Turakiti Ensya Zikozirwe omu Muringo Murungi!
1. Ebisya ebitebeekanisiibwe omu muringo murungi kutuhwera omu kubuurira nibiiha?
1 Turakiti itaano ensya zikashohozibwa aha ruteerane Oruhango 2013 orwabaire rwine omutwe “Ekigambo kya Ruhanga n’Amazima!” Okwongyera ahari ekyo, Amakuru g’Obukama Na. 38, akaine omutwe “Abaafiire buzima baryazooka?” kongyeirwe aha turakiti ezindi. Kandi turakiti ezi mukaaga zikozirwe omu muringo murungi. Ahabw’enki zikozirwe omu muringo ogwo? Mbwenu shi nitubaasa kuzikoresa gye tuta kurugiirira aha muringo ogu zitebeekanisiibwemu twaba nitubuurira enju aha nju?
2. Ekigyendererwa ky’okukora turakiti ezi omu muringo ogu nikiha?
2 Ahabw’Enki Zikozirwe omu Muringo Ogwo?: Enyanjura nungi z’okukoresa twaba nitubuurira enju aha nju nizitwariramu ebintu bina ebi: (1) Buuza ou orikubuurira ekibuuzo ekiraamureetere kukugarukamu. (2) Hikaanisa nawe ebiteekateeko aha byahandiikirwe. (3) Muhe turakiti y’okushoma. (4) Mutsigire ekibuuzo ekimuraahikaniseho ebiteekateeko ku oraagarukeyo. Omuringo ogu turakiti ensya zitebeekanisiibwemu nigutubaasisa kuzigaba turikukuratira ebintu biina ebi.
3. Nitubaasa kugaba tuta emwe ahari turakiti ensya omu kubuurira?
3 Oku Zirikubaasa Kukoresibwa: (1) Bwanyima y’okuramutsya ou orikubuurira, mworekye ekibuuzo ekiri aha mutwe gwa turakiti ekiine eby’okugarukamu bishatu, reero omubuuze akugambire eki arikuteekateeka ngu kihikire. (2) Kubuurura turakiti, reero muhikaanise ebiteekateeko aha “Eki Baibuli Erikwegyesa.” Shoma ekyahandiikirwe ekyorekirwe omu Baibuli kyaba nikibaasika. Ou orikubuurira yaaba aine obwire muhikaanise ebiteekateeko aha biri ahansi y’omutwe “Oku Orikugasirwa Waikiriza Ekyo.” (3) Muhe turakiti, reero omuhigye kugishoma yoona omu bwire bwe. (4) Otakagyenzire mworekye ekibuuzo ekiri enyima ya turakiti ahansi y’omutwe “Eky’okuteekateekaho” kandi okore entebeekanisa nawe kwongyera kuhikaanisa nawe ebiteekateeko aha ki Baibuli erikugarukamu.
4. Nitubaasa kukoresa tuta turakiti ensya twaba tugarukireyo aha muntu orikwenda kumanya ebirikukiraho?
4 Kyorobi kugarukayo aha muntu ou waahaire turakiti ezi. Koresa ebyahandiikirwe ebyorekirwe enyima ya turakiti kubaasa kugarukamu ekibuuzo eki waamutsigiire obu oheereruka kumutaayaayira. Bwanyima otakagyenzire, mworekye ekishushani ky’akatabo Amakuru Marungi, akatabo n’eishomo eririkworeka ebirikukiraho aha nshonga egyo. Ku araikirize, kora nawe entebeekanisa kwija kuhikaanisa nawe ebiteekateeko omu katabo ako waagarukayo. Noija kuba waatandika kwega nawe Baibuli. Nari omu mwanya gw’okumuha akatabo, noobaasa kumuha turakiti endiijo reero okore nawe entebeekanisa kwija kuhikaanisa nawe ebiteekateeko ku oraagarukyeyo.
5. Turakiti ziine mugasho ki omu kubuurira?
5 Turakiti zitwire nizikoresibwa kumara emyaka erikurenga omuri 130. N’obu turakiti ezi zitarikushushana omu muringo ogu zikozirwemu, zitwire nizikora gye omu kujanjaaza amakuru marungi. Ka tuteereho kukoresa turakiti ezi ensya kwongyera kujanjaaza amazima agari omu Baibuli, omu nsi yoona.—Enf. 15:7a.