Akabokisi k’Ebibuuzo

◼ Omubuurizi otakabatiziibwe kubaasa kwikirizibwa kubatizibwa okwija omu nteerane n’okubuurira kwe kushemereire kuba kuri kuta?

Okubatizibwa n’ekintu kikuru eki omuntu arikucwamu kukora. N’ahabw’ekyo, omuntu weena atakaikiriziibwe kubatizibwa, ashemereire kuba naamanya ebi Ruhanga arikumwenza. Okwongyera ahari ekyo, ashemereire kuba naayoreka ngu amaririire kugyendera aha bi Ruhanga arikumwenza.

Abakristaayo nibaragiirwa kutareka kuteeranira hamwe, n’ahabw’ekyo omubuurizi otakabatiziibwe ashemereire kuba naija omu nteerane butoosha. (Heb. 10:24, 25) Aine kuguma naateeraho kugarukamu yaija omu nteerane. Orikuza kubatizibwa naakira kuba ari omu Ishomero ry’Obuheereza, kwonka tikugira ngu weena orikuza kubatizibwa aine kuba ari omu ishomero.

Ekindi, Abakristaayo nk’oku baahairwe omurimo gw’okubuurira amakuru marungi n’okuhindura abantu abeegi, omubuurizi otakabatiziibwe ashemereire kuba naayejumba omu kubuurira butoosha. (Mat. 24:14; 28:19, 20) Ashemereire kuba amazire ameezi angahi arikubuurira kubaasa kwikirizibwa kubatizibwa? Ashemereire kuheebwa obwire burikumara kubaasa kworeka ngu naaza kugumizamu naayejumba omu kubuurira butoosha. (Zab. 78:37) Kwonka tikishemereire kutwara obwire buraingwa munonga kuruga obu aratandikye kubuurira kuhitsya obu arabaatizibwe, ekyo nikibaasa kutwara ameezi makye. Ashemereire kuba naabuurira eshaaha zirikwingana ki buri kwezi? Tihariho shaaha ezitairweho ezi aine kuhayo omu kubuurira. Abareeberezi baine kwetegyereza embeera ya buri mubuurizi kandi bakacwamu gye.​—Luk. 21:1-4.

Abareeberezi (nari abaheereza abari omu bibiina ebirimu abareeberezi bakye) abarikubuuza ebibuuzo abo abarikwenda kubatizibwa bashemereire kwetegyereza ngu abantu tibarikushushana kandi bakacwamu gye yaaba bahikire kubatizibwa. Abareeberezi baine kureeba ngu aine ekyetengo ky’okwenda kuba omwe aha bajurizi ba Yehova kandi arikworeka ngu naasiima omugisha gw’okuba omu kibiina kya Yehova arikwejumba n’omu kubuurira. Abareeberezi baine kumanya ngu takakuzire gye mu by’omwoyo kandi ngu takeegire kubuurira gye nk’ababuurizi abakuzire omu by’omwoyo. Kwonka abareeberezi bareeba ngu omubuurizi ogwo takahikire kubatizibwa, baine kumushobororera enshonga erikumuzibira barikukoresa Ebyahandiikirwe kandi bamuhwere omu by’omwoyo.