Hahingwireho Ekyasha Turikubuurira aha Bukama!
1. Abajurizi ba Yehova bakahigwa kukora ki emyaka nk’igana ehingwire?
1 “Mureebe, Omugabe naategyeka! Niimwe mutoorainwe kuranga ebirikumukwataho. N’ahabw’ekyo murangye, murangye, murangye, omugabe n’obugabe bwe.” Abajurizi ba Yehova bakahigwa kugyendera aha bigambo ebyo ebyagambirwe Ow’eishe-emwe Rutherford emyaka nk’igana ehingwire, kubuurira amakuru marungi g’Obukama omu bicweka bingi. Kandi ekyo nikyo tutwire nitukora! Naitwe nk’Abakristaayo aba ira, tubaasize kubuurira amakuru marungi g’Obukama omu ‘bihangirwe byona eby’ahansi y’eiguru.’ (Kol. 1:23) Ku turikureeba enyima tukateekateeka aha kyasha ekihweire, niki eki tukozire omu kuranga Obukama bwa Ruhanga? Nitubaasa kugumizamu tuta turikuranga Obukama, obu turi omu mwaka gwa 100 kuruga obu butandika kutegyeka?
2. Ebitabo byaitu bitwire nibiranga bita Obukama bwa Ruhanga?
2 Okureeba Enyima: Kumara emyaka mingi, ebitabo byaitu bitwire nibiranga Obukama bwa Ruhanga. Kuruga 1939 tutwire nitushohoza magaziini yaitu enkuru erikwetwa: Omunaara gw’Omurinzi Ogurikuranga Obukama bwa Yehova. Omunaara ogu nigukira kugamba aha Bukama n’eki burikuza kuhikiiriza. Awake! nayo neegamba aha Bukama bwa Ruhanga ngu nibwo bwonka oburaamareho oburemeezi bw’abantu. Buzima, magaziini ezi hati nizo zirikukirayo kuvunuurwa n’okujanjaazibwa omu nsi yoona!—Kush. 14:6.
3. Ni miringo ki emwe ei tutwire nitukoresa kuranga Obukama bwa Ruhanga?
3 Abajurizi ba Yehova batwire nibakoresa emiringo mingi omu kuranga Obukama bwa Ruhanga. Ira tukaba nitukoresa emotoka, radiyo, n’ebiri aha ntambi kuranga amakuru marungi. Emiringo egyo ekatuhwera kujanjaaza amakuru marungi obu ababuurizi baabaire bari bakye. (Zab. 19:4) Omu bunaku obu, twine omukura jw.org oguriho ebintu bingi, kubaasa kumanyisa abantu baingi ebirikukwata aha Bukama, otwariiremu n’abo abari omu mahanga ahu omurimo gwaitu gurikuzibirwa.
4. Ni miringo ki endiijo ey’okubuurira ei tutwire nitukoresa?
4 Kandi abaheereza ba Yehova batwire nibejumba n’omu miringo y’omutaano endiijo ey’okujanjaaza amakuru agarikukwata aha Bukama. Nk’eky’okureeberaho, ahagati y’emyaka ya 1990, tukatandikaho emiringo endiijo ey’okubuurira kwongyerera aha kubuurira enju aha nju. Tukatandika kubuurira omu myanya erikuba erimu abantu baingi, ahu barikwemereza ebiiruka, n’emyanya y’eby’obushuubuzi. Omu myaka egi, tutandikire n’omuringo musya ogw’okubuurira omu ndembo empango omu nsi yoona. Kandi, ebibiina bingi nibibuurira omu myanya erimu abantu baingi birikuta ebitabo aha bugaari nari emeeza. Kwonka, okubuurira enju aha nju nigwo muringo mukuru ogu turikukoresa omu kubuurira aha Bukama.—Byak. 20:20.
5. Omwaka gw’obuheereza omusya nigwija kubaasisa baingi ahariitwe kukora ki?
5 Okureeba Omumaisho: Kutandika n’omwaka gw’obuheereza omusya omuri Seputemba, baingi nibaija kutandika kuheereza nka baapayoniya ab’obutwire. Naiwe noobaasa kubegaitaho? Kandi kyaba kitarikubaasika, noobaasa kuheereza nka payoniya omuhwezi obwire butari bumwe na bumwe? Kwonka ku oraabe otarikubaasa kuba payoniya, Yehova buzima naija kukuha emigisha waateeraho kwejumbira kimwe omu kuranga Obukama.—Mal. 3:10.
6. Ahabw’enki Okitoba 2014 kurikwija kuba okwezi kw’omutaano?
6 Omuri Okitoba 2014 nibwo emyaka 100 eraahikye kuruga obu Obukama butandika kutegyeka. Niyo nshonga ahabw’enki Omunaara ogw’okugamba omu kubuurira okwezi okwo, nigwija kuba nigugamba aha Bukama bwa Ruhanga. Teeraho nk’oku kirikubaasika kuha abantu baingi Omunaara ogu. Tutegyereize ebiraabeho omu biro by’omumaisho, ka tugumizemu turikumanyisa abantu boona abarikuhurikiza “ebigambo birungi eby’obukama bwa Ruhanga.”—Byak. 8:12.