Tunga Okushemererwa Ahabw’Okukora n’Amaani
1. Niki ekirikubaasa kutuubya obweziriki bwaitu omu kubuurira?
1 Omuntu akahangwa arikubaasa ‘kutunga okushemererwa omu bi afeereire kubi.’ (Mub. 2:24) Kwonka, twaba tutatungire ebirungi omu kubuurira, ekyo nikibaasa kutumaramu amaani kandi kituubye n’obweziriki bwaitu. Niki ekirikubaasa kutuhwera kuguma twine emiteekateekyere mirungi?
2. Ahabw’enki tushemereire kugira emiteekateekyere mirungi n’obu abantu baakuba batarikuhurikiza omu kubuurira?
2 Gira Emiteekateekyere Mirungi: Ijuka ngu abantu bakye nibo baahurikiize Yesu kwonka omurimo gwe gw’okubuurira akaguhikiiriza. (Yoh. 17:4) Omu ky’okureeberaho kye eky’omubibi, Yesu akagira ngu abantu baingi bakaba batarikwija kwikiriza amakuru marungi g’Obukama. (Mat. 13:3-8, 18-22) Kwonka, okuteeraho kwaitu nikwija kurugamu ebirungi bingi.
3. Nitubaasa ‘kwana ebyana’ tuta n’obu abantu baakuba batarikuhurikiza omu kubuurira?
3 Oku Turikwana Ebyana Bingi: Okurugiirira aha ky’okureeberaho kya Yesu, abo abaakwikiriize amakuru amarungi ‘bakaayanire ebyana.’ (Mat. 13:23) Embibo ku erikuheza kumera ekakura, ebyana ebi erikwana t’ebyo ebirikugirugamu kureka n’embibo ensya. N’ahabw’ekyo ebyana ebi Abakristaayo barikwana tikirikumanyisa okuhindura abantu abeegi kwonka, kureka okugumizamu nitubiba embibo nyingi turikubuurira aha Bukama. Eki nikirugamu “ebirungi” bingi ebirikubaasa kutureetera okumarwa n’obu abantu baakuba batatuhurikiize. Nituba nitureetera eiziina rya Yehova kwezibwa. (Isa. 43:10-12; Mat. 6:9) Nitutunga omugisha gw’okukora hamwe na Ruhanga. (1 Kor. 3:9) Kandi ‘ekyana ky’eminwa’ nk’ekyo nikishemeza Yehova.—Heb. 13:15, 16.
4. Niki ebi tutarikumanya ebirikubaasa kuruga omu kubuurira kwaitu?
4 Kandi okukora kwaitu n’amaani nikubaasa kurugamu ebirungi ebi tutarikureeba. Abantu abamwe abu Yesu yaabuuriire bakahinduka abeegi be bwanyima y’okuheza obuheereza bwe obw’omu nsi. Nikyo kimwe embibo ezi turikubiba nizibaasa kutakura ahonaaho, kandi omuntu ou twabuuriire naabaasa kwija omu mazima tutarikumanya. Buzima okubuurira kwaitu nikubaasa kurugamu ebirungi bingi. N’ahabw’ekyo, ka tugume ‘nitwana ebyana bingi’ tubaase kworeka ku turi abeegi ba Yesu.—Yoh. 15:8.