Baanabi Mubatware nk’Eky’Okureeberaho—Habakuuki
1. Ahabw’enki nitubaasa kugira ngu embeera ei nabi Habakuuki yaabaire arimu neeshushana n’eriho obunaku obu?
1 Ku turikureeba ebintu bibi nibyeyongyera kubaho omu nsi, nitubaasa kwehurira nka nabi Habakuuki owaabuuriize Yehova ati: ‘Ahabw’enki nondeebesa ebitahikire, kandi n’obubisha buri omu maisho gangye?’ (Hab. 1:3; 2 Tim. 3:1, 13) Twateekateeka aha butumwa bwa nabi Habakuuki n’okwikiriza kwe, nikibaasa kutuhwera kugira okwikiriza kuhamire obwo tutegyereize ekiro kya Yehova eky’okucweraho orubanja.—2 Pet. 3:7.
2. Nitubaasa kworeka tuta ngu okwikiriza kwaitu kuhami obunaku obu?
2 Guma Oine Okwikiriza: Omu mwanya gw’okuhwamu amaani ahabw’embeera eyabaire eriho, Habakuuki akaguma ahami omu by’omwoyo kandi ari omweziriki omu buheereza bwe. (Hab. 2:1) Yehova akahamiza Habakuuki ngu obunabi bukaba nibuza kuhikiirira omu bwire obuhikire kandi ngu “ohikiriire aryaba ohuriire ahabw’okwikiriza kwe.” (Hab. 2:2-4) Eki nikikwata kita aha Bakristaayo abariho omu bwire obu obw’emperu? Omu mwanya gw’okuta omutima aha bu emperu eraije nituhamya ngu neija kwija. Okwikiriza nikutuhiga kuguma nitureeba kandi tukeebembeza okubuurira.—Heb. 10:38, 39.
3. Ahabw’enki twine kuguma twine okushemererwa omu kuheereza Yehova?
3 Shemerererwa Omuri Yehova: Googi owa Magoogi ku araatahirire abaheereza ba Yehova, okwikiriza kwaitu nikwija kugyezibwa. (Ezk. 38:2, 10-12) Emihondano neereetaho embeera zigumire, n’ahari abo abarikuhonokaho. Neebaasa kureeta habaho eibura ry’eby’okurya. Abantu nibabaasa kufeerwa ebintu byabo, kandi n’emitindo omu mituurire y’abantu egarukye ahansi. Nitwija kutwaza tuta habaho embeera zigumire? Habakuuki akaba naamanya ngu embeera zigumire niziza kubaho, n’ahabw’ekyo akamariirira kuguma aine okushemererwa omu kuheereza Yehova. (Hab. 3:16-19) ‘Okushemerererwa omuri Yehova’ nikiija kutuhwera kugumisiriza oburemeezi oburaabeho omu biro by’omumaisho.—Neh. 8:10; Heb. 12:2.
4. Ni mugisha ki ogu twine hati n’omu biro by’omumaisho?
4 Abu Yehova araarinde bakahonokaho aha kiro kye ky’okucweraho orubanja, nibaija kugumizamu kwega ebirikumukwataho. (Hab. 2:14) Abaraazoorwe nabo nibaija kwega ebirikukwata ahari Yehova. N’omu bunaku obu, nitubaasa kukoresa buri mugisha kugamba ahari Yehova n’emirimo ye erikutangaaza.—Zab. 34:1; 71:17.