Oku Okushaba Kurikubaasa Kukugasira

Obu Pamela yaabaire arwaire endwara y’amaani, akasherura obuhwezi aha bashaho abahangu. Kwonka, akashaba Ruhanga kumugumya kutunga amaani g’okugumisiriza. Okushaba shi kukamuhwera?

Pamela naagira ati: “Obu naabaire nintunga obujanjabi bw’ekookoro, obwire obwingi nkaba ngiramu okutiina. Kwonka ku naabaire nshaba Yehova Ruhanga, nkaba mpurira naikaikana reero nteekateeka gye. Na hati nkyine obusaasi obutarikutuuza, kwonka okushaba nikumpwera kuguma nyine emiteekateekyere mirungi. Abantu ku barikumbuuza oku ndikwehurira, nimbagira nti: ‘Tindikwehurira gye, kwonka nyine okushemererwa!’”

Eki tikirikumanyisa ngu twine kubanza twarwara reero tukabona kushaba. Twena twine oburemeezi, obuhango n’obukye, kandi butoosha twine kuhwerwa kubaasa kubwemera. Okushaba shi nikuhwera?

Baibuli neegira eti: ‘Yegyekyera [Yehova] omutwaro gwawe, nawe naija kuguma naakukwatirira, tarikwija kwikiriza ohikiriire kutengyetsibwa.’ (Zaaburi 55:22) Ekyo ka nikihuumuriza! Okushaba nikubaasa kukuhwera kuta? Waashaba Ruhanga omu muringo oguhikire, naakuhwera kwemera oburemeezi bwawe.—Reeba akabokusi “Oku Orikugasirwa Waashaba.”

Oku Orikugasirwa Waashaba

Obusingye bw’omu biteekateeko

‘Manyisa Ruhanga ebi orikwetenga, kandi obusingye bwa Ruhanga oburengire okwetegyereza kw’omuntu weena, nibuza kukuguma burinde omutima gwawe n’obwengye bwawe omuri Kristo Yesu.’ (Abafilipi 4:6, 7) Waagambira Ruhanga ebirikukwerarikiriza, naakuhwera kwikaikaina n’okucwamu gye waaba oine amaganya.

Obwengye oburikuruga ahari Ruhanga

‘Omuriimwe ku haraabe harimu obuzirwe obwengye, abushabe Ruhanga, orikuha boona n’omutima ogutarikwima, n’obu kwakuba okweshaanya, kandi naija kubuheebwa.’ (Yakobo 1:5) Twaba tutarikumanya eki twine kukora, nitukira kucwamu kubi. Waashaba Ruhanga obwengye, naabaasa kukwijutsya emisingye mingi eri omu Kigambo kye, Baibuli.

Amaani n’okuhuumurizibwa

“Amaani agarikukirira kimwe n’aga Ruhanga, ti gaitu.” (2 Abakorinso 4:7) Ahabw’okugira ngu ni Ruhanga ow’Obushoboorozi Bwona, naabaasa kukuha amaani agarikwetengyesa kwemera oburemeezi bwawe nari kukuhangaana waaba noogyezibwa. (Isaaya 40:29) Kandi Baibuli neeyeta Yehova “Ruhanga ow’okuhuumuza kwona.” Orikutuhuumuriza “omu busaasi bwaitu bwona.”—2 Abakorinso 1:3, 4.