire burungi bw’okubuurira?
2 Omu bicweka bingi ahagati ya saabiiti, ababuurizi nibakira kubuurira enju aha nju omu kasheeshe. Kwonka omu kicweka kyanyu omwabazyo nibwo bwire burungi bw’okubuurira? Payoniya omwe akagira ati: “Kigumire omu ihangwe kushanga abantu omuka. Kwonka abantu baingi nibakira kushangwayo omu mwabazyo.” Waabuurira omu mwabazyo noobaasa kubuurira abashaija amakuru marungi. Abantu baingi omu bwire obwo nibaba baine obwire barikubaasa kugaaniira naitwe. Kyaba nikyetengyesa, abareeberezi baine kutaho enteerane z’okwetebeekanisa kuza kubuurira omu mwabazyo.
3. Nitubaasa kukoresa tuta okwetegyereza twaba nitubuurira omu mwabazyo?
3 Koresa Okwetegyereza: Waaba noobuurira omu mwabazyo ni kikuru kukoresa okwetegyereza. Nk’eky’okureeberaho, waashanga omuntu naarya, nikiba kiri kirungi kumugambira ngu noija kugaruka obundi. Waiguza aha rwigi, yemerera ahu omuntu arikubaasa kukureeba, reero orahuke kumugambira ekyakureeta. Kandi otakaabuurira okahitsya obu burikuba nibutandika kwira munonga. (2 Kor. 6:3) Yetantare kubuurira omu myanya erikubaasa kuba ey’akabi, bwaba nibutandika kwira.—Enf. 22:3.
4. Ni birungi ki ebirikuruga omu kubuurira omu mwabazyo?
4 Ebirungi Ebirikurugamu: Ku turikushanga abantu omuka tukabuurira nitutunga okushemererwa. Ku turaagume nitubuurira abantu nikiija kutubaasisa kuhwera abandi ‘kujunwa, bakamanyira kimwe amazima.’ (1 Tim. 2:3, 4) Noobaasa kukora entebeekanisa kugira ngu oyejumbe omu kubuurira omu mwabazyo?