Noijuka?

Oshomire n’obwegyendesereza Eminaara y’Omurinzi ey’omwaka ogu? Reeba yaaba noobaasa kugarukamu ebibuuzo ebi:

Tushemereire kutwariza tuta abashukirweho omwoyo gurikwera?

Nitusiima okwikiriza kwabo, kwonka, titurikubahimbisiriza. Nitwetantara kubatwariza nka baarurangaanwa. (Yud. 16) Titurikubabuuza ebirikukwata aha matsiko gaabo.​—w20.01, rup. 29.

Niki ekishemereire kukuhamiza ngu Yehova naakumanya gye?

Baibuli neeyoreka ngu akakureeba n’okuzaarwa otakazairwe. Naahurira okushaba kwawe. Naamanya ebiteekateeko byawe n’ebiri omu mutima gwawe, kandi ebikorwa byawe nibimukwataho. (1 Bus. 28:9; Enf. 27:11) Akweyiriize haihi.​—w20.02, rup. 12.

Ni by’okureeberaho ki ebirikworeka obu twine kugamba n’obu tutaine kugamba?

Nitushemererwa kugamba ahari Yehova. Nitugamba twareeba omuntu ayorekyeire kukora ekigwire. Abareeberezi nibagamba barikuha obuhabuzi oburikwetengyesa. Titurikugamba obushonshorekye bw’omurimo gwaitu omu mahanga ahu gwemereziibwe nari kushaba abandi kutugambira. Titurikugamba emibonano y’abandi.​—w20.03, rup. 20-21.

Enzigye z’omuri Yoeli eshuura 2 nizitaana zita n’ez’omu Okushuuruurwa eshuura 9?

Yoeli 2:20-29 nihagira ngu Ruhanga naabinga enzigye kandi naaraganisa ‘enshumbuushano’ ahabw’ebintu ebi enzigye zaasiisire. Bwanyima, Ruhanga naashuka omwoyo gwe ogurikwera. Ebyo bikahikiirira obu Abababulooni baataahirira Israeli na bwanyima. Okushuuruurwa 9:1-11 nihagamba aha bashukirweho omwoyo gurikwera abarikuranga emanja ezi Ruhanga acwereire ensi egi embi, ekirikureetera abashagiki baayo kwehurira kubi.​—w20.04, rup. 3-6.

N’oha Omugabe wa bukiizi-bwa-bumosho obunaku obu?

Russia n’abashagiki baayo. Nibanyangaraza abaheereza ba Ruhanga, barikwemereza omurimo gwabo gw’okubuurira kandi nibooreka ngu nibabanga. Omugabe wa bukiizi-bwa-bumosho atwire naaharangatana n’owa bukiizi-bwa-buryo.​—w20.05, rup. 13.

Mbwenu shi emitwarize eri omu Abagalatia 5:22, 23 niyo yonka ei omwoyo gurikwera gurikutuhwera kugira?

Ngaaha. Omwoyo gurikwera nigutuhwera kugira emitwarize endiijo mirungi, nk’okuhikiirira. (Efe. 5:8, 9)​—w20.06, rup. 17.

Ni kabi ki akarikubaasa kuruga omu kuta ebirikukukwataho aha mikura y’empurizana?

Ebi orikuta aha mikura y’empurizana nibibaasa kworeka ngu nooyehimbisa kandi ngu tori mucureezi.​—w20.07, rup. 6-7.

Ababuurizi Abakristaayo nibabaasa kwegyera ki aha bajubi b’eby’enyanja?

Nibajuba ahari eby’enyanja n’obu barikubaasa kubibona. Batendekirwe kukoresa ebikoreso ebihikire. Kandi nibagira obumanzi bw’okukorera omu mbeera zigumire. Nitubaasa kukora nikyo kimwe omu buheereza bwaitu.​—w20.09, rup. 5.

Nitubaasa kuhwera tuta abeegi ba Baibuli kwongyera kukunda Yehova?

Twine kubahiga kushoma Baibuli buri izooba n’okuteekateeka aha bi barikushoma. Kandi twine n’okubeegyesa kushaba.​—w20.11, rup. 4.

Ni baahi abarikutwarirwa omu bigambo ebi: ‘Omuri Kristo boona nibaija kuhindurwa abahuriire’?​—1 Kor. 15:22.

Entumwa Paulo akaba atarikugira ngu buri muntu naija kuzoorwa. Akaba naamanyisa Abakristaayo entoore, “abaayeziibwe omuri Kristo Yesu.” (1 Kor. 1:2; 15:18)​—w20.12, rup. 5-6.

Entoore nibaija kukora ki bwanyima y’okuhindurwa “omu kaanya kakye, nk’ak’okuhumbya eriisho, aha nzamba ey’aha mperu”?​—1 Kor. 15:51-53.

Bari hamwe na Kristo nibaija kutegyeka abantu barikukoresa enkoni y’ekyoma. (Kush. 2:26, 27)​—w20.12, rup. 12-13.