Oku Oine Kwegyesa Omwegi wa Baibuli Akahika aha Kubatizibwa​—Ekicweka ky’Okubanza

1. Ebiri omu 2 Abakorinso 3:1-3 nibituhwera bita kwetegyereza obujunaanizibwa bwaitu bw’okuhwera omuntu akahika aha kubatizibwa? (Reeba ekishushani ekiri aha kipampagare.)

NOOYEHURIRA ota waareeba omwegi wa Baibuli kuruga omu kicweka ky’ekibiina kyanyu naabatizibwa? Buzima nikikushemeza! (Mat. 28:19) Kandi waaba niiwe waamwegyeise, buzima ka nikishemeza kumureeba naabatizibwa! (1 Tes. 2:19, 20) Abeegi ba Yesu abasya ababatiziibwe ‘n’ebaruha z’okusiimisa’ nari ez’okuhamya abaabeegyeise hamwe n’ekibiina kyona.​—Shoma 2 Abakorinso 3:1-3.

2. (a) Ni kibuuzo ki ekikuru eki twine kuteekateekaho, kandi n’ahabw’enki? (b) Okwegyesa Baibuli nikimanyisa ki? (Reeba obugambo obw’ahansi.)

² Ni kirungi kureeba ngu omu myaka ena ehingwire, tubaire nitwegyesa abeegi ba Baibuli nka 10,000,000 b buri kwezi. Kandi omu myaka niyo emwe, abeegi abarikurenga 280,000 bakaba nibabatizibwa buri mwaka kuba Abajurizi ba Yehova kandi abeegi ba Yesu Kristo. Nitubaasa kuhwera tuta abeegi ba Baibuli abo boona kuhika aha kubatizibwa? Obu Yehova akihaire abantu obwire n’omugisha gw’okuba abeegi ba Kristo, nitwenda kukora kyona ekirikubaasika kubahwera kurahuka kuhika aha kubatizibwa nk’oku kirikubaasika. Obwire buriyo nibuhwayo!​—1 Kor. 7:29a; 1 Pet. 4:7.

3. Nituza kushwijuma ki omu kicweka eki aha bikwatiraine n’okwegyesa Baibuli?

³ Kubaasa kuhikiiriza ekyetengo kikuru eki, ofiisi z’amataagi zikabuuzibwa oku turikubaasa kuhwera abeegi ba Baibuli kutunguuka kuhika aha kubatizibwa. Omu kicweka eki n’omu kirikukurataho, nituza kureeba eki turikubaasa kwegyera ahari baapayoniya, abamiisani, n’abareeberezi abarikutaayaayira ebibiina abamazire obwire barikubuurira.c (Enf. 11:14; 15:22) Nibashoboorora eki abeegyesa n’abeegi ba Baibuli baine kukora, okwegyesa Baibuli kubaasa kurugamu ebirungi. Omu kicweka eki, nituza kureeba ebintu bitano ebi buri mwegi aine kukora kubaasa kutunguuka akahika aha kubatizibwa.

YEGYESA OMWEGI BURI SAABIITI

4. Twine kwijuka ki aha bikwatiraine n’abeegi abu turikwegyeseza aha miryango yaabo bemereire?

⁴ Ab’eishe-emwe na banyaanyazi-itwe baingi nibeegyeseza abeegi ba Baibuli aha miryango yaabo bemereire. N’obu egi eraabe eri entandikiro y’okukundisa omuntu Baibuli, okwega oku nikutwara obwire bugufu, kandi nikubaasa kutabaho buri saabiiti. Kwonka kubaasa kwongyera kureetera omuntu kukunda kwega, ababuurizi abamwe nibashaba omwegi enamba ye y’esimu reero bamuteerera nari bamwoherereza Ebyahandiikirwe omu bwire obundi. Nibabaasa kuguma nibakora bati kumara ameezi atakahindukire omwegi murungi wa Baibuli. Mbwenu shi omwegi ogu buzima naija kutunguuka ayeheyo kandi abatizibwe yaaba atatairemu maani n’obwire kwega Ekigambo kya Ruhanga? Obundi ngaaha.

5. Yesu akagamba ki omuri Luka 14:28-33, ebirikubaasa kutuhwera omu murimo gwaitu gw’okuhindura abantu abeegi?

⁵ Eizooba rimwe, Yesu akaha eky’okureeberaho kworeka oku omuntu aine kubariirira ekirikutwarirwamu okuba omwegi we. Akagamba aha muntu orikwenda kwombeka omunaara n’omugabe orikwenda kutenga orutaro. Yesu akagira ngu omwombeki aine kubanza “kushutama akabariirira” kubaasa kuheza omunaara, kandi omugabe aine kubanza “kushutama, akeehanuuza” kureeba yaaba eihe rye niribaasa kuhikiiriza ekigyendererwa kye. (Shoma Luka 14:28-33.) Omu muringo nigwo gumwe, Yesu akaba naamanya ngu omuntu orikwenda kuba omwegi we aine kushwijuma gye omu bwegyendesereza eki kirikumanyisa okumukuratira. Ahabw’enshonga egyo, twine kuhiga abarikwenda kuba abeegi ba Yesu kwikiriza kwega buri saabiiti. Ekyo nitubaasa kukikora tuta?

6. Nikibaasa kutwetengyesa kukora ki kugira abeegi abarikutunguuka?

⁶ Tandika orikwongyera aha bwire obu orikumara orikwegyeseza abeegi aha muryango. Obundi noobaasa kwongyera aha Byahandiikirwe ebi orikugaaniira nawe buri murundi ogu orikuzayo. Nyineeka yaikiriza ngu mugaaniire kumara obwire buraingwa, mubuuze yaaba nimubaasa kutunga omwanya mukashutama mukagaaniira gye. Eki omwegi araagarukyemu, nikiija kworeka yaaba naatwara okwega Baibuli nka kikuru. Bwanyima, kubaasa kumuhwera kutunguuka juba, noobaasa n’okumubuuza yaaba ayeteekateekire kwega emirundi ebiri buri saabiiti. Kwonka, omwegi aine kukora ekirikukira aha kwega omurundi gumwe nari ebiri buri saabiiti.

TEBEEKANISA GYE BURI KUZA KWEGYESA

7. Omwegyesa naabaasa kutebeekanisa gye ata buri kuza kwegyesa omwegi?

⁷ Iwe omwegyesa, oine kutebeekanisa gye buri kuza kwegyesa omwegi. Noobaasa kutandika orikushoma ebi murikuza kwega otwariiremu n’ebyahandiikirwe. Yetegyereze gye enshonga enkuru. Teekateeka aha mutwe gw’eishomo, emitwe emikye, ebibuuzo, ebyahandiikirwe ‘by’okushoma,’ ebishushani, na vidiyo ezirikubaasa kuhwera omu kushoboorora enshonga. Reero orikwijuka okubaasa kw’omwegi, teekateeka bukiri kare oku oraashoboorore enshonga omu muringo gworobi, kugira ngu omwegi waawe abaase kwetegyereza n’okugyendera aha bi waamwegyesa.​—Neh. 8:8; Enf. 15:28a.

8. Ebigambo by’entumwa Paulo ebiri omu Abakolosai 1:9, 10 nibitwegyesa ki aha bikwatiraine n’okushabira abeegi baitu ba Baibuli?

⁸ Omu kutebeekanisa kwawe, shaba Yehova aha bikwatiraine n’embeera y’omwegi waawe. Shaba Yehova kukuhwera kwegyesa orikwegamira ahari Baibuli omu muringo oguraahikye omwegi aha mutima. (Shoma Abakolosai 1:9, 10.) Teeraho kumanya kare ekintu kyona ekirikubaasa kugumira omwegi kwetegyereza nari kwikiriza. Guma noijuka ngu ekigyendererwa kyawe n’okumuhwera kutunguuka kuhika aha kubatizibwa.

9. Omwegyesa naabaasa kuhwera ata omwegi wa Baibuli kwetebeekanisiza okwega? Shoboorora.

⁹ Twine amatsiko ngu waaguma nooyegyesa omwegi wa Baibuli butoosha naija kusiima eki Yehova na Yesu baakozire, kandi agire ekihika ky’okwenda kwega ebirikukiraho. (Mat. 5:3, 6) Omwegi kubaasa kugasirwa omu bwijwire omu kwega, aine kuta omutima aha bi arikwega. Kumuhwera kukora ekyo, mushoboororere ngu ni kikuru kutebeekanisa bukiri kare arikushoma ebi arikuza kwega, kandi akateekateeka aha ku birikumukwataho. Omwegyesa naabaasa kuhwera ata? Tebeekanisa eishomo ryona ori n’omwegi waawe kumworeka oku kirikukorwa.d Mushoboororere oku arikubaasa kutunga eby’okugarukamu butunu kuruga omu bi atebeekaniise, kandi mworekye n’oku okushaza aha bigambo bikuru kirikwija kumuhwera kwijuka eky’okugarukamu. Reero mushabe kuha eky’okugarukamu arikukoresa ebigambo ebye. Yaakora atyo, noija kubaasa kumanya ku araabe yaayetegyereza gye ebi waamwegyesa. Kwonka hariho ekindi eki orikubaasa kuhiga omwegi waawe kukora.

MWEGYESE KUHURIZANA NA YEHOVA BURI IZOOBA

10. Ahabw’enki ni kikuru kushoma Baibuli buri izooba, kandi niki ekirikwetengyesa kubaasa kugasirwa omu kushoma Baibuli?

¹⁰ Oyihireho omwegi kwega buri saabiiti naija kugasirwa yaagira ebintu ebi yaakora ahabwe buri izooba. Aine kuhurizana na Yehova. Ata? Arikuhurikiza Yehova kandi akagira n’ebi yaamugambira. Naabaasa kuhurikiza Ruhanga arikushoma Baibuli buri izooba. (Yos. 1:8; Zab. 1:1-3) Mworekye “Entebeekanisa y’Okushoma Baibuli” ei arikubaasa kwiha aha jw.org.e Kwonka kubaasa kumuhwera kugasirwa gye omu kushoma Baibuli, muhigye kuteekateeka aha bi Baibuli erikwegyesa ahari Yehova, n’oku arikubaasa kugyendera aha bi arikwega.​—Byak. 17:11; Yak. 1:25.

11. Omwegi naabaasa kwega kushaba gye ata, kandi ahabw’enki ni kikuru kushaba Yehova emirundi mingi?

¹¹ Higa omwegi waawe kugambira Yehova eki arikwenda arikushaba buri izooba. Shabira omwegi waawe oyihire aha mutima orikuza kutandika kumwegyesa na bwanyima y’okumwegyesa. Yaaguma naahurira oku orikushaba, naija kwega kushaba kuruga aha mutima gwe, kandi ashabe Yehova butunu kurabira omu iziina rya Yesu Kristo. (Mat. 6:9; Yoh. 15:16) Teera akashushani oku okushoma Baibuli buri izooba (okuhurikiza Yehova) n’okushaba (okugambira Yehova) biraahwere omwegi wa Baibuli kwongyera kwirira haihi Yehova! (Yak. 4:8) Omwegi yaakora ebi byona, naija kutunga ekindi ekiramuhitsye aha kwehayo n’okubatizibwa.

MUHWERE KUKORA OMUKAGO OGWE AHABWE NA YEHOVA

12. Omwegyesa naabaasa kuhwera ata omwegi we kugira omukago na Yehova?

¹² Ebi omwegi arikwega yaaba naayega Baibuli tibishemereire kuza omu biteekateeko bye honka beitu n’omu mutima gwe. Ahabw’enki? Omutima gwaitu ogurikutwariramu ebyetengo byaitu, enyehurira, n’emiteekateekyere nigutuhiga kugira eki twakora. Yesu akaba naahikaanisa ebiteekateeko n’abantu omu muringo gw’obwengye kubahwera kwetegyereza enshonga. Kwonka abantu bakamukuratira ahabw’okugira ngu akaba naabahika n’aha mutima. (Luk. 24:15, 27, 32) Omwegi waawe aine kureeba Yehova nk’Owaabuzima, ou arikubaasa kugira nawe omukago, kandi akamutwara nka Ishe, Ruhanga we, kandi Munywani we. (Zab. 25:4, 5) Waaba nooyegyesa omwegi waawe Baibuli, ta omutima aha mitwarize mirungi ya Ruhanga. (Kur. 34:5, 6; 1 Pet. 5:6, 7) Yaaba nimugaaniira aha nshonga ki, ta omutima aha burungi bwa Yehova. Hwera omwegi wa Baibuli kwetegyereza emitwarize mirungi ya Yehova nka rukundo ye, embabazi ze, n’esaasi ze. Yesu akagira ngu ‘ekiragiro kikuru kandi eky’okubanza’ n’okukunda Yehova “Ruhanga waawe.” (Mat. 22:37, 38) Teeraho kuhwera omwegi waawe kukunda Ruhanga kuruga aha mutima gwe.

13. Ha eky’okureeberaho ekirikworeka oku orikubaasa kuhwera omwegi wa Baibuli kwega aha mitwarize ya Yehova.

¹³ Waaba noogaaniira n’omwegi waawe, yoreka enyehurira ezirikukureetera kukunda Yehova. Eki nikibaasa kuhwera omwegi waawe kumanya ngu nawe aine kugira omukago murungi na Ruhanga. (Zab. 73:28) Nk’eky’okureeberaho, omu bi murikwega shi harimu ekyahandiikirwe nari ebigambo ebirikukureetera kukwatwaho ebirikugamba ahari Yehova, rukundo ye, obwengye bwe, oburingaaniza bwe, nari amaani ge? Bigambire omwegi, kandi mumanyise ngu niyo emwe aha nshonga nyingi ezirikukureetera kukunda Tataitwe ow’omu iguru. Hariho ekindi kintu eki omwegi wa Baibuli aine kukora kubaasa kutunguuka akahika aha kubatizibwa.

MUHIGYE KUZA OMU NTEERANE

14. Abaheburaayo 10:24, nihatugambira ki aha bikwatiraine n’enteerane z’ekibiina ekirikubaasa kuhwera omwegi wa Baibuli kutunguuka?

¹⁴ Twena nituba nitwenda ngu abeegi baitu batunguukye bahikye aha kubatizibwa. Omuringo gumwe mukuru gw’okubahwera n’okubahiga kwija omu nteerane. Ababuurizi abatwire nibeegyesa, nibagira ngu abeegi abarikurahuka kwija omu nteerane nibatunguuka ahonaaho. (Zab. 111:1) Abamwe nibashoboororera abeegi ngu nibatunga kimwe kya kabiri ky’obwegyese bwa Baibuli kurabira omu kwega, reero kimwe kya kabiri ekindi bakitungira omu nteerane. Shoma Abaheburaayo 10:24, 25 ori n’omwegi, reero omushoboororere oku arikwija kugasirwa yaaza omu nteerane. Mworekye vidiyo Niki Ekirikukorerwa aha Kyombeko ky’Obukama?f Hwera omwegi wa Baibuli kumanya ngu okwija omu nteerane buri saabiiti n’ekintu kikuru ahariwe.

15. Nitubaasa kukora ki kuhiga omwegi kuguma naija omu nteerane atarikwosha?

¹⁵ Noobaasa kukora ki omwegi waawe ku araabe atakaizire omu ruteerane rwona nari atarikwija butoosha? Oine omuhimbo mugambire aha bi oyegire omu ruteerane. Eki nikibaasa kumuhiga kukira okumweta bweta kwija omu nteerane. Muhe ebi turikukoresa omu nteerane nka Omunaara gw’Omurinzi nari Obuheereza Bwaitu n’Oku Turikutwaza Akatabo k’Okukoresa. Mworekye ebi turikuza kwega omu ruteerane orurikukurataho, kandi omubuuze eki we arikureeba ngu nikibaasa kuba nikishemeza. Ebi omwegi waawe araahurire kandi akareeba nibiija kuba nibikirira kimwe ekintu kyona eki arareebire nari arahuriire omu nteerane z’ediini ezindi zoona. (1 Kor. 14:24, 25) Naija kushangayo abantu abarikutwaza gye abu arikubaasa kutooreza, kandi abaraamuhwere kutunguuka akahika aha kubatizibwa.

16. Niki ekirikwetengyesa kubaasa kwegyesa abeegi ba Baibuli kuhika aha kubatizibwa, kandi nituza kwega ki omu kicweka ekirikukurataho?

¹⁶ Nitubaasa kwegyesa tuta abeegi ba Baibuli kuhika aha kubatizibwa? Nitubaasa kuhwera buri mwegi kutwara okwega kwe nka kikuru turikumuhiga kwega buri saabiiti n’okutebeekanisa gye buri kuza kwega. Nitwenda kumuhiga kuguma naahurizana na Yehova buri izooba n’okugira omukago murungi nawe. Nitwenda kuhiga omwegi kuguma naija omu nteerane z’ekibiina. (Reeba akabokusi aha rupapura 12, “Eki Abeegi Baine Kukora Kutunguuka Kuhika aha Kubatizibwa.”) Kwonka nk’oku ekicweka ekirikukurataho kiraashoboorore, hariho ebindi ebintu bitaano ebi abeegyesa baine kukora kuhwera abeegi ba Baibuli kuhika aha kubatizibwa.