Hwera Empumi Kwega Ahari Yehova
1. Yesu akagirira ata empumi embabazi?
1 Hakaba nihakiburayo ebiro bikye Yesu kufa. Ku yaabaire naaruga omu kibuga Yeriko, abashaija babiri ababaire bari empumi kandi barikushabiiriza baayeta nibagira bati: “Mukama, otugirire embabazi!” N’obu araabe yaabaire ayerarikiriire ahabw’okumanya ngu akaba naaza kufa, Yesu akeemerera, yaabeeta, yaabakiza. (Mat. 20:29-34) Nitubaasa kugirira tuta empumi embabazi nka Yesu?
2. Twabugana ohumire nitubaasa kumubuurira tuta?
2 Bahwere: Waabugana ohumire obundi ari omu bantu baingi, mweyanjurire kandi omushabe kumuhwera. Abantu nk’abo emirundi emingi nibakira kutwazibwa kubi, n’ahabw’ekyo naabaasa kwerarikirira. Kwonka, waamworeka rukundo eyaabuzima kandi okooreka ngu noomufaho oyihiire aha mutima nikibaasa kumuhuumuriza. Twine kumanya ngu hariho okuhuma kw’emiringo etarikushushana kandi eki nikibaasa kutuhwera kumanya oku turaabahwere. Bwanyima y’okumuhwera, noobaasa kumugira ngu noohwera abantu kwega Baibuli. Mushabe kumushomera ekyahandiikirwe, nka Zaaburi 146:8 nari Isaaya 35:5, 6. Yaaba naabaasa kushoma Braille, mubuuze yaaba orikubaasa kumuha ekitabo ekiteirwe omu Braille kubaasa kumanya ebirikukiraho. Noobaasa kumuhwera kutunga eby’okuhurikiza kuruga aha jw.org. Yaaba aine puroguraamu aha kompyuta ye erikubaasa kumushomera ebiri aha kompyuta, naabaasa kukoresa ebiihirwe aha jw.org hamwe n’ebitabo ebirikubaasa kwihwaho omu RTF (Rich Text Format).—Reeba akabokisi “Waaba Noohwera Empumi . . .”
3. Nitubaasa kusherura tuta empumi omu kicweka kyaitu?
3 Sherura Empumi: Nitubugana empumi bumwe na bumwe twaba nitubuurira enju aha nju ahabw’okuba baingi tibarikukira kukunda kugaaniira n’abantu abu batarikumanya. N’ahabw’ekyo, nikyetengyesa kutamu amaani ‘kubasherura’ kubaasa kubabuurira. (Mat. 10:11) Oine ou orikukora nawe nari ou orikushoma nawe ohumire? Ba niwe waabanza kugamba nawe. Omu kicweka kyanyu haaba harimu ishomero ry’empumi, obaahe ebitabo ebiri omu Braille. Hariho ou orikumanya oine omu ka owe omuntu ohumire? Omu kicweka kyanyu harimu ebitongore ebirikuhwera empumi nari ebihaire empumi amaju g’okuraaramu? Shoboorora ori aha maju ago orikwakiira abantu, nari orikukurira ekitongore ekyo, ngu Abajurizi ba Yehova nibakunda kuhwera empumi, kandi omushabe kubareetera ebitabo ebiri omu Braille nari eby’okuhurikiriza. Mworekye ekiraganiso ky’omu Baibuli ekirikworeka ngu Ruhanga naija kwihiraho kimwe okuhuma. Noobaasa n’okumworeka vidiyo kuruga aha jw.org eine omutwe “Without It, I Would Feel Lost,” erikushoboorora ohumire obaasize kugasirwa ahabw’okutunga Baibuli omu Braillie. Waashoboorora ekyakureeta, nikibaasa kukuhwera kugaaniira n’empumi.
4. Niki eki turikwega omu ky’okureeberaho kya Janet?
4 Munyaanyazi-itwe omwe ohumire orikwetwa Janet, akataayaayira ekyombeko ekirikutuurwamu empumi. Akagaaniira n’omukazi. Janet yaamugambira ngu, “Yesu akakiza empumi kworeka eki arikwija kukorera boona abahumire.” Bakagaaniira aha kyahandiikirwe ekiri omu Okushuuruurwa 21:3, 4, kandi Janet akamushoboororera oku Obukama bwa Ruhanga buraije kuhikiiriza ekiraganiso eki. Omukazi akabanza kuhunama, reero yaagira ati: “Tinkahuriraga omuntu weena ohumire oine emiteekateekyere nk’egi. Abantu baingi abarikureeba nibateekateeka ngu ekirikureetera abantu kuhuma, n’ahabw’ebi barikuba bakozire nari ebi baishenkurubo baakozire.” Janet akoheerereza omukazi akatabo Niki Eki Baibuli Erikwegyesa arikukoresa Intaneeti, kandi hati nibeega Baibuli emirundi ebiri omu saabiiti.
5. N’obu turaabe tutarikubaasa kukiza empumi nka Yesu, twayoreka ngu nitufayo aha mpumi nihaija kurugamu birungi ki?
5 Buzima, titurikubaasa kukiza empumi nka Yesu, kwonka nitubaasa kuhwera abu ruhanga w’ensi egi yaahumize omu by’omwoyo, otwariremu n’abahumire amaisho, kwetegyereza amazima agari omu kigambo kya Ruhanga. (2 Kor. 4:4) Yesu akakiza abashaija babiri haihi na Yeriko ahabw’okugira ngu ‘akabagirira embabazi.’ (Mat. 20:35) Naitwe twayoreka ngu nitufayo aha mpumi, nitubaasa kugira omugisha gw’okuhwera bamwe kumanya ebirikukwata ahari Yehova orikwija kumariraho kimwe okuhuma.