Okugirira Yehova Rukundo n’Okumusiima Nibihitsya aha Kubatizibwa

1-2. Nk’oku kirikworekwa omu Ebyakozirwe 8:27-31, 35-38, niki ekyahigire Omwesiopia omukonwa kubatizibwa?

NOOYENDA kubatizibwa obe omwegi wa Kristo? Okugirira Yehova rukundo n’okumusiima, bihigire abantu baingi kucwamu kubatizibwa. Yetegyereze omushaija omwe omwebembezi owaabaire naaheereza Omugabekazi wa Esiopia.

² Omwesiopia omukonwa ahonaaho akata omu nkora ebi yaayegire omu Byahandiikirwe. (Shoma Ebyakozirwe 8:27-31, 35-38.) Niki ekyamuhigire? Buzima akaba naasiima Ekigambo kya Ruhanga, ahakuba omu rugyendo rwe akaba ariyo naashoma bimwe aha biri omu kitabo kya Isaaya. Kandi Filipo ku yaagambire nawe, akasiima eki Yesu yaakozire ahabwe. Kwonka shi ahabw’enki omukonwa ogwo yaabaire agiire Yerusaalemu? N’ahabw’okugira ngu akaba naakunda Yehova. Ekyo nitukimanya tuta? Akaba agiire kuramya Yehova omuri Yerusaalemu. Omushaija ogu akaruga omu diini ei yaazaariirwemu, reero yaayegaita aha ihanga ryonka eryabaire ryehaireyo ahari Ruhanga. Kandi okukunda Yehova kukamuhiga kuhika aha idaara rikuru erindi, ery’okubatizibwa kuba omwegi wa Kristo.​—Mat. 28:19.

3. Niki ekirikubaasa kuremesa omuntu kubatizibwa? (Reeba akabokusi “Oine Omutima gwa Muringo Ki?”)

³ Rukundo ei oyiniire Yehova neebaasa kukuhiga kubatizibwa. Kwonka hariho rukundo endiijo erikubaasa kukuremesa kubatizibwa. Rukundo ki egyo? Yetegyereze eby’okureeberaho ebimwe. Noobaasa kuba nookunda munonga ab’eka yaawe na banywani baawe abatari mu mazima, kandi noobaasa kutiina ngu ku oraabatizibwe, nibaija kukwanga. (Mat. 10:37) Nari noobaasa kuba oine emize ei orikumanya ngu Ruhanga naayangira kimwe, kandi nikibaasa kuba nikikugumira kugicwa. (Zab. 97:10) Nari noobaasa kuba waabaire nookunda kukuza emikoro eine akakwate n’ediini y’ebishuba. Noobaasa kuba noijuka ebintu bimwe ebiine akakwate n’okukuza emikoro egyo ebirikukushemeza. Kyaba kiri kityo, noobaasa kugumirwa kurekyera aho kukuza emikoro etarikushemeza Yehova. (1 Kor. 10:20, 21) N’ahabw’ekyo, oine kwebuuza ekibuuzo eki: “Niki nari n’oha ou ndikukunda munonga?”

OU TWINE KUGIRIRA RUKUNDO ERIKUKIRAYO

4. Niki ekirikuhiga omuntu kwehayo kandi akabatizibwa?

⁴ Oine ebintu birungi bingi ebi orikubaasa kukunda kandi okatwara nka bikuru. Nk’eky’okureeberaho, obundi Abajurizi ba Yehova batakatandikire kukwegyesa Baibuli, noobaasa kuba waabaire nooha Baibuli ekitiinisa. Kandi noobaasa kuba waabaire nookunda Yesu. Hati ahabw’okugira ngu noomanya Abajurizi ba Yehova, noobaasa kuba nookunda okuba hamwe nabo. Kwonka okukunda ebintu ebi nikibaasa kutakuhiga kwehayo ahari Yehova okabatizibwa. Ekintu kikuru ekiraakuhigye kubatizibwa n’okukunda Yehova Ruhanga. Waaba nookunda Yehova okukira ebindi byona, torikwija kwikiriza ekintu kyona nari omuntu weena kukuremesa kumuheereza. Rukundo ei oyiniire Yehova neija kukuhiga kubatizibwa, kandi neija n’okukuhwera kuguma ori omwesigwa ahariwe na bwanyima y’okubatizibwa.

5. Ni bibuuzo ki ebi turikuza kushwijuma?

⁵ Yesu akagira ngu twine kukunda Yehova n’omutima gwaitu gwona, n’amagara gaitu goona, n’obwengye bwaitu bwona, n’amaani gaitu goona. (Mak. 12:30) Noobaasa kwega ota kukunda Yehova munonga otyo? Twateekateeka aha ku Yehova arikutukunda, naitwe nikituhiga kumukunda. (1 Yoh. 4:19) Ni nyehurira ki na bikorwa ki ebindi ebirikwija kukurataho waaba oine rukundo ey’omuringo nk’ogwo?b

6. Kurugiirira aha Abarooma 1:20, nitubaasa kwega tuta ebirikukwata ahari Yehova?

⁶ Yega ebirikukwata ahari Yehova kurabira omu byahangirwe. (Shoma Abarooma 1:20; Kush. 4:11) Teekateeka aha bwengye bwe oburikureebekyera omu bimera n’enyamaishwa. Yetegyereze oku omubiri gwawe gukozirwe omu muringo gw’omutaano. (Zab. 139:14) Teekateeka aha ku eizooba ririkworeka amaani ga Yehova, kandi obwo eizooba ni rimwe aha buhumbi bw’enyonyoozi.c (Isa. 40:26) Waateekateeka aha bi Yehova yaahangire, noija kwongyera kumuha ekitiinisa. Kwonka okumanya ngu Yehova aine obwengye bwingi n’amaani maingi, neeba eri entandikiro y’okugira omukago murungi nawe. Kubaasa kukundira kimwe Yehova, nooba oine kumanya bingi ebirikumukwataho.

7. Oine kuba noohamya ki kubaasa kukundikira kimwe Yehova?

⁷ Oine kuba noohamiza kimwe ngu buzima Yehova naakufaho. Nikikugumira kwikiriza ngu Omuhangi w’eiguru n’ensi naakumanya kandi ngu naakufaho? Kyaba nikwo kiri, ijuka ngu Yehova tari “hare n’omuntu weena omuriitwe.” (Byak. 17:26-28) Naashwijuma “emitima yoona,” kandi naakuraganisa nk’oku Daudi yaagambiire Sulemaani ngu ‘waamusherura, noija kumubona.’ (1 Bus. 28:9) Nangwa enshonga erikukureetera kwega Baibuli n’okugira ngu Yehova naagira ngu, akakweyiriza haihi. (Yer. 31:3) Oku orikwongyera kwetegyereza byona ebi Yehova akukoreire, nikwo orikwija kwongyera kumukunda.

8. Noobaasa kworeka ota ngu noosiima rukundo ei Yehova akwiniire?

⁸ Omuringo gumwe ogw’okworeka ngu noosiima rukundo ei Yehova akwiniire n’okugamba nawe kurabira omu kushaba. Noija kwongyera kumukunda waaguma noomugambira ebirikukwerarikiriza kandi okamusiima ahabwa byona ebi arikukukorera. Kandi omukago gwawe na Yehova nigwija kuhama waareeba oku arikugarukamu okushaba kwawe. (Zab. 116:1) Noija kuhamya ngu naakwetegyereza. Kwonka kubaasa kumuhindura munywani waawe ow’aha mara, oine kwetegyereza emiteekateekyere ye. Kandi oine n’okumanya ebi arikwenda ngu okore. Omuringo gwonka ogu orikwija kumanya ebintu ebi byona, n’okurabira omu kwega Ekigambo kye Baibuli.

9. Noobaasa kworeka ota ngu nootwara Baibuli nk’ey’omuhendo?

⁹ Yega kutwara Ekigambo kya Ruhanga Baibuli nk’eky’omuhendo. Baibuli yonka niyo erimu amazima agarikukwata ahari Yehova, n’ekigyendererwa kye. Nooyoreka ngu nootwara Baibuli nk’ey’omuhendo orikugishoma buri izooba, orikwetebeekanisa gye omuntu yaaba naaza kukwegyesa Baibuli, kandi orikugyendera aha bi orikwega. (Zab. 119:97, 99; Yoh. 17:17) Otaireho entebeekanisa y’okushoma Baibuli? Nookuratira entebeekanisa egyo, kubaasa kuhamya ngu waashoma Baibuli buri izooba?

10. Kimwe aha bintu by’omuhendo ebiri omu Baibuli ni kiiha?

¹⁰ Kimwe aha bintu by’omuhendo ebiri omu Baibuli n’okugira ngu erimu obutumwa obwagambirwe bantu abaareebire Yesu. Nikyo kitabo kyonka ekirikushoboorora gye ebi Yesu akukoreire. Waaba nooyega ebi Yesu yaagambire n’ebi yaakozire, obundi noija kwenda kumuhindura munywani waawe.

11. Niki ekirikubaasa kukuhwera kukunda Yehova?

¹¹ Yega kukunda Yesu, obwo noija kwongyera kukunda Yehova. Ahabw’enki? Ahabw’okugira ngu Yesu naayoreka emitwarize nk’eya Ishe omu muringo oguhikiriire. (Yoh. 14:9) N’ahabw’ekyo oku orikwongyera kwega ebirikukwata ahari Yesu, nikwo orikwija kwongyera kwetegyereza gye Yehova n’okumukunda. Teekateeka aha ku Yesu yaabaire naasaasibwa abarikugaywa, nk’abooro, abarwaire, n’enshoberwa. Kandi teekateeka n’aha buhabuzi burungi obu arikukuha, n’oku orikugasirwa waabugyenderaho.​—Mat. 5:1-11; 7:24-27.

12. Waayega ebirikukwata ahari Yesu, nibibaasa kukuhiga kukora ki?

¹² Noija kwongyera kukunda Yesu waateekateeka munonga aha ku yaayefeerereize kuba ekitambo kugira ngu tusaasirwe ebibi byaitu. (Mat. 20:28) Waayetegyereza ngu Yesu akaba ayeteekateekire kukufeera, nikibaasa kukuhiga kweteisa ebibi byawe, kandi oshabe Yehova okusaasirwa. (Byak. 3:19, 20; 1 Yoh. 1:9) Kandi waakunda Yesu na Yehova, nikikworobera kwenda kuba haihi n’abantu abarikutwaza nkaiwe.

13. Ni kintu ki eky’omuhendo eki Yehova akuhaire?

¹³ Yega kukunda abarikukunda Yehova. Ab’eka yaawe abatarikuheereza Yehova na banywani baawe aba ira, nibabaasa kuteetegyereza ahabw’enki oyehaireyo ahari Yehova. Nangwa nibabaasa n’okukuhiiganisa. Yehova naija kukuhwera arikukuha ekibiina ekirimu ab’eishe-emwe na banyaanyako. Waaguma haihi n’ab’eka yaawe egyo ey’eby’omwoyo, nibaija kukukunda kandi bakushagike. (Mak. 10:29, 30; Heb. 10:24, 25) Haahinguraho obwire, ab’eka yaawe nibabaasa kukwegaitaho omu kuheereza Yehova bakuratire emitindo ye.​—1 Pet. 2:12.

14. Nk’oku kiri omuri 1 Yohaana 5:3, ogasiirwe ota ahabw’okugyendera aha mitindo ya Yehova?

¹⁴ Yega kukunda emitindo ya Yehova n’okugigyenderaho. Otakamanyire Yehova, noobaasa kuba waabaire oyeteereireho emitindo eyaawe, kwonka hati nooreeba ngu emitindo ya Yehova niyo erikukirayo oburungi. (Zab. 1:1-3; shoma 1 Yohaana 5:3.) Teekateeka aha buhabuzi oburi omu Baibuli oburikuheebwa abashaija, abakazi, n’abaana. (Efe. 5:22–6:4) Oreebire eka yaawe erikugasirwa ahabw’okugyendera aha buhabuzi obu? Ahabw’okukuratira obuhabuzi bw’okuba omwegyendesereza omu kutoorana abanywani, oreebire ngu nooyongyera kugira emicwe mirungi? Hati ori omuntu orikushemererwa? (Enf. 13:20; 1 Kor. 15:33) Obundi noobaasa kugarukamu ebibuuzo ebyo ngu eego.

15. Noobaasa kukora ki waaba nooyenda obuhwezi omu kugyendera aha misingye ya Baibuli?

¹⁵ Obumwe nikibaasa kukugumira kumanya oku oine kugyendera aha misingye ya Baibuli ei orikwega. Egi niyo nshonga ahabw’enki Yehova naakoresa ekibiina kye kukuha ebitabo ebirikushoboorora Baibuli kukuhwera kutaanisa ekirungi aha kibi. (Heb. 5:13, 14) Waashoma ebitabo ebyo kandi okabyega, noija kureeba ngu birimu obuhabuzi oburikukora, kandi oburikuhikaana n’embeera yaawe, obundi kikuhigye kwenda kwirira haihi n’ekibiina kya Yehova.

16. Yehova atebeekaniise ata abaheereza be?

¹⁶ Yega kukunda ekibiina kya Yehova kandi okishagike. Yehova atebeekaniise abantu be yaabata omu bibiina, kandi Omwana we Yesu niwe mutwe gw’ebibiina ebyo. (Efe. 1:22; 5:23) Yesu atooraine guruupu nkye y’abashaija abashukirweho omwoyo gurikwera kwebembera omurimo ogu arikwenda ngu tukore obunaku obu. Abashaija aba Yesu akabeeta ‘omwambari omwesigwa kandi ow’obwengye,’ kandi obujunaanizibwa bwabo obw’okukuha eby’okurya by’omwoyo n’okukurinda nibabutwara nka bukuru munonga. (Mat. 24:45-47) Gumwe aha miringo ei omwambari omwesigwa arikworeka ngu naakufaho, n’okuhamya ngu abashaija abarikuhikiiriza ebirikwetengyesa baatooranwa kuba abariisa baawe omu by’omwoyo. (Isa. 32:1, 2; Heb. 13:17; 1 Pet. 5:2, 3) Abareeberezi nibaba beteekateekire kukora kyona ekirikubaasika kukugumya, n’okukuhwera kuguma noirira haihi Yehova. Kwonka kimwe aha bintu bikuru ebi barikubaasa kukukorera n’okukuhwera kwegyesa abandi ebirikukwata ahari Yehova.​—Efe. 4:11-13.

17. Kurugiirira aha Abarooma 10:10, 13, 14, ahabw’enki nitugambira abandi ebirikukwata ahari Yehova?

¹⁷ Hwera abandi kwega kukunda Yehova. Yesu akagambira abakuratsi be kwegyesa abandi ebirikukwata ahari Yehova. (Mat. 28:19, 20) Nikibaasika omuntu kworobera ekiragiro ekyo ahabw’okwenda kuhikiiriza omukoro. Kwonka waayongyera kukunda Yehova munonga, noija kwehurira nk’oku entumwa Petero na Yohaana baayehuriire. Bakagira bati: “Titurikubaasa kuhunama kutagamba ebi twareebire, n’ebi twahuriire.” (Byak. 4:20) Ti bintu bingi ebirikubaasa kutureetera kugira okushemererwa nk’okuhwera omuntu kukunda Yehova. Teekateeka aha kushemererwa kwingi oku omwegi wa Yesu Filipo aine kuba yaagizire, obu yaahwera Omwesiopia omukonwa kwega amazima agari omu Byahandiikirwe kandi akabatizibwa! Waatooreza Filipo okoorobera ekiragiro kya Yesu eky’okubuurira, nooyoreka butunu ngu nooyenda kuba omwe aha Bajurizi ba Yehova. (Shoma Abarooma 10:10, 13, 14.) Obwo, naiwe noobaasa kubuuza ekibuuzo nk’eki Omwesiopia yaabuurize: “Ekirikunzibira kubatizibwa niki?”​—Byak. 8:36.

18. Nituza kushwijuma ki omu kicweka ekirikukurataho?

¹⁸ Waacwamu kubatizibwa, eryo n’eidaara rikuru ahariiwe. Ahabw’okugira ngu okubatizibwa n’eidaara rikuru munonga, oine kwegyendesereza waaba nooshwijuma ebirikutwarirwamu. Niki eki oine kumanya aha bikwatiraine n’okubatizibwa? Oine kukora ki otakabatiziibwe na bwanyima y’okubatizibwa? Ebibuuzo ebyo nibiza kugarukwamu omu kicweka ekirikukurataho.