EBI ABAKRISTAAYO TWINE KUKORA
Rinda Emitindo ya Yehova
Yehova Ruhanga naateeraho abantu emitindo mirungi. Nk’eky’okureeberaho, naagira ngu obushwere n’okugaitwa kw’omushaija n’omukazi okw’ebiro n’ebiro. (Mat 19:4-6, 9) Naayanga emiringo yoona ey’obushambani. (1Kor 6:9, 10) Nangwa ataireho n’emisingye erikukwata aha kujwara n’okweboneza eri kutaanisa abaheereza be aha bantu abandi.—Bir 22:5; 1Tim 2:9, 10.
Omu nsi obunaku obu, abantu baingi tibarikurinda emitindo ya Yehova. (Rom 1:18-32) Nibaikiriza ebiteekateeko by’abantu kuhindura aha njwara, endeebeka, n’ebikorwa byabo. Baingi nibeebembeza ebikorwa byabo bibi kandi bajuma abaine emitwarize mirungi.—1Pet 4:3, 4.
Abajurizi ba Yehova twine kuguma twine obumanzi turikurinda emitindo ya Yehova. (Rom 12:9) Tuta? Omu bwengye twine kumanyisa abandi ebi Yehova arikukunda. Kwonka naitwe twine kuguma niturinda emitindo mirungi. Nk’eky’okureeberaho, twaba nitutoorana emiringo y’okujwaramu n’okweboneza, twine kwebuuza tuti: ‘Eki naatoorana nikyoreka emitindo ya Yehova nari n’ey’ensi? Oku ndikujwara n’okweboneza nibyoreka ngu ndi Omukristaayo orikutiina Ruhanga?’ Nari twaba nitutoorana puroguraamu y’okuhurikiza nari vidiyo, twine kwebuuza tuti: ‘Yehova naabaasa kwikiriza kuhurikiza puroguraamu egi? Erimu emitindo y’oha? Ebi ndikutoorana kubaasa kweshemeza nibibaasa kushiisha emicwe mirungi yangye? (Zab 101:3) Nibibaasa kuteeza entsibo ab’omuka yangye nari abandi?’—1Kor 10:31-33.
Ahabw’enki ni kikuru itwe kurinda emitindo ya Yehova? Yesu Kristo ari haihi kucwekyereza amahanga n’abantu ababi. (Ezk 9:4-7) Abarikukora ebi Ruhanga arikukunda nibo bonka abaraahonokyeho. (1Yoh 2:15-17) N’ahabw’ekyo, ka turinde emitindo ya Yehova kugira ngu abarikureeba emitwarize yaitu emirungi bahimbise Ruhanga.—1Pet 2:11, 12.
Enjwara n’endeebeka yangye nibyoreka mitindo ki ahariinye?
MUREEBE VIDIYO BA MUNYWANI WA YEHOVA—OMUSHAIJA OMWE, OMUKAZI OMWE, REERO MUGARUKYEMU EBIBUUZO EBI:
Ahabw’enki n’eky’obwengye kurinda emitindo ya Yehova?
Ahabw’enki abazaire bashemereire kutandika kwegyesa abaana baabo kurinda emitindo ya Yehova bakiri bato?
Abato n’abakuru nibabaasa kuhwera bata abantu kugasirwa omu burungi bwa Yehova?