“Ebiconco omu Ngaro Ebirikuheebwa Yehova”

Nitubaasa kwija tuta omu maisho ga Yehova n’ebiconco omu ngaro? (1Bus 29:5, 9, 14) Ahaifo hariho emiringo etari emwe erikworeka oku turikubaasa kuhayo twekundiire kushagika omurimo gw’Abajurizi ba Yehova omu kibiina kyaitu n’omu nsi yoona.

EBI TURIKUHAYO KURABIRA AHA MUKURA NARI OMU BUBOKISI NIBISHAGIKA:

• 

  OMURIMO OGURIKUKORWA OMU NSI YOONA

  okwombeka n’okureeberera ofiisi z’amataagi n’ez’abavunuuzi

  amashomero g’obuheereza

  abari omu buheereza obw’obutwire

  kuhwera abahikirweho ebihikiirizi

  okuteera ebitabo, okushohoza vidiyo, n’ebiri aha mukura

• 

  ENSHOHOZA Y’EKIBIINA

  okushashurira amaizi, amashanyarazi n’ebirikwetengyesa kuhunduuza Ekyombeko ky’Obukama

  esente ezi ekibiina kirikucwamu kwohereza aha itaagi kukoresibwa omu:

  • kwombeka Ebyombeko by’Obukama n’Ebyombeko by’Enteerane Empango omu nsi yoona

  • ntebeekanisa y’okwombeka n’okuhunduuza Ebyombeko by’Obukama ebihikirweho ebihikiirizi omu nsi yoona

  • mirimo endiijo erikukorwa omu nsi yoona

ENTEERANE EMPANGO EZ’EBIRO BISHATU N’EZ’EKIRO KIMWE

Ebi turikuhayo aha ruteerane oruhango orw’ebiro bishatu nibikoresibwa kushagika omurimo ogurikukorwa omu nsi yoona. Kandi, enshohoza y’oruteerane oruhango orw’ebiro bishatu, oruteerane orw’omutaano n’oruteerane orurikubaho n’ab’amahanga agandi nizikoresa esente ezi turikuhayo kushagika omurimo gw’ensi yoona.

Esente ezirikuheebwayo buri kyanga nizikoresibwa kupangisa emyanya y’okugiriramu enteerane empango n’okushashurira ebindi ebi ekyanga kirikwetenga. Ekyanga nikibaasa kucwamu kuhayo esente ezi kitarakoreise kushagika omurimo ogurikukorwa omu nsi yoona.