Baanabi Mubatware nk’Eky’Okureeberaho—Zefania
1. Hakaba hariho mbeera ki, obu nabi Zefania yaatandika kuheereza kandi obunaku obu nitumwegaho ki?
1 Ahagati y’ekyasha kya mushanju Yesu atakazairwe, abantu ba Yuda baakorekyera kimwe ngu nibaramya Baali. Omugabe mubi Amoni akaba aherize kwitwa kandi Yosia atandikire kutegyeka. (2 Bus. 33:21–34:1) Omu bunaku obwo, Yehova akakoresa Zefania kuranga obutumwa obwabaire nibukwata ahari Yuda. N’obu Zefania yaabaire naazaarwa omu ka eyaabaire n’erugwamu abagabe ba Yuda taratiinire kuranga obutumwa bwa Yehova obwabaire nibukwata aha kucwera abagabe ba Yuda orubanja. (Zef. 1:1; 3:1-4) Nka Zefania, naitwe nituteeraho kugira obumanzi kandi titurikwikiriza banyabuzaare baitu kuturemesa kuheereza Yehova. (Mat. 10:34-37) Zefania akaranga butumwa ki kandi niki ekyarugiremu?
2. Twine kukora ki kubaasa kusherekwa aha kiro ky’ekiniga kya Yehova?
2 Sherura Yehova: Yehova niwe arikubaasa kujuna abantu aha izooba ry’ekiniga kye. N’ahabw’ekyo, Zefania akahiga abantu ba Yuda kusherura Yehova, kusherura okuhikiirira hamwe n’obucureezi omu bwire obwabaire butsigaireyo. (Zef. 2:2, 3) Nka Zefania, obunaku obu naitwe nituhiga abandi kusherura Yehova, kandi twine kuguma tumariirire ‘kumukuratira.’ (Zef. 1:6) Ekyo nitukikora twashoma Ekigambo kye kandi tukamushaba kutuha obuhabuzi. Nitusherura okuhikiirira turikuguma twine emicwe eshemeire. Kandi tusherura obucureezi turikuteeraho kworobera kandi tukakuratira obuhabuzi obu Yehova arikutuha kurabira omu kibiina kye.
3. Ahabw’enki twine kugira emiteekateekyere mirungi aha kubuurira?
3 Ebirungi Ebyarugiremu: Obunabi bwa Zefania bukarugamu ebirungi ahabw’okuba bukahiga bamwe omuri Yuda okukira munonga Yosia owaatandikire kusherura Yehova akiri omunyeeto. Bwanyima Yosia akatandika kampeyini y’okumaraho okuramya ebishushani omuri Yuda. (2 Bus. 34:2-5) Obunaku obu, embibo z’Obukama ezimwe n’obu ziraabe nizigwa omu muhanda, ezindi aha rukiri, nari omu mahwa, kwonka ezimwe nizigwa omu itaka erirungi kandi zana ebyana. (Mat. 13:18-23) Twine amatsiko ngu Yehova naija kuguma naatuha emigisha ahabw’okukora n’obweziriki omu kubiba embibo z’Obukama.—Zab. 126:6.
4. Ahabw’enki twine kuguma tutegyereize ekiro kya Yehova?
4 Bamwe omuri Yuda bakaba nibateekateeka ngu Yehova taine eki araije kukora. Kwonka Yehova akabahamiza ngu ekiro kye kikuru kikaba kiri haihi. (Zef. 1:12, 14) Abo bonka abahindwire Yehova obuhungiro bwabo nibo baabaire nibaza kucungurwa. (Zef. 3:12, 17) N’ahabw’ekyo itwe n’ab’eishe-emwe bagyenzi baitu, twaba tukitegyereize ekiro kya Yehova, ka tugumizemu nitumuheereza!—Zef. 3:8, 9.