Eishomero ry’Obuheereza Erya 2015 Niriija Kutuhwera Kwongyera Kwegyesa Gye

¹ Daudi omuhandiiki wa Zaaburi akagira ati: “Ebigambo by’omu kanwa kangye, n’okuteekateeka kw’omu mutima gwangye bisiimwe omu maisho gaawe, Ai MUKAMA, orukiri rwangye, kandi omucunguzi wangye.” (Zab. 19:14) Naitwe nitwenda ngu ebigambo byaitu bibe nibishemeza Yehova, ahabw’okuba nitutwara okugamba amazima omu kibiina n’omu kubuurira nka kikuru. Eishomero ry’Obuheereza ni gumwe aha miringo ei Yehova arikukoresa kututendeka kubaasa kubuurira gye. Okutendekwa oku nikubaho buri saabiiti omu bibiina ebirikurenga 111,000 omu nsi yoona. Eishomero eri rihwereire ab’eishe-emwe na banyaanyazi-itwe omu nsi abakuriire omu mbeera zitarikushushana kubaasa kuba ababuurizi barungi b’amakuru marungi, kwegyesa gye abantu bakeetegyereza omu muringo gw’obwengye, n’obumanzi.​—Byak. 19:8; Kol. 4:6.

² Entebeekanisa y’eishomero eya 2015 neija kutwariramu ebiri omu New World Translation ensya ahansi y’omutwe “Enturukiriro y’ebiri omu Ekigambo kya Ruhanga” n’omu katabo Niki Eki Baibuli Erikwegyesa. Okwongyera ahari ebyo, habaireho empindahinduka omu bwire bw’ekicweka ky’ebirugire omu kushoma Baibuli n’omu rubazo Na. 1. Empindahinduka ezi hamwe n’obuhabuzi aha bikwatiraine n’oku embazo ezi ziraaheebwe nibyorekwa ahaifo.

³ Ebirugire omu Kushoma Baibuli: Ab’eishe-emwe abaraayebembere ekicweka eki nibaija kukoresa edakiika ibiri, kandi bashemereire kuta omutima aha nshonga emwe nkuru aha bi ayeegire omu kushoma Baibuli okwa saabiiti egyo. Waatebeekanisa noija kubagana n’abari omu kibiina eki oyegire orikukoresa obwire obukuhairwe. N’ahabw’ekyo, abari omu kibiina nibaija kukoresa edakiika mukaaga buri omwe arikukoresa obusekenda 30 kugamba eki ayegire omu kushoma Baibuli saabiiti egyo. Kubaasa kugamba eki oyegire omu busekenda 30, nooba oine kutebeekanisa gye kandi omu kukora otyo nooba nooyetendeka. Kandi ekyo nikibaasisa abandi kugamba eki beegire omu kucondooza kwabo.

⁴ ORUBAZO Na. 1: Ekicweka eki eky’okushoma Baibuli kihairwe edakiika ishatu nari n’obutazihitsya kandi eby’okushoma nibiija kuba biri bikye. Abaraaheebwe orubazo oru baine kwegyezamu emirundi mingi barikushoma omu eiraka rihango kandi barikuta omutima aha kwatura gye ebigambo n’okushoma omu muringo ogurikwetegyerezibwa. Abaheereza ba Yehova boona baine kuteeraho kushoma gye, ahabw’okuba okushoma gye ni kukuru munonga omu kuramya kwaitu. Nikishemeza kureeba ngu baingi aha baana baitu nibamanya kushoma gye, kandi nitusiima abazaire ahabw’okuhwera abaana baabo kubaasa kushoma gye.

⁵ ORUBAZO Na. 2: Orubazo oru nirwija kuheebwa omu dakiika itaano kandi n’orw’okuheebwa munyaanyazi-itwe. Omutwe gw’orubazo ogukuhairwe nigwo oine kukoresa. Orubazo rwaba niruruga omu New World Translation, rushemereire kuheebwa omu muringo ogurikuhikaana n’ekicweka eki murikubuuriramu. Orubazo rwaba niruruga omu katabo Eki Baibuli Erikwegyesa, omwegi ashemereire kushoma ebimuhairwe kucondoozamu kubaasa kwetegyereza gye ekirikugambwaho, kandi atoorane ebyahandiikirwe ebi ashemereire kukoresa. Ebyahandiikirwe ebindi ebirikuhikaana n’omutwe gw’orubazo nibibaasa kukoresibwa. Orikwebembera eishomero naija kutoorana omuhwezi.

⁶ ORUBAZO Na. 3: Orubazo oru n’orw’okuheebwa ow’eishe-emwe nari munyaanyazi-itwe omu dakiika itaano. Rwaheebwa munyaanyazi-itwe ashemereire kukuratira obuhabuzi bw’orubazo Na. 2. Rwaheebwa ow’eishe-emwe, ashemereire kwijuka ngu naagambira boona abamuhurikiize. Omwegi ashemereire kutebeekanisa orubazo, atoorane ebyahandiikirwe ebirikuhikaana n’omutwe ebi araakorese, kandi ayorekye n’eki turikubaasa kubyegaho.

⁷ Omuringo Musya Ogu Ab’eishe-emwe Baraahemu Orubazo Na. 3: Orubazo rwaba niruruga omu New World Translation, rushemereire kuheebwa nk’eky’okureeberaho ky’okuramya kw’eka nari nk’abari omu kubuurira. Orikwebembera eishomero naija kutoorana omuhwezi aboorekye n’oku orubazo ruraaheebwe. Omuhwezi aine kuba naaruga omu ka y’ogwo orikuza kuha orubazo nari ow’eishe-emwe omu kibiina. Ebyahandiikirwe ebindi ebirikworeka emisingye y’omu Baibuli ebirikuhikaana n’omutwe gw’orubazo nibibaasa kukoresibwa. Obumwe n’obumwe omureeberezi naabaasa kuheebwa orubazo oru. Abareeberezi nibabaasa kwetooranira omuhwezi n’oku orubazo ruraaheebwe. Hatariho kubanganisa, nikiija kuba nikigaruramu amaani ekibiina kureeba omureeberezi naayegyesa gye ari n’ab’omu ka ye nari n’ow’eishe-emwe ondiijo.

⁸ Okuhabura: Orikwebembera ishomero naija kukoresa edakiika ibiri kuha obuhabuzi buri mwegi yaaheza kuha orubazo kandi amusiime arikworeka ahabw’enki okuha orubazo omu muringo ogwo kyaba kiri kirungi kandi okukira munonga akorese ebiri omu kitabo Benefit From Theocratic Ministry School Education. Orikwebembera eishomero yaaheza kwanjura orubazo rw’omwegi oruri omu ntebeekanisa, taine kugamba eki omwegi arikukoraho. Kwonka bwanyima y’okuha orubazo n’okumusiima kurugiirira aha ku yaakora, orikwebembera eishomero ashemereire kugamba eki omwegi yaaba naakoraho, kandi agambe ahabw’enki omwegi yaakora gye, nari omu muringo murungi ashoboorore ahabw’enki omwegi ashemereire kwongyeramu amaani aha nshonga ei yaaba naakoraho.

⁹ Foomu y’okuhaburiraho eri omu kitabo Ministry School aha rupapura 79 kuhika 81. Bwanyima y’okuha orubazo, orikwebembera ishomero naija kucebera omu kitabo ky’omwegi kandi amubuuze yaaba abaasize kukora ebiri omu kitabo kye ebirikukwata aha rubazo rwe. Okurugiirira aha byetengo bya buri mwegi, obuhabuzi obundi nibubaasa kumuheebwa bwanyima y’oruteerane nari omu bwire obundi. Obuhabuzi obu buri mwegi arikutunga omu ishomero bwine kureebwa nk’omugisha gw’okumuhwera kwongyera kutunguuka omu by’omwoyo.​—1 Tim. 4:15.

¹⁰ Omwegi yaarenzya eshaaha z’orubazo rwe, orikwebembera eishomero naabaasa kumumanyisa omu bwengye, nk’okukoresa akade nari ekindi kyona, kumumanyisa ngu obwire bwe bwahwayo. Omwegi ashemereire kumarayo sentensi ye kandi akaruga aha puratifoomu obwire bwe bw’orubazo bwahwaho.​—Reeba ekitabo Ministry School, aha rup. 282, kacw. 4.

¹¹ Boona abarikuhikiiriza ebirikwetengyesa kuza omu Eishomero ry’Obuheereza nibahigwa kurizamu. (Reeba ekitabo Ministry School, aha rup. 282, kacw. 6.) Okutendekwa oku abaheereza ba Yehova barikutunga omu ishomero eri kubabaasiise kubuurira n’okwegyesa abantu amakuru marungi batarikubaanganisa, ekitiinisa, na rukundo. Yehova ka naashemererwa ahabw’okuhimbisibwa boona abarikugasirwa omu Ishomero ry’Obuheereza!​—Zab. 148:12, 13; Isa. 50:4.