Baanabi Mubatware nk’Eky’Okureeberaho—Miika
1. Miika naabaasa kuba yaayebuurize kibuuzo ki kandi ahabw’enki okubuurira kwe kutaraabaire kwabusha?
1 ‘Ni ryari obu emperu y’ensi egi embi eraahikye?’ Nabi Miika naabaasa kuba yaayebuurize ekibuuzo ekyo obu yaabaire naaranga obutumwa bwa Yehova obw’okucwekyereza obugabe bwa Israeli na Yuda. Okubuurira kwe tikuraabaire kwabusha. Omu bwire obwo, obunabi bwa Yehova bw’okucwekyereza Samaria bukahikirizibwa omu gwa 740 Yesu atakazairwe. (Mik. 1:6, 7) Bwanyima, Yerusaalemu ekacwekyerezibwa omu mwaka gwa 607 Yesu atakazairwe. (Mik. 3:12) Omu bunaku obu nitubaasa kutooreza tuta Miika obwo tutegyereize ekiro kya Yehova eki aricweraho orubanja?
2. Nitworeka tuta okugumisiriza turikutegyereza ekiro kya Yehova kandi ahabw’enki?
2 Gira Okugumisiriza: Miika akahandiika ati: “Nyowe amaisho gangye ndyagata ahari MUKAMA, ntegyereze Ruhanga w’okujunwa kwangye.” (Mik. 7:7) Miika akaguma ategyereize ekiro kya Yehova arikuheereza n’obweziriki. Naitwe tushemereire “kuba abarikwera kandi abarikutiina Ruhanga omu mitwarize” yaitu obwo tutegyereize ekiro kya Yehova. (2 Pet. 3:11, 12) Okugumisiriza kwa Yehova kubaasiise bamwe kweteisa. (2 Pet. 3:9) N’ahabw’ekyo, ka tukuratire obuhabuzi bw’omu Baibuli turikworeka okugumisiriza nka baanabi.—Yak. 5:10.
3. Ahabw’enki tushemereire kushaba Yehova kutuha omwoyo gwe gurikwera?
3 Yesigye Amaani ga Yehova: N’obu Miika araabe yaabaire aine obujunaanizibwa bugumire, akeesiga amaani ga Yehova kubaasa kubuhikiriza. (Mik. 3:8) Egi niyo nshonga ahabw’enki Baibuli neetuhiga kwesiga amaani ga Ruhanga. Ruhanga naaha abaruhire amaani kugira ngu babaase kuhikiiriza obujunaanizibwa bwabo omu kibiina. (Zab. 84:5, 7; Isa. 40:28-31) Hariho oku Ruhanga akuhwereire omu kumuheereza? Nooshaba Yehova obutoosha kukuhwera n’omwoyo gwe gurikwera?—Luk. 11:13.
4. Eky’okureeberaho kirungi kya Miika nitukyegaho ki?
4 Miika akeebembeza okukora ebi Ruhanga akunda. Akaba amaririire kuguma ari omwesigwa n’obu araabe yaabaire ayetooroirwe abantu b’emitwarize mibi. Naitwe, nitugyezibwa buri izooba. N’ahabw’ekyo ka tumaririire kuguma “nitugyendera omu iziina rya MUKAMA Ruhanga waitu” ebiro byona.—Mik. 4:5.