EBI ABAKRISTAAYO TWINE KUKORA
Kunda Kubuurira Amakuru Marungi
Oragumiirweho kubuurira? Baingi ahariitwe nitubaasa kugira ngu ego. Ahabw’enki? Obundi, butoosha nituhakanisibwa nari tutwarizibwa kubi nari nitutiina kugamba n’abantu abu tutarikumanya. Hatariho kubanganisa, ebintu ebi nibibaasa kutumaraho okushemererwa. Kandi obwo, nituramya Ruhanga w’okushemererwa orikwenda ngu tumuheereze tushemereirwe. (Zab 100:2; 1Tim 1:11) Ni nshonga ki ishatu ezishemereire kutureetera kukunda kubuurira?
Ey’okubanza, nitubuurira amakuru ag’amatsiko. N’obu baingi obunaku obu bataine matsiko, nitubaasa kwijuza emitima y’abantu ‘n’amakuru marungi g’ebigambo birungi.’ (Isa 52:7) Kwonka amakuru marungi g’Obukama bwa Ruhanga nigabaasa n’okutureetera okushemererwa. Otakagiire kubuurira, banza oteekateekye aha migisha ei Obukama bwa Ruhanga buraareete omu nsi.
Eya kabiri, amakuru marungi agu turikubuurira nigagasira abantu omu by’omwoyo n’omu by’omubiri. Abantu nibeega oku baine kwetantara ebikorwa bibi n’oku baraije kutunga amagara agatahwaho. (Isa 48:17, 18; Rom 1:16) Nitubaasa kuteera akashushani turi omu murimo gw’okusherura n’okujuna abantu. N’obu abamwe batarikwenda ngu tubajune, nitugumizamu kusherura abarikwenda.—Mat 10:11-14.
Eya kashatu, kandi enkuru munonga, okubuurira kwaitu nikuhiisa Yehova ekitiinisa. Buzima naasiima munonga omurimo gwaitu gw’okubuurira. (Isa 43:10; Heb 6:10) Okwongyera ahari ekyo, naatuha omwoyo gwe gurikwera kutubaasisa kuhikiiriza omurimo gwe. N’ahabw’ekyo, shaba Yehova akuhe okushemererwa, okurikureetwa omwoyo gurikwera. (Gal 5:22) Turikuhwerwa Yehova, nitubaasa kwemera okwerarikirira kwaitu kandi tubuurire n’obumanzi. (Byak 4:31) Reero, oku abantu baraatware okubuurira kwaitu kwona, nitwija kukunda omurimo gwaitu gw’okubuurira.—Ezk 3:3.
Okaayenzire kugira mwanya ki omu kubuurira? Noobaasa kworeka ota okushemererwa?
MUREEBE VIDIYO GARUKA OTUNGYE OKUSHEMERERWA KURABIRA OMU KWEYEGYESA N’OKUTEEKATEEKA AHA BI ORIKWEGA, REERO MUGARUKYEMU EBIBUUZO EBI:
Ahabw’enki twine kwebembeza okweyegyesa eby’omwoyo, n’obu twakuba nitubuurira eshaaha nyingi buri kwezi?
Ni mu muringo ki ogu twine kutoorezamu Mariamu?
Ni ryari obu orikuteekateeka aha Kigambo kya Ruhanga?
Niki ekiri kukushemeza waaba noobuurira amakuru marungi?