Okukora Buri Kimwe Ntebirwe Yehova

Nkazaarwa Okwakataano 19, 1940, omu tauni ya Amioûn, omuri Lebanon. Bwanyima y’emyaka mikye, eka yaitu ekaza omu rurembo Tripoli, ahu naakuriire omu ka nungi erikumanya Yehova Ruhanga kandi erikumukunda. Aha baana bataano niinye naabaire nimpererukayo obuto, abaishiki bashatu n’aboojo babiri. Abazaire bangye, okwebaisaho bakaba nibakuta omu mwanya gwa kabiri. Tukaba nitwebembeza okwega Baibuli, enteerane z’Ekikristaayo, n’okuhwera abandi kumanya Ruhanga.

Ekibiina kyaitu kikaba kirimu abashukirweho omwoyo gurikwera baingi. Omwe aharibo akaba ari Michel Aboud, owaabaire naayebembera okwega ekitabo. Niwe yaabandize kureeta amazima omuri Lebanon omu myaka ya 1920, bwanyima y’okugeega omuri New York. Okukira munonga ninyijuka oku yaafiireyo kuhwera Anne na Gwen Beavor abaabaire barugire omu Ishomero rya Gilead. Bakaba banywani baitu ab’aha mara. Bwanyima y’emyaka mingi, nkashemererwa ku naareebire Anne omuri United States. Ku haahingwireho obwire, nkareeba Gwen aherize kutaatsya Wilfred Gooch, kandi bombi bakaba nibaheereza aha ofiisi y’eitaagi aha Beseeli ya London, omuri England.

OMURIMO GW’OKUBUURIRA OMURI LEBANON

Nkiri omunyeeto, omuri Lebanon hakaba hariyo Abajurizi ba Yehova bakye. Kwonka ebi twabaire nitumanya omu Baibuli tukaba nitubibuurira abandi twine omujinya. Eki tukaba nitukikora n’obu abeebembezi b’ediini abamwe baabaire nibatuhakanisa. Kandi ninyijuka gye bimwe ebyatuhikireho.

Eizooba rimwe, nyowe na munyaanyazi Sana tukaba nitubuurira omu kyombeko kimwe. Omwebembezi w’ediini akaija yaatushanga ahu twabaire nitubuurira omu kyombeko ekyo. Nikireebeka haine owaamumanyiise. Akatandika kujuma munyaanyazi. Akatabuka reero yaatsindika Sana yaatsirumuka aha matembezo yaahutaara. Haine owaateereire omuporiisi esimu akaija reero akahamya ngu Sana yaatunga obuhwezi. Omwegyesa w’ediini ogwo akatwarwa aha poriisi baashanga aine embundu. Mukuru wa poriisi akamubuuza ati: “Beitu iwe ori muntu wa muringo ki? Ori omwegyesa w’ediini nari orikwebembera abantu kureetaho akatabanguko?”

Ninyijuka n’obu ekibiina kyaitu kyapangisa baasi kuza omu tauni eyehereire kubuurirayo amakuru marungi. Buri kimwe kikaba nikigyenda gye kuhitsya obu omwebembezi w’ediini yaamanyire eki turikukora reero akarundaana abantu kureetaho akajagararo. Bakatunyangaraza, nangwa baaturekyera n’amabaare, tata yaahutaara. Ninyijuka ndikumureeba arikujwererana aha maisho. Akagaruka omu baasi na maawe, naitwe twena twabakurata tutiinire. Kwonka tindikwija kwebwa eki maawe yaagambire, arikushushura tata eshagama. Akagira ati: “Nyabura ‘we Yehova, basaasire. Tibarikumanya eki barikukora.”

Obundi tukaza kutaayaayira abanyabuzaare omu tauni y’owaitu. Omu ka ya tatenkuru, tukashangayo bishopu orikumanywa. Bishopu akaba naamanya ngu abazaire bangye n’Abajurizi ba Yehova. Akanshoroora omu bandi n’obu ndaabe naabaire nyine emyaka mukaaga yonka. Akambuuza ati: “Iwe, ahabw’enki otabatiziibwe?” Nkamugarukamu ngu nkiri omwana kandi ngu kubaasa kubatizibwa nyine kubanza naayega Baibuli, kandi nkahamya okwikiriza kwangye. Ahabw’okutakunda eki naagarukiremu, akagambira tatenkuru ngu naamugaya.

Ebintu nk’ebyo ebibi bikaba biri bikye. Okutwarira hamwe, abantu ba Lebanon nibakunda abantu kandi n’efura. N’ahabw’ekyo tukaba nitugaaniira n’abantu ahari Baibuli, twine n’abeegi ba Baibuli barungi.

OKUCWAMU KUZA OMU IHANGA ERINDI

Obu naabaire ninshoma, ow’eishe-emwe muto kuruga Venezuela akaija omuri Lebanon. Akaba naija omu nteerane z’ekibiina kyaitu kandi bwanyima akatandika kuriima munyaanyazi Wafa. Bwanyima, bakataaha hamwe omu bushwere baaza kutuura Venezuela. Omu baruha ze, Wafa akahiga tata kufurura eka yoona ngu baze kutuura Venezuela. Ekyo akakikora ahabw’okugira ngu akaba atwiniire orushusho ruhango munonga. Tukarugaho twikiriza okushaba kwe twafuruka!

Tukahika Venezuela omuri 1953 kandi twatuura Caracas, haihi n’ekikaari ky’omwebembezi w’eihanga. Ahabw’okuba omwojo muto, obumwe nkaba ninkira kumushamariira emotoka ye yaaba neehingura aha kwaitu. Kwonka kikaba kitoorobi abazaire bangye kumanyiira embeera y’eihanga risya, orurimi, entwaza, eby’okurya, n’embeera y’obwire. Nangwa, nibwo baabaire nibatandika kumanyiira embeera reero hakagira ekintu kibi ekyabaho.

OKUGWERWA AKAGWE

Tata akatandika kurwararwara. Eki kikatushobera, ahakuba akaba ari omushaija ogumire kandi oine amagara marungi. Tukaba tutarikwijuka turikumureeba arwaire. Bwanyima bakamucebera bashanga aine ekookoro y’ekikuruma, reero baamushemeza. Eky’obusaasi, ku haahingwireho saabiiti emwe yaafa.

Kigumire kutunga ebigambo by’okushoboorora gye oku ekyo kyatucwire entegye. Nkaba nyine emyaka 13 yonka. Tukakangarana kandi okaba nooshusha oti twabandamirwa eiguru. Kumara obwire, kikagumira maawe kwikiriza ngu iba takiriho. Kwonka, tukeetegyereza ngu twine kugumizamu nitugyenda omu maisho, kandi Yehova akatuhwera kugumira embeera. Aha myaka 16, nkaheza emishomo yangye omuri Caracas, kandi nkaba nyine ekihika ky’okuhwera eka yangye.

Bwanyima y’obwire, munyaanyazi Sana akashwerwa Rubén Araujo, owaabaire arugire omu Ishomero rya Gileadi kandi akaba agarukire Venezuela. Bakacwamu kuza omuri New York. Ab’eka yangye ku baacwiremu ngu nze aha yunivasite, nkaba nimbaasa kushomerayo kandi nyine n’ah’okuraara. Munyaanyazi na muramu wangye bakampwera munonga omu by’omwoyo obu naabaire nintuura nabo. Ekindi, ekibiina kya Brooklyn eky’Orusipania kikaba kirimu ab’eishe-emwe baingi abakuzire omu by’omwoyo. Babiri aharibo bakaba banywani bangye Milton Henschel na Frederick Franz; bombi abaabaire nibaheereza aha Beseeli ya Brooklyn.

Omwaka gw’okubanza aha yunivasite omuri New York guri haihi kuhendera, nkatandika kuteekateeka aha bigyendererwa byangye. Nkaba naashomire ebicweka by’Omunaara gw’Omurinzi kandi naabiteekateekireho ebirikugamba aha ku Abakristaayo baine kutaho ebigyendererwa birungi. Nkaba nindeeba oku baapayoniya n’Ababeseeli omu kibiina bashemereirwe, kandi nkaba ninyegomba kuba nkabo. Kwonka, nkaba ntakabaire Omukristaayo obatizibwe. Omu bwire bukye nketegyereza obukuru by’okwehayo ahari Yehova. N’ahabw’ekyo nkakikora kandi naateera orutambwe rukuru naabatizibwa Okwakashatu 30, 1957.

OKUCWAMU KUKURU

Ku naaherize kubatizibwa, nkateekateeka aha kuteera orundi rutambwe rw’okutaaha omu buheereza obw’obutwire. Nkaba niinyendera kimwe kuba payoniya, kwonka nkaba nindeeba ngu nikiija kungumira. Nkaba nimbaasa kuringaaniza nta obuheereza obu n’emishomo yangye aha yunivasite? Nyowe n’eka yangye tukaba nitukira kuhandiikirana amabaruha aha bikwatiraine n’okwemereza emishomo yangye nkagaruka Venezuela, kuba payoniya.

Nkagaruka Caracas omu Kwamukaaga 1957. Kwonka, nkaba nindeeba ngu eka yaitu teri mu mbeera nungi. Bakaba nibenda omuntu ondiijo kubashagika omu by’entaatsya. Mbwenu shi nkaba nimbaasa kuhwera nta? Nkaheebwa omurimo gwa banka, kwonka nabwo nkaba ninkyenda kuba payoniya. Nangwa eki nikyo kyandeeteire kugaruka owaitu. Nkaba mmaririire kukora byombi. Kumara emyaka mingi, nkaba ndi payoniya kandi ndikukora n’omu banka. Nkaba ninyecurenga munonga kandi nshemereirwe!

Nkongyera kushemererwa, ku naataahire omu bushwere na Sylvia omwishiki murungi Omukristaayo kuruga German owaabaire naakundira kimwe Yehova. We n’abazaire be bakaba bafurukiire Venezuela. Bwanyima, tuzaara abaana babiri, mutabani waitu, Michel (Mike), na muhara waitu, Samira. Kandi nkaba nyine n’obujunaanizibwa bw’okureeberera maawe. Akaija kutuura naitwe. N’obu ndaabe naarekyeire aho kuba payoniya kubaasa kureeberera eka, nkagumizamu nyine omutima gw’obwapayoniya. Nyowe na Sylvia omu kihuumuro tukaba nitukira kuheereza nka payoniya abahwezi.

EIDAARA RIKURU ERINDI

Abaana bakaba bakiri omu ishomero obu naateekateeka aha ntwaza yangye nk’oku naagamba aha kutandika kw’ekicweka eki. Amazima gari ngu embeera zangye zikaba ziri gye, kandi abu naabaire ninkora nabo omu banka bakaba niibampa ekitiinisa. Kwonka nabwo, nkaba niinyenda ngu baandeebe nk’omuheereza wa Yehova. Eizooba eryo nkaguma ninkiteekateekaho. N’ahabw’ekyo nyowe n’omukazi wangye, tukashutama ahansi twagaaniira aha by’entaatsya byaitu. Okureka omurimo gwa banka, kikaba nikimanyisa ngu ninyija kuheebwa omukiimba gw’esente. Ahabw’okuba tukaba tutaine mabanja, tukaba nituteekateeka ngu twayorobya embeera zaitu, nitwija kuba twine esente zirikumara kutubaisaho kumara akaire.

Kikaba kitoorobi kuteera orutambwe orwo, kwonka omukundwa wangye na maawe bakanshagika. N’ahabw’ekyo nkaba ninza kugaruka omu buheereza bw’obutwire. Kikanshemeza munonga! Nkaba ndi omu muhanda murungi. Omu bwire bukye, tukatunga amakuru agaatutangaarize twena.

EKYABAIREHO TUTETEEKATEEKIRE!

Eizooba rimwe omushaho waitu akatuhamiza ngu Sylvia aine enda. Eki twena kikatutangaaza! Ekyo kikanshemeza munonga, kwonka nabwo nkateekateeka aha rutambwe oru naabaire nteire orw’okuba payoniya. Mbwenu shi eki kikaba nikiija kukwata kita aha kuba payoniya? Ahonaaho tukahindura omu biteekateeko byaitu n’enyehurira, kandi twatandika kugira ekihika ky’okureeberera omuntu ondiijo omu ka yaitu. Kandi shi entebeekanisa ezindi ezi naabaire nyine?

Bwanyima y’okukigaaniiraho, tukacwamu kuhamira aha ntebeekanisa yaitu ey’okubanza. Mutabani waitu Gabriel akazaarwa omu Kwakana 1985. Kwonka nabwo, nkarekura omurimo gwa banka kandi naaba payoniya omu Kwamukaaga 1985. Bwanyima, nkatunga omugisha gw’okuheereza n’Akakiiko k’Eitaagi. Kwonka ofiisi y’eitaagi ekaba etari omuri Caracas, ekirikumanyisa ngu nkaba nyine kugyenda mahiro nka 50 ndikugaruka omuka kumara ebiro bibiri nari bishatu omu saabiiti.

OKUFURUKA OKUNDI

Ofiisi y’eitaagi ekaba eri omu tauni ya La Victoria, n’ahabw’ekyo nk’eka tukacwamu kufuruka kuza La Victoria haihi na Beseeli. Egyo ekaba eri empinduka y’amaani ahariitwe twena. Ninyesiimisa munonga eka yangye. Emiteekateekyere yaabo aha nshonga egyo ekampwera munonga. Munyaanyazi Baha akaba ayeteekateekire kureeberera maaweitwe. Mike akaba aine omukazi, kwonka Samira na Gabriel bakaba nibakituura omuka. N’ahabw’ekyo, okufurukira La Victoria kikaba nikimanyisa okutsigaho banywani baabo omuri Caracas. Kandi, omukundwa wangye Sylvia akaba aine kumanyiira okutuura omu katauni kakye omu mwanya gw’okutuura omu rurembo ruhango. Kandi twena tukaba twine kumanyiira kutuura omu nju efunzire. Eego, hakaba nihatwariramu bingi kucwamu kufurukira Caracas La Victoria.

Kwonka, ebintu bikagaruka byahinduka. Gabriel nawe akashwera kandi Samira yaaza kutuura wenka. Reero nyowe na Sylvia tukeetwa kwegaita aha Beseeli omu 2007, ahu turikuheereza na hati. Mike, mutabani waitu omukuru, n’omureeberezi kandi we n’omukazi we, Monica ni baapayoniya. Gabriel nawe n’omureeberezi, kandi we n’omukazi we, Ambra nibaheereza omuri Italy. Samira, ni payoniya kandi naahwera n’aha Beseeli ari owe ahu arikutuura.

NKAABAASIZE KUCWAMU EBINTU NIBYO BIMWE

Eego, ntwire nincwamu aha nshonga nkuru. Kwonka tindikwefuuza. Naatunga omugisha buzima nkaacwiremu ebintu nibyo bimwe. Ninsiima munonga obujunaanizibwa bwingi bw’eby’omwoyo n’emigisha ei ntungire omu kuheereza Yehova. Kumara emyaka mingi, nyetegyereize oku kiri kikuru kuguma oine omukago guhami na Yehova. Yaaba twine kucwamu aha nshonga nkye nari mpango, Yehova naatuha obusingye ‘oburengire okwetegyereza kwona.’ (Fil. 4:6, 7) Nyowe na Sylvia nitukunda obuheereza bwaitu oburikwera aha Beseeli, kandi nitureeba ngu tutungire emigisha ahabw’okucwamu kwaitu, turikukora buri kimwe tuteebirwe Yehova.