Oku Orikubaasa Kuhwera Haabaho Ekihikiirizi

Ebihikiirizi nibyongyera kuba bingi omu bunaku obu. Ku harikubaho ekihikiirizi, nikiba nikyetengyesa kutebeekanisa gye byona ebirikwetengyesa kubaasa kuhwera abahikirweho ekihikiirizi. N’ahabw’ekyo, Akakiiko Akareeberezi kakozire entebeekanisa y’okutaho ofiisi y’abarikuhwera abahikirweho ebihikiirizi aha buri ofiisi y’eitaagi.

Ab’eishe-emwe abarikukora omu ofiisi egyo, baamanya ngu habaireho ekihikiirizi, ahonaaho nibahurizana n’abareeberezi b’omu kicweka ekyo kumanya obuhwezi obu ababuurizi barikwetenga. Haaba haasiisikaire ebintu baingi ababuurizi batarikubaasa kwemarira bonka, ofiisi y’eitaagi neetoorana ab’eishe-emwe abatendekirwe gye kwebembera entebeekanisa y’okuhwera abahikirweho ekihikiirizi. Ab’eishe-emwe abo nibabaasa kushaba abahwezi nari ebintu ebimwe, nari nibabaasa kugura ebintu ebirikwetengyesa reero babitwarire abahikirweho ekihikiirizi.

Hariho ebirungi bingi ebirikuruga omu kukora ebintu omu muringo ogu. Nikituhwera kumanya eki twine kukora, kutashiisha esente n’ebintu, ekirikubaasa kubaho ab’eishe-emwe baakora ebyabo ahabwabo.

Ab’eishe-emwe abarikutooranwa ofiisi y’eitaagi nibabaasa kucwamu abahwezi n’esente ezirikwetengyesa kuhwera abahikirweho ekihikiirizi. Nibabaasa kuteeraho n’okumanya abeebembezi b’omu kicweka, abarikubaasa kubahwera kurahutsya omurimo gw’okuhwera abahikirweho ekihikiirizi. N’ahabw’ekyo tihaine oshemereire kurundaana esente omu b’eishe-emwe, kwoherereza abahikirweho ekihikiirizi ebintu, nari kuza omu kicweka ekihikirweho ekihikiirizi okwihaho baamushaba kuzayo.

Kwonka nabwo, haabaho ekihikiirizi nituba nitwenda kuhwera. (Heb 13:16) Nitukunda ab’eishe-emwe! Mbwenu shi nitubaasa kukora ki? Ekikuru munonga, nitubaasa kushabira abahikirweho ekihikiirizi hamwe n’abarikubahwera. Nitubaasa kuhayo sente kushagika omurimo ogurikukorwa omu nsi yoona. Ofiisi z’amataagi zirikugyendera aha buhabuzi bw’Akakiiko Akareeberezi, nizimanya ahu esente ezi zirikubaasa kuhwera munonga. Kandi waaba nooyenda kwejumba omu ntebeekanisa y’okuhwera abahikirweho ekihikiirizi, noobaasa kwijuza foomu Local Design/Construction Volunteer Application (DC-50).

MUREEBE VIDIYO OMWEGYEMURE GW’AMAANI OMURI BRAZIL, REERO MUGARUKYEMU EBIBUUZO EBI:

Niki ekirikukushemeza aha ntebeekanisa y’Abajurizi ba Yehova ey’okuhwera abaahikirweho ekihikiirizi bwanyima y’omwegyemure omuri Brazil omu 2020?