Ni Baahi Abarikubaasa Kugasirwa Omuri Eki
1. Ku turikushoma Watchtower nari Awake! tushemereire kuteekateeka ki, kandi ahabw’enki?
1 Watchtower na Awake! zitebeekanisiibwe kuhwera abantu boona. N’ahabw’ekyo, ebicweka ebirikwiziramu nibikwata aha nshonga zitari zimwe na zimwe. Twaba nitushoma buri kicweka ekiri omu magaziini, tushemereire kuteekateeka aha u kirikubaasa kugasira reero tukaba niwe twagiha.
2. Magaziini zaitu niziba zirimu ki ebirikubaasa kuhwera abandi?
2 Watchtower ensya neeshoboorora aha bi mubaire mwagaaniireho n’ou orikukora nawe ebirikukwata ahari Baibuli? Harimu ekicweka ekirikukwata aha maka ekirikubaasa kuhwera omunyabuzaare waawe? Oine ou orikumanya orikwenda kutaayaayira eihanga erigambirweho omuri Awake!? Hariho magaziini erikubaasa kuhwera bamwe aha b’eby’obushuubuzi n’ebitongore bya gavumenti ebiri omu kicweka kyanyu? Nk’eky’okureeberaho, magaziini yaaba neegamba aha buremeezi oburikukwata aha bakaikwire neebaasa kuhwera abari omu myanya ei barikureberererwamu. Ebitongore ebirikukora ahaby’ebiragiro nibibaasa kukunda magaziini erikugamba aha bikwatiraine n’okuhenda ebiragiro.
3. Gamba eky’okureeberaho ekirikworeka ebirungi ebirikuruga omu kuha magaziini abo abu turikuteekateeka ngu nibaija kuzigasirwamu.
3 Ebirugiremu: Omushaija n’omukazi we Abajurizi ba Yehova ab’omu South Africa bwanyima y’okutunga Awake! ya Okitoba 2011 eyabaire neekwata aha “ku turikubaasa kukuza abaana b’emitwarize mirungi,” baakateerera esimu amashomero 25 omu kicweka kyabo. Amashomero 22 ahari ago gakaikiriza Awake! gaazigabira abeegi baago. Omushaija n’omukazi we abandi omu eihanga niryo rimwe, nabo bakagaba Awake! aha gandi mashomero agari omu kicweka kyabo. Abashomesa b’eishomero rimwe ahari ago bakacwamu kukoresa Awake! egyo omu kwegyesa abaana buri saabiiti. Omushaija ogwo n’omukazi we bakagambira omureeberezi orikutaayaayira ebibiina ebyarugiremu. Nawe akahiga ebibiina kubuurira amashomero agari omu bicweka ebyo. Ebibiina bingi bikashaba ofiisi y’eitaagi kwongyerwa Awake! ezo, kyareetera zaagaruka kuteerwa.
4. Ahabw’enki tushemereire kuteeraho kuha abantu baingi magaziini?
4 Magaziini zaitu nizishoboorora amakuru g’ebirikubaho obunaku obu kandi zigamba aha biri omu Baibuli n’aha Bukama bwa Ruhanga. Nizo magaziini zonka omu nsi yoona ‘ezirikuranga eby’okujunwa.’ (Isa. 52:7) N’ahabw’ekyo, tushemereire kuteeraho kuziha abantu baingi. Omuringo murungi gw’okukora ekyo, n’okwebuuza oti: ‘Ni baahi abarikubaasa kugasirwa omuri eki?’