Abantu Nibakira Kucwamu Barikwihirira Ahari Ki?

Haihi buri omwe naamanya ngu hariho ebikorwa ebihikire nari ebigwereire kimwe. Nk’eky’okureeberaho, abantu nibakira kujuumirira ebikorwa nk’okwita, okuhamba, n’okutoroboza, kandi abamwe nibahimbisa abaine emitwarize nk’oburingaaniza, embabazi, n’esaasi. Kandi shi kyahika aha kucwamu ow’okuteerana nawe, okuba ow’amazima, nari okworora abaana? Abantu baingi nibagira ngu omu nshonga ezo tihariho kucwamu kuhikire nari okugwire. Nibateekateeka ngu eki orikucwamu kyona nikiikirizibwa. Abantu nibakira kucwamu barikwihirira aha ku barikwehurira n’oku abu barikuba bari nabo barikwehurira. Kwonka shi ekyo kihikire?

OKU TURIKWEHURIRA

Nitukira kucwamu turikwihirira aha ku turikwehurira nari omuntu waitu ow’omunda. (Abarooma 2:​14, 15) Nangwa n’abaana nibabaasa kumanya ngu omuntu yaatwaza gye nari kubi, kandi nibeeshinja baakora ekitahikire. Bwanyima y’obwire, omuntu waitu ow’omunda naatendekwa ebi turikwegyera aha b’eka yaitu, ab’orwingano rwaitu, abashomesa, abataahi, ediini, n’eby’obuhangwa. Twaba nitucwamu, omuntu waitu ow’omunda naatumanyisa yaaba eki twacwamu nikihikaana n’ebi twegyesiibwe.

Omuntu waitu w’omunda naabaasa kutuhiga kugirira abandi esaasi, kubasiima, kubatwariza gye n’okubakorera eby’embabazi. Kandi naatuzibira kukora ebirikubaasa kusaasa abakundwa baitu, kutureetera kuhemuka, nari kweshinja.

Mbwenu shi nitubaasa kwihirira aha nyehurira zaitu kucwamu gye? Obu Garrick yaabaire ari omutsigazi akagira ati: “Nkaba nimbaasa kweteeraho emitindo eyangye.” Kwonka, akeetegyereza ngu okukora ebi yaabaire naateekateeka ngu bihikire tibirarugiremu birungi. Akagira ngu akaba ataine kushemererwa ahabw’okwejumba “omu bikorwa by’obushambani, okukoresa kubi emibazi, obusinzi, n’obushaarizi.”

OKU ABANDI BARIKWEHURIRA

Kandi kaingi nitukira kucwamu turikwihirira aha ku bandi barikureeba ebi turikucwamu. Ekyo nikibaasa kutuhwera kugasirwa omu bwengye bwabo n’ebi barabiremu. Ab’eka yaitu, abanywani, n’abataahi nibatuha ekitiinisa twakora ebi barikuteekateeka ngu nibyo bihikire.

Mbwenu shi nitubaasa kwihirira aha nyehurira z’abandi kucwamu ekihikire? Obu Priscila yaabaire ari omwishiki muto, akakora ebi ab’orwingano rwe baabaire nibatwara nka bikuru, kandi akaba naareeba okuteerana otakagiire mu bushwere nk’ekitaine nshonga. Kwonka, okukora ebi abandi barikureeba nk’ebihikire tikiraamureeteire kushemererwa. Naagira ati: “Okukora eki buri omwe yaabaire naakora kikaandeetera kwehurira kubi, n’okuta amagara gangye omu kabi.”

MBWENU SHI HARIHO OMURINGO MURUNGI GW’OKUCWAMU GYE?

Enyehurira zaitu n’ez’abandi nizibaasa kutuhwera twaba nitucwamu aha kihikire n’ekigwire. Kwonka obutoosha ekyo kyonka, tikirikurugamu ebirungi. Obumwe nitubaasa kwereetera oburemeezi n’abandi ahabw’okutateekateeka aha biraarugye omu kucwamu kwaitu. (Enfumu 14:12) Tihariho obuhame oburikworeka ngu emitindo yaitu nari ey’abandi n’ey’oburungi bwaitu, kandi ngu tikirikutwetengyesa kugihindura. N’emitwarize eyaabaire neereebwa nk’etahikire, hati neyikirizibwa, reero eyaabaire neyikirizibwa neereebwa nk’etashemeire.

Mbwenu shi hariho ekirikubaasa kutuhwera kucwamu gye aha kihikire n’ekigwire? Hariho emitindo y’emicwe ei twine kugyenderaho etaraatureetere kwefuuza omu biro by’omumaisho?

Eego, hariho ahu turikubaasa kuguma nitwiha obuhabuzi oburikwesigwa, kandi oburikuhwera buri omwe ahu ari hoona. Ekicweka ekirikukurataho nikiza kworeka ekirikubaasa kutuhwera kumanya ekihikire n’ekigwire.